Хитай консулханиси лагер қурбанлири йеқинлириниң илтимаслирини қобул қилишқа мәҗбур болди

Ихтиярий мухбиримиз азиғ
2021.01.15
Хитай консулханиси лагер қурбанлири йеқинлириниң илтимаслирини қобул қилишқа мәҗбур болди Лагер қурбанлири йеқинлири истанбулдики хитай консулханиси алдида. 2021-Йили 13-январ, истанбул.
RFA/Azigh

Хитай лагерлири вә түрмилиридики аилә йеқинлириниң әркинлики үчүн истанбулдики хитай консулханисиниң алдида нөвәттә туруш паалийити елип бериватқан лагер қурбанлири йеқинлири истанбул валийлиқиниң тәлипи бойичә паалийитини вақитлиқ тохтатқан.

Лагер қурбанлири йеқинлириниң 13-январ елан қилған баянатида ейтилишичә, истанбул валийлиқи паалийәтчиләр билән хитай консулханиси оттурисида васитичилик қилған болуп, хитай консулханиси паалийәтчиләрниң илтимаслирини ахирида тапшурувелишқа мақул болған.

Лагер қурбанлири йеқинлири баянат елан қилмақта. 2021-Йили 13-январ, истанбул.

17 Күнлүк паалийәт истанбул валийлиқиниң тәлипи билән вақтинчә тохтитилған болуп, алдимиздики бир нәччә күн җәрянида лагер қурбанлири йеқинлириниң илтимаслири давамлиқ толуқлап рәтлинидикән. Йиғилған илтимаслар паалийәтчиләрниң тәләплири билән қошулуп, истанбул валийлиқи арқилиқ хитай әлчиханиси билән көрүшүп тапшуруп берилидикән. Паалийәтниң җәряни хитай әлчиханисиниң позитсийәсигә қарап бәлгилинидикән.

Бу һәқтә баянат бәргән лагер қурбанлири йеқинлиридин һәбибулла көсәни әпәндим мундақ деди:

“түнүгүн әтигәндә валийлиқтин қериндашлиримизни чақирип хитай әлчиханисиниң қериндашлиримизниң тәлипини алидиғанлиқи вә қериндашлиримизниң ичидин икки кишини таллап көришидиғанлиқини билдүрди. Қериндашлиримиз биз пәқәт өзимизниң тәлипинила сунмаймиз. Уруқ-туғқанлири йиғивелиш лагерлирида йетиватқан һәммә қериндашлиримизниң тәләплирини җәмләп андин тапшуруп биримиз дегән тәләпни оттуриға қойди. Бирақ улар буниңға мақул болмай: “мушу йәрдә болғанлар тәләплириңларни тапшуруп кетисиләр?” деди. Бизниң қериндашлиримиз буниңға рази болмиди. Чүнки бу қериндашлиримиз пәқәт өзиниң туғқанлиринила ойлиған әмәс, пүтүн вәтинимиздики лагерларда бигунаһ йитиватқан қериндашлирини ойлиғанлиқтин ‛биз ундақ қилалмаймиз‚ дегән җавабни бәрди.”

Биз әһвал һәққидә техиму тәпсилий мәлуматқа еришиш үчүн лагер қурбанлири йеқинлиридин җәвлан ширмәмәт вә мирзәхмәт илясоғли әпәндимни зиярәт қилдуқ. Паалийәтчиләр зияритимизни қобул қилип, нөвәттә туруш паалийитиниң һазирқи әһвали һәққидә тәпсилий мәлумат бәрди.

Лагер қурбанлири йеқинлири 14-авғусттин башлап, хитайниң истанбул консулханисидин лагер яки түрмиләргә соланған вә ғайиб қиливетилгән аилә әзалири һәққидә изаһат беришни вә мунасивәтлик хадимлар билән көрүштүрүшни тәләп қилип кәлмәктә. Лагер қурбанлири йеқинлири қайта-қайта хитай консулханисиға мунасивәтлик илтимасларни тапшурмақчи болған болсиму, бирақ консулхана та һазирғичә, лагер қурбанлириниң мунасивәтлик илтимаслирини тапшурувелишни вә мунасивәтлик хадимлар билән көрүшүш тәлипини рәт қилип кәлгән иди. Көзәткүчиләрниң қаришичә, түркийә вә хәлқарада истанбулдики нөвәттә туруш паалийитиниң тәсириниң күнсери күчийиши вә кәң қоллашқа еришиши хитай консулханисини ипадә билдүрүшкә вә илтимасларни қобул қилишқа мәҗбурлиған.

Илтимасларниң қачан, ким тәрипидин тапшуривилинидиғанлиқи, илтимасларни тапшурувалғанлиқиға аит ениқ һөҗҗәтниң чиқирип берилидиған яки берилмәйдиғанлиқи вә илтимасларниң нәтиҗисиниң қачан чиқидиғанлиқи һәққидә техи ениқ мәлумат йоқ икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.