Түркийәниң қиршәһирдә миңлиған киши хитайниң уйғурларға қарита елип бериватқан ирқий қирғинчилиқиға ләнәт оқуди

Ихтиярий мухбиримиз әркин тарим
2021-05-17
Share

Уйғур мәсилисиниң хәлқарада давамлиқ күнтәртипкә келишигә әгишип, түркийәдиму һәрқайсий партийә вә аммивий тәшкилатларниң уйғурларға игә чиқиш, хитайға наразилиқ билдүрүш паалийәтлири өткүзүлмәктә. "ийи" партийәси түркийәниң оттура қисмиға җайлашқан қиршәһир вилайитиниң шәһәр мәркизидики җаҗабей мәйданида хитайниң уйғурларға йүргүзүватқан ирқий қирғинчилиқ сияситигә ләнәт оқуш, түркийә һөкүмитини уйғурларға игә чиқишқа чақириш йиғилиши өткүзди. 14-Май күни кәч саәт 7 йеримда тәрмә йолида йиғилип, қиршәһир мәркизигә қарап йолға чиққан машинилириға шәрқий түркистан билән түркийәниң байриқини есивалған намайишчилар шәһәр мәркәзидики җаҗабей мәйданида йиғилишти. Мәйданда йиғилған намайиш әһлигә "ийи" партийәсиниң қиршәһир шәһәр мәркизидики мәсули зафәр сатилмиш әпәнди ечилиш нутуқи сөзләп мундақ деди: "бүгүн бу йәргә шәрқий түркистандики қериндашлиримизниң пәряди йүксиливатқан пәйттә, шәрқий түркистанлиқ қериндашлиримизниң авази болуш, уларға елип бериливатқан зулумға қарши туруш үчүн җәм болдуқ. Шәрқий түркистанда милйонлиған қериндишимиз зулум астида, искәнҗигә учримақта. Әпсуски, һөкүмитимиз техиғичә сүкүттә турмақта. Буни аз дәп түркийә сәһийә министири партийәмизниң рәиси мәрал ақшәнәр ханимни ‹уйғурларға игә чиқип хитай билән болған мунасивитимизни буздуң' дәп әйиблиди. Буни қобул қилғили болмайду."

У сөзиниң ахирида қиршәһир хәлқини уйғурларға игә чиқишқа, уларниң авази болушқа чақирип мундақ деди: "шәрқий түркистанда шеһит болған, зулумға учраватқан қериндашлиримизға аллаһ ярдәм қилсун. Дуняниң һәр қайси җайлирида зулумға учраватқан қериндашлиримизниң авази болайли. Бүгүн шәрқий түркистанда, қиримда, боснийәдә вә пәләстиндә зулумға учраватқан қериндашлиримизға игә чиқайли. Буларниң пәрядини һөкүмитимизгә вә түрк хәлқиғә аңлитайли."

Арқидин қиршеһир шәһәр башлиқи сәлаһиддин әкичиоғлу әпәнди сөз қилди. У мундақ деди: "биз түрк миллити болуш сүпитимиз билән һеч қачан залимларни қоллимидуқ, һәр даим езилгән милләтләрниң йенида турдуқ. Бундин кейинму мәзлум милләтләрни қоллишимиз керәк. Қәйәрдә зулум қилғучи болса, униңға қарши чиқишимиз керәк. Шәрқий түркистан мәсилисидиму һәм шундақ қилишимиз керәк."

14-Май күни кичқурун қиршеһир мәркизидики чоң мәйданда өткүзүлгән паалийәткә қиршәһир шәһәрлик һөкүмәтниң башлиқи вә һәр дәриҗилик кадирлиридин сирт, түркийәдики өктичи партийәләрдин саадәт партийәси, келәчәк партийәси вә җумһурийәт хәлқ партийәсиниң қиршәһир вилайитидики мәсуллири вә әзалириму иштирак қилди. Паалийәтни уюштурған "ийи" партийәсиниң рәһбәрлиридин мүфит гөчән әпәнди алди билән паалийәткә иштирак қилғанларға рәһмәт ейитқандин кейин мәтбуат баянатини оқуп өтти. Баянатта мундақ йезилған: "һөрмәтлик қиршәһәрликләр, қиммәтлик саадәт партийәси вә келәчәк партийәлириниң мәсуллири вә шәһәр башлиқи, һәммиңлар хуш келипсиләр. Шәрқий түркистанда уйғурларға қарита елип бериливатқан инсанлиқ қелипидин чиққан сиясәткә ләнәт оқуш үчүн бу йәргә җәм болдуқ. Һәммимизгә мәлум болғинидәк, партийәмизниң рәиси мәрал ақшәнәр ханимниң йолйоруқи билән партийәмиз бу йил 3-айда хитай хәлқ җумһурийәтиниң уйғурларға қарита елип бериватқан сияситини ‹ирқий қирғинчилиқ' дәп қобул қилдуруш үчүн парламенткә бир қарар лайиһәси сунди. Мәзкур лайиһә һөкүмәт тәрипидин рәт қилинди. Шуни билишимиз керәкки, бүгүнки күндә шәрқий түркистандики түркий хәлқләр еғир зулум астида, у йәр уйғурларниң земинидур, мәңгү уларниң земини болиду. Хитай һөкүмити бүгүнки күндә шәрқий түркистанда ирқий қирғинчилиқ елип бармақта, биз бүгүн хитай һөкүмитиниң бу рәзил сияситигә ләнәт оқуш билән бирликтә түркийә һөкүмитини уйғурларға игә чиқишқа чақиримиз."

Қиршәһир уйғурлар әң көп олтурақлашқан қәйсәригә қошна вилайәт болуп, мәзкур вилайәттә бурундин тартип уйғур мәсилисигә көңүл бөлидиғанлар бар икән. Шәрқий түркистан вәхпиниң сабиқ рәиси һамутхан гөктүрк әпәнди һазир уйғурларни қоллаш паалийитиниң түркийәниң һәр қайси шәһәр вә вилайәтлиригә тезла кеңийиватқанлиқини баян қилди.

Паалийәтни уюштурған "ийи" партийәсиниң қиршәһирдики мәсули зафәр сатилмиш әпәнди телефон зияритимизни қобул қилип мундақ деди: "паалийәткә җәмий 250 машина карван болуп қатнашти. Җаҗабей мәйданида 750 әтрапида киши бар иди. Паалийитимизгә вилайитимиздики ахбарат васитилири вә түркийәдики әң чоң ахбарат васитилири орун бәрди. Һакимийәт бешидики партийә билән һөкүмәтни қоллаватқан партийәни яқлаватқан кишиләр қатнашмиди, яхши паалийәт болди."

2018-Йили "ийи" партийәсиниң парламент әзаси лүтфү турқан әпәнди билән фаһрәттин йоқуш әпәнди уйғурларниң һазирқи еғир вәзийитини тәкшүрүш тоғрисида тәклип лайиһәси сунған болсиму рәт қилинғаниди. Мәзкур партийәниң парламенттики мәсули лүтфү түркқан әпәнди йеқинда сунған уйғурларниң һазирқи еғир вәзийити тоғрисида түркийә парламентида тәкшүрүш елип берип, буниң нәтиҗисини дуня җамаәтчиликигә җакарлаш тоғрисида сунулған тәклип 2021-йили 10-март күни түркийә парламенти омумий йиғинда музакиригә қоюлған болуп, рәт қилинғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт