Kemal qilichdar'oghlu: "Biz sherqiy türkistan mesilisini parlaméntning ichi-sirtida küntertipke élip kélishni dawamlashturimiz"

Ixtiyariy muxbirimiz erkin tarim
2021-04-16
Share
Kemal qilichdar'oghlu: Türkiye parlaméntidiki eng chong öktichi partiyelerdin "Jumhuriyet xelq partiyesi" ning re'isi kemal qilichdar'oghlu ependi Uyghur akadémiyesi rehberlirini enqerediki partiye merkizide qobul qildi. 2021-Yili 16-aprél.
RFA/Erkin Tarim

Türkiye parlaméntidiki eng chong öktichi partiyelerdin "Jumhuriyet xelq partiyesi" ning re'isi kemal qilichdar'oghlu ependi Uyghur akadémiyesi rehberlirini enqerediki partiye merkizide qobul qildi. Kemal qilichdar'oghlu özlirining Uyghurlarning hazirqi éghir weziyitidin, bolupmu lagérlardin xewerdar ikenlikini, parlaméntning ichi we sirtida Uyghurlarning hazirqi échinishliq weziyitini küntertipke élip kélishni dawam qilidighanliqini tekitlidi.

16-Aprél küni chüshtin kéyin sa'et üchte Uyghur akadémiyesi ijra'iye re'isi abdulxemit qaraxan ependi, enqerediki yildirim beyazit uniwérsitéti oqutquchisi nametjan memet ependilerdin terkib tapqan hey'et "Jumhuriyet xelq partiyesi" re'isi kemal qilichdar'oghlu bilen körüshkende uninggha bir parche yazma telep xéti bilen Uyghurlarning hazirqi éghir weziyiti toghrisida teyyarlan'ghan bir yürüsh doklatni sundi, shundaqla kemal qilichdar'oghluning bezi so'allirigha jawab berdi.

Uchrishish axirlashqandin kéyin kemal qilichdar'oghludin "Siz Uyghurlarning hazirqi éghir weziyiti toghrisida anglitilghanlarni anglidingiz, ular sizdin kütken teleplirinimu otturigha qoyup ötti. Bularni anglighandin kéyin bu heqte némilerni démekchisiz?" dégen so'alimizgha u mundaq jawab berdi: "Kishilik hoquq depsendichilikige qarshi pütün medeniy döletler sezgürdur. Kishilik hoquq depsendichiliki mesilisi melum döletlerningla mesilisi emes, dunyadiki her qaysi döletlerning ortaq mesilisidur. Qeyerde kishilik hoquqi depsendichiliki bolsa uninggha inkas qayturush kérek we buning toghra emeslikini dawamliq otturigha qoyush kérek".

Jumhuriyet xelq partiyesi re'isi kemal qilichdar'oghlu ependi yene mundaq dédi: "Biz türkiye parlaméntining ichi we sirtida Uyghur mesilisini küntertipke élip kelduq we bundin kéyinmu dawamliq halda otturigha qoymaqchimiz. Kishilik hoquq depsendichiliki dunyaning neride bolsa uninggha qarita sükütte turghili bolmaydu".

Uyghur akadémiyesi ijra'iye re'isi abdulxemit qaraxan ependi bu qétim kemal qilichdar'oghluning Uyghur akadémiyesi rehberlirige mexsus waqit ayrip, qobul qilghanliqining ünümlük bolghanliqini otturigha qoydi.

Abdulxemit qaraxan ependi özlirining kemal qilichdar'oghlugha bir parche yazma telep xéti bilen bir yürüsh doklat sun'ghanliqini bayan qildi.

Enqerediki yildirim beyazit uniwérsitéti oqutquchisi doktor nametjan memet ependi, kemal qilichdar'oghluning özlirining Uyghurlarning éghir weziyiti heqqidiki bayanlirini diqqet bilen anglighanliqini, her qaysi partiye we teshkilat rehberliri bilen dawamliq uchriship turushning paydiliq ikenlikini tekitlidi

Hazir türkiye parlaméntida bolghan "Jumhuriyet xelq partiyesi" 1923-yili türkiye jumhuriyitining qurghuchi re'isi mustafa kamal atatürk teripidin qurulghan bolup, bu partiye türkiyede uzun waqitlar hakimiyet bashqurghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet