Amérika Uyghur birleshmisining 9-nöwetlik saylimi ötküzüldi

Muxbirimiz eziz
2019-10-28
Élxet
Pikir
Share
Print
Amérika Uyghur birleshmisining 9-nöwetlik saylimidin bir körünüsh. 2019-Yili 26-öktebir. Fayrfaks, amérika.
Amérika Uyghur birleshmisining 9-nöwetlik saylimidin bir körünüsh. 2019-Yili 26-öktebir. Fayrfaks, amérika.
RFA/Eziz

Amérika Uyghur birleshmisi dunyagha kelgen 1998-yilidin buyan birleshmining re'isi we re'is talliwalghan hey'et ezaliri mezkur birleshmining xizmitige yétekchilik qilishni dawam qildurup kelgen idi. Shuningdin buyanqi qerellik ötküzülüp kéliwatqan saylamda amérikadiki Uyghur muhajirlirining ixtiyariliq bilen bélet tashlishi arqiliq re'isler otturigha chüshken namzatlar arisidin saylinip kéliwatqan bolup, bu saylamning eng yéqinqisi bolghan 9-nöwetlik saylam 26-öktebir küni washin'gton'gha qoshna bolghan fayrfaks shehride ötküzüldi.

Saylam yighini bashlan'ghanda bu qétimqi yighinning riyasetchisi, 2019-yilliq saylam komitétining ezaliridin perhat bilgin aldi bilen bu qétimqi saylam pa'aliyitining küntertipi heqqide qisqiche melumat berdi. 

Saylam bashlinishtin awwal yillardin buyan dawam qilip kelginidek aldi bilen "Sherqiy türkistan marshi" qoyulghanda pütün zaldikiler ornidin turup marshqa hörmet bildürdi. 

Yighining küntertipi boyiche aldinqi nöwetlik amérika Uyghur birleshmisining sabiq mu'awin re'isi ömer qanat sözge chiqip, amérika Uyghur birleshmisining ötkenki xizmetlirini shuningdek bu jeryanda duch kelgen bezi muhim ehwallarni eslep ötti. U sözining axirida bu qétimqi saylam heqqide amérika Uyghurliri we bashqa jaylardiki Uyghur muhajirliri arisida barliqqa kelgen pikir ixtilapliri heqqidimu alahide chüshenche berdi. 

Ömer qanatning nutuqidin kéyin Uyghur dawasining közge körün'gen wekili, amérika Uyghur birleshmisining ikki qararliq sabiq re'isi rabiye qadir xanim sözge teklip qilindi. 

Rabiye qadir xanim sözide amérika Uyghur birleshmisining amérikadiki Uyghur jama'itige yétekchilik qilip, Uyghur dawasini amérika hökümitige anglitish hemde tégishlik yardemlerni élishta muhim rol oynap kelgen bir teshkilat ikenlikini alahide tekitlidi u yene özining amérika Uyghur birleshmisining buningdin kéyinki xizmetlirining téximu utuqluq bolushidin ümidwar ikenlikini bildürdi. 

Amérikagha eng deslep kelgen Uyghur ziyalilirining biri, amérika Uyghur birleshmisining tunji qétimliq re'isi doktur dolqun qembirimu sözge chiqip, birleshme qurulghan waqitlardiki ehwallar hemde birleshmining nizamnamiliri heqqide chüshenche berdi. 

Nutuqlardin kéyin yighin ehli amérika Uyghur birleshmisining sabiq re'isliridin rabiye qadir xanim, dolqun qembiri qatarliqlargha güldeste teqdim qilip, amérika Uyghur jama'itining xelq üchün xizmet qilghan péshqedemlirini untup qalmaydighanliqidek semimiy eqidisini ipadiligende pütün zal güldüras alqishqa toldi. 

Saylam resmiy bashlinishning aldida 9-nöwetlik re'islik saylimining namzati, "Uyghur igilik tikligüchiler" shirkitining diréktori quzzat altay sehnige chiqip, yighin ehlige özining re'is bolghandin kéyin qilmaqchi bolghan ishliri heqqide qisqiche chüshenche berdi. 

