Кәмал қиличдароғлу: "биз шәрқий түркистан мәсилисини парламентниң ичи-сиртида күнтәртипкә елип келишни давамлаштуримиз"

Ихтиярий мухбиримиз әркин тарим
2021-04-16
Share
Кәмал қиличдароғлу: Түркийә парламентидики әң чоң өктичи партийәләрдин "җумһурийәт хәлқ партийәси" ниң рәиси кәмал қиличдароғлу әпәнди уйғур академийәси рәһбәрлирини әнқәрәдики партийә мәркизидә қобул қилди. 2021-Йили 16-апрел.
RFA/Erkin Tarim

Түркийә парламентидики әң чоң өктичи партийәләрдин "җумһурийәт хәлқ партийәси" ниң рәиси кәмал қиличдароғлу әпәнди уйғур академийәси рәһбәрлирини әнқәрәдики партийә мәркизидә қобул қилди. Кәмал қиличдароғлу өзлириниң уйғурларниң һазирқи еғир вәзийитидин, болупму лагерлардин хәвәрдар икәнликини, парламентниң ичи вә сиртида уйғурларниң һазирқи ечинишлиқ вәзийитини күнтәртипкә елип келишни давам қилидиғанлиқини тәкитлиди.

16-Апрел күни чүштин кейин саәт үчтә уйғур академийәси иҗраийә рәиси абдулхәмит қарахан әпәнди, әнқәрәдики йилдирим бәязит университети оқутқучиси намәтҗан мәмәт әпәндиләрдин тәркиб тапқан һәйәт "җумһурийәт хәлқ партийәси" рәиси кәмал қиличдароғлу билән көрүшкәндә униңға бир парчә язма тәләп хети билән уйғурларниң һазирқи еғир вәзийити тоғрисида тәйярланған бир йүрүш доклатни сунди, шундақла кәмал қиличдароғлуниң бәзи соаллириға җаваб бәрди.

Учришиш ахирлашқандин кейин кәмал қиличдароғлудин "сиз уйғурларниң һазирқи еғир вәзийити тоғрисида аңлитилғанларни аңлидиңиз, улар сиздин күткән тәләплириниму оттуриға қоюп өтти. Буларни аңлиғандин кейин бу һәқтә немиләрни демәкчисиз?" дегән соалимизға у мундақ җаваб бәрди: "кишилик һоқуқ дәпсәндичиликигә қарши пүтүн мәдәний дөләтләр сәзгүрдур. Кишилик һоқуқ дәпсәндичилики мәсилиси мәлум дөләтләрниңла мәсилиси әмәс, дунядики һәр қайси дөләтләрниң ортақ мәсилисидур. Қәйәрдә кишилик һоқуқи дәпсәндичилики болса униңға инкас қайтуруш керәк вә буниң тоғра әмәсликини давамлиқ оттуриға қоюш керәк".

Җумһурийәт хәлқ партийәси рәиси кәмал қиличдароғлу әпәнди йәнә мундақ деди: "биз түркийә парламентиниң ичи вә сиртида уйғур мәсилисини күнтәртипкә елип кәлдуқ вә бундин кейинму давамлиқ һалда оттуриға қоймақчимиз. Кишилик һоқуқ дәпсәндичилики дуняниң нәридә болса униңға қарита сүкүттә турғили болмайду".

Уйғур академийәси иҗраийә рәиси абдулхәмит қарахан әпәнди бу қетим кәмал қиличдароғлуниң уйғур академийәси рәһбәрлиригә мәхсус вақит айрип, қобул қилғанлиқиниң үнүмлүк болғанлиқини оттуриға қойди.

Абдулхәмит қарахан әпәнди өзлириниң кәмал қиличдароғлуға бир парчә язма тәләп хети билән бир йүрүш доклат сунғанлиқини баян қилди.

Әнқәрәдики йилдирим бәязит университети оқутқучиси доктор намәтҗан мәмәт әпәнди, кәмал қиличдароғлуниң өзлириниң уйғурларниң еғир вәзийити һәққидики баянлирини диққәт билән аңлиғанлиқини, һәр қайси партийә вә тәшкилат рәһбәрлири билән давамлиқ учришип турушниң пайдилиқ икәнликини тәкитлиди

Һазир түркийә парламентида болған "җумһурийәт хәлқ партийәси" 1923-йили түркийә җумһурийитиниң қурғучи рәиси мустафа камал ататүрк тәрипидин қурулған болуп, бу партийә түркийәдә узун вақитлар һакимийәт башқурғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт