Uyghur hey'et türkiye parlaméntining bashliqi mustafa shentopqa Uyghurlarning teleplirini sundi

Ixtiyariy muxbirimiz arslan
2019-06-14
Élxet
Pikir
Share
Print
Uyghur hey'et türkiye parlaméntida parlamént re'isi mustafa shantop ependi bilen körüshti. 2019-Yili 13-iyun. Enqere, türkiye.
Uyghur hey'et türkiye parlaméntida parlamént re'isi mustafa shantop ependi bilen körüshti. 2019-Yili 13-iyun. Enqere, türkiye.
RFA/Arslan

13-Iyun peyshenbe küni istanbuldiki sherqiy türkistan teshkilatlar birlikining re'isi hidayetulla oghuzxan bashchiliqidiki 8 kishilik Uyghur hey'et enqerege bérip türkiye parlaméntini resmiy ziyaret qildi we parlamént bashliqi mustafa shentop bilen uchrashti.

Hidayetulla oghuzning bildürüshiche, mezkur hey'et Uyghurlarning hazirqi ehwali, nöwette duch kéliwatqan qiyinchiliqliri, sherqiy türkistandiki jaza lagérliri we lagérgha qamalghan tutqunlar shundaqla xitayning künsayin artiwatqan bésim siyasetliri heqqide teyyarlan'ghan mexsus doklatni türkiye parlamént bashliqi mustafa shentopqa sun'ghan hemde aghzaki melumat bergen.

Hidayetulla oghuzxan yene mezkur doklatta Uyghur xelqning türkiyedin kütüwatqan arzu-teleplirinimu otturigha qoyghanliqini bildürdi.

Bu qétimliq uchrishishta mezkur hey'et yene türkiyediki Uyghurlarning iqamet élishi asanlashturup bérish, isim-familisige kod kirgüzüp qoyghanliq sewebidin hazirghiche iqamet alalmighan Uyghurlarning ismidiki kodni bikar qilish, türkiyede Uyghur mehellisi qurush, Uyghurlarni türkiye nopusigha qobul qilish, doxturxanilarda heqsiz dawalinishtin behrimen bolush, ilgiri se'udi erebistan'gha kélip olturaqliship qalghan we hazirghiche qollirida pasport yaki kimliki bolmighan Uyghurlarni türkiyege yötkep kélish, türkiye parlaméntidin mexsus bir hey'etning Uyghur diyarigha bérip tekshürüsh élip bérish qatarliq birmunche teleplerni otturigha qoyghan. Bu telepler yene parlamént bashliqigha tapshurulghan yazma doklattinmu orun alghan.

Hidayetulla oghuzxan yene bu qétimqi uchrishishta süriyede kurtlarning qolida tutup turuluwatqan Uyghur ayallar we kichik balilarni qutuldurup chiqish teleplirinimu otturigha qoyghanliqini bildürdi.

Hidayetulla oghuzxanning bildürüshiche, parlamént bashliqi mustafa shentop ependi Uyghur mesilisini yaxshi bilidighan we bir qanche yildin buyan Uyghurlargha köngül bölüp kéliwatqan bir shexs iken. Bu qétimqi uchrishishta u Uyghur hey'et tereptin otturigha qoyulghan 8 türlük telepni qizghinliq bilen qobul qilip, xatire deptirige yazghan. Süriyede esirge chüshüp qalghan Uyghur ayallar we kichik balilarni qutuldurush mesiliside jumhur re'isi bilen sözliship hel qilishqa tirishidighanliqini bildürgen. Undin bashqa parlamént bashliqi mustafa shentop yene se'udi erebistanda kimliki we pasporti yoq we yaki hazirghiche teywen pasporti bilen otturida qalghan Uyghurlarni türkiyege yötkep nopus bérish toghrisida türkiyening se'udi erebistandiki bash elchixanisi we jumhur re'is bilen sözlishidighanliqini, Uyghur diyarigha hey'et ewetish mesilisini muzakire qilidighanliqini bildürgen. 

Mezkur hey'et terkibide enqerege barghan sherqiy türkistan ölimalar birlikining wekili abdul'ehed uchqun ependimu ziyaritimizni qobul qilip, bu qétimliq uchrishish heqqide toluqlima berdi. U türkiye parlaméntining bashliqi bilen élip barghan bu qétimliq uchrishishtin zor ümid kütidighanliqini tekitlep ötti.

Türkiye parlaméntini ziyaret qilghan Uyghur hey'et terkibide yene türkiyediki sutuq bughraxan ilim we medeniyet wexpining bashliqi doktor abdulxaliq Uyghur, sherqiy türkistan ölimalar birlikining wekili abdul'ehed ojatli, sherqiy türkistan ma'arip we hemkarliq jem'iyitining bash katipi abdul'ehed abduraxman, sherqiy türkistan yéngi ewlad herikitining re'isi doktor abdusalam teklimakan, sherqiy türkistan kishilik hoquq komitétining wekili adil muhemmed'oghli, türkiye radi'o-téliwiziye idarisi Uyghur bölümining xadimi mirkamil qeshqerli qatarliqlarmu bar iken.

Toluq bet