"Sherqi türkistan üchün anatoliye sepiri" namliq pa'aliyet konya xelqining qizghin qollishigha érishti

Ixtiyariy muxbirimiz éhsan
2021-08-13
Share
Lagér qurbanliri yéqinliri teshkilligen "Sherqi türkistan üchün anatoliye sepiri" ning ikkinchi békiti bolghan konyada élip bérilghan pa'aliyetlerdin bir körünüsh. 2021-Yili awghust. Konya, türkiye.
RFA/Ehsan

Lagér qurbanliri yéqinliri teshkilligen "Sherqi türkistan üchün anatoliye sepiri" ning ikkinchi békiti bolghan konyada élip bérilghan pa'aliyetler ghelibilik ayaghlashti.

Lagér qurbanliri yéqinlirining konyadiki pa'aliyetlirini "Ehdi wefa turan birliki" teshkilati orunlashturghan we yéqindin yardemde bolghan bolup, Uyghur pa'aliyetchiler konya xelqi we puqrawi teshkilatlar teripidin qizghin kütüwélin'ghan.

Sherqi-TurkistanUchunAnatoliyeSepiri-202108-02.jpg

Konyadiki pa'aliyetning ikkinchi küni konya zhornalisitlar jem'iyitide mexsus muxbirlarni kütiwélish yighini ötküzülgen. Muxbirlarni kütüwélish yighinigha türkiyidiki nopuzluq axbarat wasitiliridin "Merhaba géziti", "Qanal 42", "Anadolu agéntliqi", "Yingi kün géziti" qatarliq axbarat organliridin zhornalisitlar kélip qatnashqan.

Lagér qurbanliri yiqinlirining pa'aliyetlirini teshkillep kéliwatqan Uyghur kishilik hoquq pa'aliyetchisi mirzexmet ependi ziyaritimizni qubul qildi. U Uyghur qirghinchiliqigha a'it konyadiki pa'aliyetlerning konya xelqining we axbarat wasitilirining qattiq diqqitini tartqanliqini, bu jehettin anatoliye sepirining intayin ongushluq dawamlishiwatqanliqini éytti.

"Sherqi türkistan üchün anatoliye sepiri" pa'aliyitide pa'aliyetchiler konya shehiride kocha-kochilarni aylinip teshwiqat waraqliri tarqatqan. Baghcha we xelq meydanlirida a'ililirining béshigha kelgen külpetlerni misalgha élip, Uyghurlarning nöwettiki weziyitini konya xelqige tepsiliy chüshendürgen.

Sherqi-TurkistanUchunAnatoliyeSepiri-202108-03.jpg

Lagér qurbanliri yéqinliri konyada "Ahdi wefa turan birliki", "Kök hilal ma'arip teshkilati", "IHH Konya shöbisi" qatarliq teshkilatlar bilen yéqindin hemkarlashqan bolup, pa'aliyetchiler konyadiki teshwiqat yighini we namayishlarning teshkillinishide konyadiki puqrawi teshkilatlarning muhim rol oynighanliqini tekitlimekte.

Uningdin bashqa konya shehiri zeper meydanida axbarat élan qilish yighini ötküzülgen bolup, yighin'gha "Iyi" partiyesining konya shöbisi sékritari, "Kélechek" partiyesining konya shöbisi sékritari we bu partiyilerning konya shehiridiki muhim xadimliri qedem teshrip qilghan.

Uyghur kishilik hoquq pa'aliyetchisi medine nazimi xanim konyadiki bir qisim pa'aliyetler heqqide tepsiliy toxtaldi we konya xelqining Uyghur dawasigha bolghan qizghinliqidin intayin söyün'genlikini éytti.

Lagér qurbanliri yéqinliri yene konya selchuq merkez meschitige bérip, péshin namizida meschitke kelgen jama'etke mezkur meschit imamning teklipi bilen Uyghurlarning nöwettiki ehwalini anglatqan. Lagér qurbanliri yéqinliridin mirzexmet ilyasoghli ependi jama'etke xitayning Uyghurlargha yürgüzüwatqan qirghinchiliq siyasetlirini chüshendürgen.

Mirzexmet ependining éytishiche, meschit jama'iti Uyghurlarning béshigha kéliwatqan külpetlerni pütün diqqiti bilen anglighan we Uyghurlar üchün du'a qilghan.

Sherqi-TurkistanUchunAnatoliyeSepiri-202108-04.jpg

Lagér qurbanliri yéqinliridin hebibulla kösen ependim ziyaritimizni qubul qilip, konya xelqining Uyghur mesilisige bolghan pozitsiyisi we pa'aliyetlirining tesiri heqqide toxtaldi.

Lagér qurbanliri yéqinliri xitayning Uyghur we bashqa yerlik milletlerge yürgüzüwatqan irqiy qirghinchiliq siyasitini türk xelqige birinchi menbedin biwaste yetküzüsh we türkiyining irqi qirghinchiliqni tonushi üchün xelqni seperwer qilish meqsitide 2-awghust künidin étibaren türkiyining herqaysi sheherlirini aylinip, her xil teshwiqat we namayish pa'aliyetlirini élip barmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet