Kastamonu uniwérsitétida "Sherqiy türkistan xatire ormini" berpa qilin'ghan

Ixtiyariy muxbirimiz erkin tarim
2019-04-12
Élxet
Pikir
Share
Print

Türkiyede oquwatqan Uyghur oqughuchilarning köpiyishige egiship Uyghurlar toghrisidiki pa'aliyetlermu xilmu-xillashmaqta. Türkiyening kastamonu shehirige jaylashqan kastamonu uniwérsitétidiki Uyghur oqughuchilar 6-aprél küni uniwérsitét baghchisida "Sherqiy türkistan xatire ormini" berpa qilish üchün mektep rehberliki testiqlap bergen jaygha köchet tikken.

Pa'aliyetke mezkur uniwérsitétta oquwatqan 100 din artuq Uyghur oqughuchi qatnashqan bolup, ular 200 tüp etrapida köchet tikken.

Köchet tikish pa'aliyitige yétekchilik qilghan kastamonu uniwérsitéti türk tili we edebiyati kespining oqughuchisi serdar bu heqte radiyomiz ziyaritini qobul qilip, melumat berdi.

Kastamonu uniwérsitéti türkiyediki Uyghur oqughuchilar eng köp oquwatqan uniwérsitét hésablinidu. Mezkur uniwérsitétta oquwatqan türkiy tilliq milletlerdin bolghan oqughuchilarning köplükige qarap kishiler bu uniwérsitétni "Türk dunyasi uniwérsitéti" depmu ataydiken.

Ikki yildin béri Uyghur oqughuchilarning tirishchanliqi netijiside, kastamonu shehiride, bolupmu mezkur uniwérsitétta Uyghurlar we Uyghurlarning hazirqi weziyiti nahayiti yaxshi tonushturulmaqta. Buning netijiside kastamonu uniwérsitétning her derijilik rehberlirimu Uyghur oqughuchilargha alahide ghemxorluq qilishqa bashlighan. Uyghur oqughuchilarning yétekchiliridin serdar mezkur uniwérsitétning derwazisidin kirgende köz chéliqidighan jaygha "Sherqiy türkistan xatire ormini" berpa qilin'ghanliqi, buning üchün deslepki qedemde 200 tüp köchet tikilgenlikini bayan qildi.

Serdarning bildürüshiche, kastamonu uniwérsitétida oquwatqan Uyghur oqughuchilarning köpi ikki yil burun oqushqa kirgenler bolup, ular mektepte ötküzülgen her xil pa'aliyetlerge aktip qatnishish arqiliq Uyghurlarning milliy medeniyitini we Uyghur dewasini yaxshi tonushturup kelmekte iken

Kastamonu uniwérsitéti 2006-yili qurulghan bolup, bu uniwérsitétta 30 dölettin kelgen oqughuchilar bar iken. Bularning ichide ottura asiya türkiy jumhuriyetliridin kelgen oqughuchilarning sanimu köp salmaqni igileydiken. Shunga bu uniwérsitétta Uyghurlarni, bolupmu Uyghur milliy dewasini anglitish zor ehmiyetke ige iken.

Kastamonu uniwérsitétida oquwatqan Uyghur qiz oqughuchilarning wekili, türk tili we edebiyati kespining oqughuchisi sübhinur ömer köchet tikish pa'aliyiti barin inqilabining 29-yilliqini xatirilesh künige toghra kelgen bolghachqa, pa'aliyetni barin shéhitlirigha atap ötküzgenlikini bayan qildi.

Kastamonu uniwérsitétidin qalsa türkiyede Uyghur oqughuchilar eng köp oquwatqan aliy mekteplerdin biri bursa shehiridiki uludagh uniwérsitétidur. Bu uniwérsitéttiki Uyghur oqughuchilar bursa shehirining fetih qilin'ghanliqining 691 yilliqi munasiwiti bilen élip bérilghan chong pa'aliyette barin weqesini xatiriligen. Bu pa'aliyetke bursa shehirining bashliqi alinur aqtash ependimu ishtirak qilghan. Pa'aliyette qollirida al-yultuzluq kök bayraq bilen türkiye bayriqini kötürüwalghan köp sandiki Uyghur oqughuchilar barin shéhitlirigha atap qur'an tilawet qilghan we sheher meydanidiki yighilishqa qatnashqan. Uludagh uniwérsitétida oquwatqan 100 dek Uyghur oqughuchining wekili abduqadir abdukérim bilen bu heqte bizge melumat berdi.

Türkiye ma'arip ministirliqi bergen melumatqa asaslan'ghanda, hazir türkiyediki 80 dek aliy mektepte 2080 neper etrapida Uyghur oqughuchi oqumaqtiken.

Toluq bet