Fahrettin yoqush: "'iyi partiyesi' Uyghur mesilisige axirighiche ige chiqidu!"

Ixtiyariy muxbirimiz erkin tarim
2019-10-14
Élxet
Pikir
Share
Print
"Yaxshi" partiyesining mu'awin re'isi axmet kamil erozan ependi(ongda) d u q ning mu'awin re'isi doktor erkin ekrem we Uyghur akadémiyesining ijra'iye re'isi abdulhemit qaraxan ependilerni qobul qildi. 2019-Yili 14-öktebir, türkiye.
"Yaxshi" partiyesining mu'awin re'isi axmet kamil erozan ependi(ongda) d u q ning mu'awin re'isi doktor erkin ekrem we Uyghur akadémiyesining ijra'iye re'isi abdulhemit qaraxan ependilerni qobul qildi. 2019-Yili 14-öktebir, türkiye.
RFA/Erkin Tarim

Uyghur diyaridiki yighiwélish lagérliri mesiliside türkiye hökümiti sükütte turuwatqan bügünki künde türkiyediki öktichi partiyelerdin biri bolghan "Iyi", yeni "Yaxshi" partiyesining mu'awin re'isi axmet kamil erozan ependi 14-öktebir küni chüshtin kéyin partiye merkizide Uyghur hey'eti bilen uchrashti.

D u q ning mu'awin re'isi doktor erkin ekrem ependi, Uyghur akadémiyesining ijra'iye re'isi abdulhemit qaraxan ependi we Uyghur tetqiqati instituti bashqurush hey'etliridin terkib tapqan hey'et "Iyi", yeni "Yaxshi" partiyesining tashqi siyasetke mes'ul mu'awin re'isi axmet kamil erozan ependining teklipige bina'en partiye merkizide yumilaq üstel yighini ötküzgen.

Doktor erkin erkin ekrem ependi "Iy", yeni "Yaxshi" partiyesining Uyghur siyasitini belgilep chiqishi üchün bezi Uyghur teshkilatlirining mes'ullirini teklip qilip yighin chaqirghanliqini, yighinning yéngiliq bolghanliqini tekitlidi.

Uyghur akadémiyesining ijra'iye re'isi abdulhemit qaraxan ependi yumilaq üstel yighinida "Yaxshi" partiyesi mes'ullirigha yighiwélish lagérliri we türkiyediki Uyghurlarning qiyinchiliqliri toghrisidimu melumat bergenlikini bayan qildi.

"Iyi", yani "Yaxshi" partiyesi 2017-yili 10-ayning 25-küni qurulghan bolup, 2018-yilidiki parlamént ezaliri saylimida parlaméntqa kirgen idi. Parlaméntqa kirgendin kéyinki bir yildin köprek waqit ichide partiye re'isi meral aqshener xanim we parlamént ezaliri izchil halda Uyghur mesilisini otturigha qoymaqta. Doktor erkin ekrem ependi "Iyi" partiyesi gerche öktichi partiye bolsimu, emma Uyghur mesilisini küntertipke élip kélishte zor rol oynighanliqini bayan qildi.

Enqere türkiyening siyaset merkizi bolup, Uyghurlar izchil halda herqaysi partiyelerning mes'ullirigha sherqiy türkistan mesilisini anglatmaqta. Abdulhemit qaraxan ependi bundin kéyin herqaysi partiyelerni ziyaret qilip, Uyghurlarning éghir weziyiti we türkiyediki Uyghurlar duchar boluwatqan mesililer toghrisida melumat bérip turidighanliqini bayan qildi.

Melum bolghinidek, türkiyediki bezi partiyeler hakimiyet béshigha kelgüche Uyghur mesilisige köngül bölidighanliqini tekitlisimu, emma hakimiyet béshigha kelgendin kéyin Uyghur mesiliside sükütte turuwalidighan ehwallar köp körülgen. Undaqta, "Iyi" partiyesi hakimiyet béshigha kelse, Uyghur mesilisige köngül bölüshni dawamlashturamdu?

Bu heqte köz qarishini igilesh üchün bu qétimqi uchrishishni uyushturghan parlamént ezasi fahrettin yoqushqa mikrofonimizni uzattuq. U bu heqte köz qarishini banay qilip, mundaq dédi: "Partiyemiz qurulghan kündin tartip ézilgen milletlerge ige chiqish bizning shu'arimiz idi. Buni bir yildin buyan parlaméntta izchil halda küntertipke élip kéliwatimiz. Partiyemizning re'isimu bu mesilini kün tertipke élip kelgen idi, bundin kéyinmu dawamliq otturigha qoyushni dawamlashturimiz. Qachan'ghiche désingiz? sherqiy türkistan musteqil bolghuche, xitayning zulum siyasiti axirlashquche, 'iyi' partiyesi bolush süpitimiz bilen sherqiy türkistan dewasigha ige chiqimiz. Egerde bir kün türkiyede hakimiyet béshigha kelsekmu biz sherqiy türkistan dewasigha ige chiqishni dawamlashturimiz."

Uchrishish axirida "Iyi" partiyesige Uyghur tetqiqati instituti teyyarlighan "Sherqiy türkistanda irqiy qirghinchiliq" namliq doklat teqdim qilindi.

Toluq bet