Quzzat altay sözining axirida özi tallap chiqqan mu'awin re'is we hey'et ezalirini köpchilikke tonushturup chiqti. 

Hey'et ezalirimu ayrim ayrim söz qilip, özlirining néme üchün bu qétimqi hey'et guruppisigha eza bolushni tallishi heqqide köpchilikke chüshenche berdi. Shuningdin kéyin bu qétimqi saylamgha kelgen amérika Uyghur jama'iti saylam namzati bolghan quzzat altaygha qoshulidighan yaki qoshulmaydighanliqini bildürüp, qolliridiki saylam bélitige belge urup, ashkara halda saylam sanduqigha bélet tashlidi. 

Bu qétimqi saylam komitétining ezaliri tashlan'ghan béletlerni sanap chiqqandin kéyin, saylam yighinining riyasetchiliridin Saylam komitétining ezasi Enwer memet saylamning axiriqi netijisini élan qildi. 

Amérika Uyghur birleshmisining yéngidin saylap chiqilghan re'isi quzzat altay köpchilikning özige ishen'genlikige öz teshekkürini bildürgendin kéyin washin'gton shehridiki Uyghur adwukat nuriy türkelning riyasetchilikide ay-yultuzluq kök bayraqning üstige élin'ghan "Qur'an" ni tutup turup, wezipe tapshuriwélish qesimini berdi. 

Saylamdin kéyin amérika Uyghur birleshmiside uzun yillar xizmette bolghan sabiq mu'awin re'is ömer qanatqa yighin ehli ton kiygüzüp, özlirining uninggha bolghan minnetdarliqini bildürgende zalda yene bir qétim qizghin chawak we alqish yangridi.

Saylam axirlashqandin kéyin biz saylamning aldi-keynide Uyghur jama'iti arisida belgilik ghulghula hem munazirige seweb bolghan saylamning waqti we saylam komitétigha munasiwetlik mesililer heqqide bu qétimqi saylam komitétining ezalirining pikrini soriduq. Saylam komitétining ezasi semet awut ependi ziyaritimizni qobul qilip, öz qarashlirini bayan qilip ötti.

Amérika Uyghur birleshmisining sabiq re'isi élshat hesen bu qétimqi saylamning aldida saylam komitéti ezaliri "Menpe'etler toqunushmasliq" pirinsipigha xilapliq qildi, dégen mezmunda awazliq bayanat élan qilip, özining bu qétimqi saylam komitétidin dergumanda ikenlikini bildürgen idi. 

Halbuki, semet awut ependi bu toghriliq söz qilip, "Emeliy ehwal undaq emes," dégenni yene bir qétim tekitlidi hemde özining "Bu qétimqi saylam adilliq asasida ötküzüldi," dep qaraydighanliqini bildürdi. 

Amérika Uyghur birleshmisining aldinqi nöwetlik hey'et ezaliridin jur'et obul ependini ziyaret qilip, bu qétimqi saylam we uning netijisi heqqide qandaq oylaydighanliqini sorighinimizda u özining bu saylamni "Qanunsiz" dep qaraydighanliqini tekitlidi. 

Saylamdin kéyin biz amérika Uyghur birleshmisining yéngi re'isi quzzat altayni ziyaret qilduq. U özining bu qétimqi saylam tüpeylidin Uyghur jama'iti arisida peyda bolghan pikir ixtilaplirini toghra chüshinidighanliqini shundaqla buni toghra hel qilip kétishke tirishidighanliqi heqqide qisqiche chüshenche berdi. 

Axirida saylamgha kelgen Uyghur jama'iti washin'gton shehridiki Uyghur imam enqer hajining bashlamchiliqida du'agha qol kötürüp, amérika Uyghur birleshmisining bundin kéyinki xizmetlirige utuq we netijiler tilidi. 

Bu qétimqi amérika Uyghur birleshmisining re'is we hey'et ezaliri üch yil wezipe öteydighan bolup, üch yildin kéyin qayta saylam ötküzüsh arqiliq kéyinki nöwetlik hey'et guruppisi saylap chiqilidiken.

Toluq bet