Pochtixana dölet amanliq xadimi: türme we mekteplerge yollan'ghan xetler nuqtiliq tekshürülidu

Yéqinda toqquzaq weziyitidin xewerdar kishilerdin biri bizge inkas yollap, toqquzaq nahiyesining mush yézisidiki ahalilerdin nuriman'gül isimlik bir ayalning gu'angdung ölkiside oquwatqan qizigha yazghan salam xétide “Allahgha amanet” dégen söz yézilghanliqi üchün, saqchixanigha chaqirtilip soraq qilin'ghanliqi we 15 künlük soraqtin kéyin, agahlandurush jazasi bilen qoyup bérilgenlikini melum qildi. Uning déyishiche, yene shu yézidiki turap tursun isimlik bireylen, ürümchi 1 ‏-türmide jaza ötewatqan oghligha yazghan salam xétide “Bu qara künlermu ötüp kéter” dégenliki üchün tutup soraq qilin'ghan, soraq dawamida, uning yene “Bashqa jinayetliri” pash bolup qélip, bu yil 5 ‏-ayda 7 yilliq késiwétilgen.

Biz bu yip uchigha asasen, mush yéziliq saqchixanigha téléfon qilip yuqiriqi ehwal heqqide melumat soriduq. Xadimlar, konkrét délolar heqqide melumat bermigen bolsimu, emma yéqinqi yillardin buyan pochtixanilardimu dölet amanliq saqchilirining wezipe öteydighanliqi, ularning xet-xaltilarni tekshürüsh yoli bilen “Dölet bixeterlikini qoghdaydighanliqi” ni ashkarilidi.

Biz bu saqchixana teminligen alaqe nomurigha asasen toqquzaq nahiyelik pochtixanining dölet amanliq saqchi xadimigha téléfon qilduq. U özining wezipisidin pexirlen'gen halda söz qilip, muqimliqqa chétishliq xet-xaltilarni uchratqan haman ehwalni derhal teptish guruppisigha doklat qilidighanliqini bayan qildi. Uning eskertishiche, bir yüen 50 pungluq marka chaplan'ghan adettiki xetler alahide guman qozghimighuche tekshürülmeydiken, emma uningdin yuqiri bahaliq marka chaplan'ghan zakas xetler choqum tekshürülidiken. Bu xetler éghizi ochuq halette élip kélinishi shert iken, éghizi yemlen'gen zakas xetler bolsa, igisining xewirisiz halda échip tekshürülidiken.

Weziyettin xewerdar kishining déyishiche, mush yézisida mektuplirida mesile chiqip tutqun qilin'ghan we awarichilikke uchrighan 10 nechche kishining mektupliri türmilerge we ichkiridiki mekteplerge yollan'ghan bolup, ular, tewelikidiki köpligen kishiler qol téléfonliridin mesile chiqip késilip ketken bolghachqa, xet arqiliq alaqilishishini bixeter dep oylap qalghan, emma salam xetlirining dölet bixeterlik xadimliri teripidin échip tekshürülüp qélishni éhtimalliqi töwen dep qarap qalghan. Beziliri, özliri yazghan xetlerdiki bezi sözlerning “Sezgür” likini bilmey qalghan.

Mezkur dölet amanliq xadimi yene, türmilerge we mekteplerge yollan'ghan xetlerning nuqtiliq halda tekshürülidighanliqini eskertti.

Bu xadim mush yézisidin tutqun qilin'ghan nuriman'gül we turap tursunning salam xetliride konkrét qandaq mesile chiqqanliqi heqqide melumat bermidi. Emma mezkur yézidin 10 nechche kishining salam xétidin mesile chiqip tutulghanliqini inkar qilmidi we ulardin bir qismining nöwette jaza ötewatqanliqini delillidi.

Ilgiriki éniqlashlirimizdin melum bolushiche, xitay da'iriliri türkiye, qazaqistan we erebistan qatarliq 26 döletni “Sezgür” döletler katégoriyesige kirgüzginidek, bir qisim diniy puraqqa ige bolghan yaki milliy héssiyatni urghutidighan sözlerni “Sezgür sözler” katégoriyesige kirgüzgen. Ene shu “Sezgür döletler” ni ziyaret qilghan we téléfon söhbetliride “Sezgür sözler” ni qollan'ghan kishiler, 2017 ‏-yildiki chong tutqunda omumyüzlük halda tutqun qilin'ghanidi.