Xitay konsulxanisi lagér qurbanliri yéqinlirining iltimaslirini qobul qilishqa mejbur boldi

• Ixtiyariy muxbirimiz azigh
  2021-01-15

Xitay lagérliri we türmiliridiki a'ile yéqinlirining erkinliki üchün istanbuldiki xitay konsulxanisining aldida nöwette turush pa'aliyiti élip bériwatqan lagér qurbanliri yéqinliri istanbul waliyliqining telipi boyiche pa'aliyitini waqitliq toxtatqan.

Lagér qurbanliri yéqinlirining 13-yanwar élan qilghan bayanatida éytilishiche, istanbul waliyliqi pa'aliyetchiler bilen xitay konsulxanisi otturisida wasitichilik qilghan bolup, xitay konsulxanisi pa'aliyetchilerning iltimaslirini axirida tapshuruwélishqa maqul bolghan.

17 Künlük pa'aliyet istanbul waliyliqining telipi bilen waqtinche toxtitilghan bolup, aldimizdiki bir nechche kün jeryanida lagér qurbanliri yéqinlirining iltimasliri dawamliq toluqlap retlinidiken. Yighilghan iltimaslar pa'aliyetchilerning telepliri bilen qoshulup, istanbul waliyliqi arqiliq xitay elchixanisi bilen körüshüp tapshurup bérilidiken. Pa'aliyetning jeryani xitay elchixanisining pozitsiyesige qarap belgilinidiken.

Bu heqte bayanat bergen lagér qurbanliri yéqinliridin hebibulla köseni ependim mundaq dédi:

“Tünügün etigende waliyliqtin qérindashlirimizni chaqirip xitay elchixanisining qérindashlirimizning telipini alidighanliqi we qérindashlirimizning ichidin ikki kishini tallap körishidighanliqini bildürdi. Qérindashlirimiz biz peqet özimizning telipinila sunmaymiz. Uruq-tughqanliri yighiwélish lagérlirida yétiwatqan hemme qérindashlirimizning teleplirini jemlep andin tapshurup birimiz dégen telepni otturigha qoydi. Biraq ular buninggha maqul bolmay: “Mushu yerde bolghanlar telepliringlarni tapshurup kétisiler?” dédi. Bizning qérindashlirimiz buninggha razi bolmidi. Chünki bu qérindashlirimiz peqet özining tughqanlirinila oylighan emes, pütün wetinimizdiki lagérlarda bigunah yitiwatqan qérindashlirini oylighanliqtin ‛biz undaq qilalmaymiz‚ dégen jawabni berdi.”

Biz ehwal heqqide téximu tepsiliy melumatqa érishish üchün lagér qurbanliri yéqinliridin jewlan shirmemet we mirzexmet ilyas'oghli ependimni ziyaret qilduq. Pa'aliyetchiler ziyaritimizni qobul qilip, nöwette turush pa'aliyitining hazirqi ehwali heqqide tepsiliy melumat berdi.

Lagér qurbanliri yéqinliri 14-awghusttin bashlap, xitayning istanbul konsulxanisidin lagér yaki türmilerge solan'ghan we ghayib qiliwétilgen a'ile ezaliri heqqide izahat bérishni we munasiwetlik xadimlar bilen körüshtürüshni telep qilip kelmekte. Lagér qurbanliri yéqinliri qayta-qayta xitay konsulxanisigha munasiwetlik iltimaslarni tapshurmaqchi bolghan bolsimu, biraq konsulxana ta hazirghiche, lagér qurbanlirining munasiwetlik iltimaslirini tapshuruwélishni we munasiwetlik xadimlar bilen körüshüsh telipini ret qilip kelgen idi. Közetküchilerning qarishiche, türkiye we xelq'arada istanbuldiki nöwette turush pa'aliyitining tesirining künséri küchiyishi we keng qollashqa érishishi xitay konsulxanisini ipade bildürüshke we iltimaslarni qobul qilishqa mejburlighan.

Iltimaslarning qachan, kim teripidin tapshuriwilinidighanliqi, iltimaslarni tapshuruwalghanliqigha a'it éniq höjjetning chiqirip bérilidighan yaki bérilmeydighanliqi we iltimaslarning netijisining qachan chiqidighanliqi heqqide téxi éniq melumat yoq iken.