Merhum eysa yüsüp aliptékin wapatining 25 yilliq xatiriside “Iyi” partiyesining re'isi meral aqshener xanim bayanat élan qildi

Ixtiyariy muxbirimiz erkin tarim
2020-12-18
Share
Merhum eysa yüsüp aliptékin wapatining 25 yilliq xatiriside “Iyi” partiyesining re'isi meral aqshener xanim bayanat élan qildi Türkiye prézidénti rejep tayyip erdoghan'gha qarshi prézidént saylimigha qatnishidighan kandidat, “Iyi” partiyesining re'isi meral aqshener partiyisining saylam xitabnamisi heqqide söz qildi. 2018-Yili 14-may, enqere, türkiye.
AP

Türkiyediki “Iyi” partiyesining re'isi meral aqshener xanim eysa yüsüp aliptékin wapatining 25-yilliqini xatirilesh munasiwiti bilen élan qilghan bayanatida, her waqit Uyghurlarni qollaydighanliqini tekitligen.

Meral aqshener xanim ijtima'iy taratqular arqiliq élan qilghan bayanatida eysa yüsüp aliptékinning kök bayraqni sherqiy türkistan asminida lepilditish üchün pütün ömrini atighan kishi ikenlikini, Uyghurlarning rehbiri bolghan eysa yüsüp aliptékinni hörmet bilen esleydighanliqini, bügün xitayning sherqiy türkistanda élip bériwatqan insan qélipidin chiqqan basturushlirini körmeslikke séliwatqanlargha qarshi her da'im Uyghurlarni qollap-quwetleydighanliqini bayan qilghan.

Buningdin bashqa türkiyediki parlamént ezaliri, ammiwi teshkilat mes'ulliri we Uyghur jama'iti bayanat élan qilip, eysa yüsüp aliptékin wapatining 25-yilliqi munasiwiti bilen merhumning ish-izlirini esligen. Uzun yil merhum eysa yüsüp aliptékinning yénida ishligen hamutxan göktürk ependi bu heqte ziyaritimizni qobul qildi. U “Meral aqshener xanim bashchiliqidiki köpligen kishilerning merhum eysa yüsüp alptekinni eslep bayanat élan qilishi, sherqiy türkistan dewasining künsayin küchiyiwatqanliqining béshariti,” dédi.

Eysa yüsüp alptekinning oghli ilghar aliptékin ependi “Iyi” partiyesining re'isi meral aqshener xanimning bayanati üchün rehmet éytti. U sözide eslide türkiye hökümitiningmu bundaq bayanat élan qilishi kéreklikini, lékin xitay bilen bolghan munasiwitini dep, buningdin özini qachurghanliqini bayan qildi.

Hamutxan göktürk ependi merhum eysa ependining kishiliki toghrisida melumat berdi.

Ilghar aliptékin ependi eysa yüsüp aliptékinning Uyghur yashlirini oqutush ishlirigha zor ehmiyet bergenlikini bayan qildi.

Eysa yüsüp aliptékin 1901-yili qeshqerning yéngisar nahiyiside dunyagha kelgen. Xitay kommunistliri Uyghur diyarigha bésip kirgen 1949-yilining axirida, u muhemmet'imin bughra bilen birlikte wettenni terk étip, chet'elge chiqip ketken. 1954-Yili türkiyege kélip olturaqlashqan. Eysa ependi 1960-yili istanbulda “Sherqiy türkistan köchmenler jem'iyiti” ni qurghan, 1985-yili “Sherqiy türkistan weqpi” ni qurghan. Eysa ependi 1995-yili 12-ayning 17-küni wapat bolghuche sherqiy türkistan dewasi yolida tinimsiz küresh qilghan. Eysa ependining wapatidin kéyin, uni xatirilesh üchün türkiyening herqaysi sheherliridiki baghche, kocha we mekteplerge eysa yüsüp aliptékinning nami bérilgen.

Eysa yüsüp aliptékin 1995-yili 12-ayning 17-küni istanbulda alemdin ötken idi. Uning jinaza namizi fatih meschitide oqulghandin kéyin, miyiti türkiyening sabiq bash ministiri adnan menderes, sabiq dölet re'isi turghut özeller depne qilin'ghan topqapi mazarliqigha depne qilin'ghan idi. Uning jinaza murasimigha türkiyening dölet rehberliri gülchembirek ewetken we qatnashqan bolup, türkiyediki chong téléwiziye qanalliri neq meydandin xewer bergen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet