"шәрқи түркистан үчүн анатолийә сәпири" намлиқ паалийәт коня хәлқиниң қизғин қоллишиға еришти

Ихтиярий мухбиримиз еһсан
2021-08-13
Share
Лагер қурбанлири йеқинлири тәшкиллигән "шәрқи түркистан үчүн анатолийә сәпири" ниң иккинчи бекити болған коняда елип берилған паалийәтләрдин бир көрүнүш. 2021-Йили авғуст. Коня, түркийә.
RFA/Ehsan

Лагер қурбанлири йеқинлири тәшкиллигән "шәрқи түркистан үчүн анатолийә сәпири" ниң иккинчи бекити болған коняда елип берилған паалийәтләр ғәлибилик аяғлашти.

Лагер қурбанлири йеқинлириниң конядики паалийәтлирини "әһди вәфа туран бирлики" тәшкилати орунлаштурған вә йеқиндин ярдәмдә болған болуп, уйғур паалийәтчиләр коня хәлқи вә пуқрави тәшкилатлар тәрипидин қизғин күтүвелинған.

Sherqi-TurkistanUchunAnatoliyeSepiri-202108-02.jpg

Конядики паалийәтниң иккинчи күни коня жорналиситлар җәмийитидә мәхсус мухбирларни күтивелиш йиғини өткүзүлгән. Мухбирларни күтүвелиш йиғиниға түркийидики нопузлуқ ахбарат васитилиридин "мәрһаба гезити", "қанал 42", "анадолу агентлиқи", "йиңи күн гезити" қатарлиқ ахбарат органлиридин жорналиситлар келип қатнашқан.

Лагер қурбанлири йиқинлириниң паалийәтлирини тәшкилләп келиватқан уйғур кишилик һоқуқ паалийәтчиси мирзәхмәт әпәнди зияритимизни қубул қилди. У уйғур қирғинчилиқиға аит конядики паалийәтләрниң коня хәлқиниң вә ахбарат васитилириниң қаттиқ диққитини тартқанлиқини, бу җәһәттин анатолийә сәпириниң интайин оңушлуқ давамлишиватқанлиқини ейтти.

"шәрқи түркистан үчүн анатолийә сәпири" паалийитидә паалийәтчиләр коня шәһиридә коча-кочиларни айлинип тәшвиқат варақлири тарқатқан. Бағча вә хәлқ мәйданлирида аилилириниң бешиға кәлгән күлпәтләрни мисалға елип, уйғурларниң нөвәттики вәзийитини коня хәлқигә тәпсилий чүшәндүргән.

Sherqi-TurkistanUchunAnatoliyeSepiri-202108-03.jpg

Лагер қурбанлири йеқинлири коняда "аһди вәфа туран бирлики", "көк һилал маарип тәшкилати", "IHH коня шөбиси" қатарлиқ тәшкилатлар билән йеқиндин һәмкарлашқан болуп, паалийәтчиләр конядики тәшвиқат йиғини вә намайишларниң тәшкиллинишидә конядики пуқрави тәшкилатларниң муһим рол ойниғанлиқини тәкитлимәктә.

Униңдин башқа коня шәһири зәпәр мәйданида ахбарат елан қилиш йиғини өткүзүлгән болуп, йиғинға "ийи" партийәсиниң коня шөбиси секритари, "келәчәк" партийәсиниң коня шөбиси секритари вә бу партийиләрниң коня шәһиридики муһим хадимлири қәдәм тәшрип қилған.

Уйғур кишилик һоқуқ паалийәтчиси мәдинә назими ханим конядики бир қисим паалийәтләр һәққидә тәпсилий тохталди вә коня хәлқиниң уйғур давасиға болған қизғинлиқидин интайин сөйүнгәнликини ейтти.

Лагер қурбанлири йеқинлири йәнә коня сәлчуқ мәркәз мәсчитигә берип, пешин намизида мәсчиткә кәлгән җамаәткә мәзкур мәсчит имамниң тәклипи билән уйғурларниң нөвәттики әһвалини аңлатқан. Лагер қурбанлири йеқинлиридин мирзәхмәт илясоғли әпәнди җамаәткә хитайниң уйғурларға йүргүзүватқан қирғинчилиқ сиясәтлирини чүшәндүргән.

Мирзәхмәт әпәндиниң ейтишичә, мәсчит җамаити уйғурларниң бешиға келиватқан күлпәтләрни пүтүн диққити билән аңлиған вә уйғурлар үчүн дуа қилған.

Sherqi-TurkistanUchunAnatoliyeSepiri-202108-04.jpg

Лагер қурбанлири йеқинлиридин һәбибулла көсән әпәндим зияритимизни қубул қилип, коня хәлқиниң уйғур мәсилисигә болған позитсийиси вә паалийәтлириниң тәсири һәққидә тохталди.

Лагер қурбанлири йеқинлири хитайниң уйғур вә башқа йәрлик милләтләргә йүргүзүватқан ирқий қирғинчилиқ сияситини түрк хәлқигә биринчи мәнбәдин бивастә йәткүзүш вә түркийиниң ирқи қирғинчилиқни тонуши үчүн хәлқни сәпәрвәр қилиш мәқситидә 2-авғуст күнидин етибарән түркийиниң һәрқайси шәһәрлирини айлинип, һәр хил тәшвиқат вә намайиш паалийәтлирини елип бармақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт