Uchturpan yamansu yézisidiki bir mektep mudiri: “Yer tewreshte yarilan'ghan oqughuchilirimizdin 7 nepirining ehwali éghir”

Washin'gtondin muxbirimiz shöhret hoshur teyyarlidi
2024.01.29
saqchi-yertewresh-aqchi Aqsu wilayiti üchturpan nahiyeside 7.1 Bal yer tewrigendin kéyin aqchi nahiyelik j x idarisining saqchiliri öyge kirip ehwal igilewatqan körünüsh. 2024-Yili 23-noyabir, aqchi
chinanews.com

Xitay da'iriliri Uyghur élidiki yer tewresh heqqide bergen xewerliride ösmür balilargha qiliwatqan “Xeyrxahliq” körünüshliri xéli bolsimu, emma balilarning ziyan-zexmetke uchrash ehwali heqqide héchqandaq uchur bermigen idi. Muxbirimizning yer tewresh eng éghir bolghan uchturpanning yamansu yézisigha qarita téléfon ziyaretliri dawamida, mezkur yézidiki bir yataqliq mektep binasining ziyan-zexmetke uchrighanliqi we oqughuchilirining yarilan'ghanliqi ashkarilandi. Mezkur mektepning bir xitay mudiri yarilan'ghan oqughuchilardin 7 nepirining ehwalining éghir ikenliki, 12 nepirining 29-yanwar küni saqiyip doxturxanidin chiqqanliqini tilgha aldi.

Xitay terepning yer tewresh heqqidiki xewerlirining choltiliqi we gumanliqliqi sewebidin, biz yer tewresh eng éghir yüz bergen uchturpan nahiyesining uchturpan baziri, imamlirim yézisi we yamansu yézisi qatarliq jaylargha téléfon qilip, apetning heqiqiy ehwali heqqide melumat élishqa tirishtuq.

Téléfon ziyaretlirimiz dawamida, uchturpandiki özini ashkarilashni xalimighan we weziyettin xewerdar kishilerdin biri, uchturpanning yamansu yézisidiki bir yataqliq bashlan'ghuch mektep binasining örülüp chüshkenlikidin xewer tapqanliqi, emma nahiyediki uchur qamalining qattiqliqi sewebidin, mekteptiki balilarning ziyan-zexmetke uchrash ehwalidin xewersiz qalghanliqini éytti. Tordiki matériyallarda körsitilishiche, yamansu yézisining 2018‏-yildiki nopusi 10 ming 95 neper bolup, yézida az dégende 3 bashlan'ghuch mektep, 1100 etrapida oqughuchi we 100 nechche oqutquchi bar iken.

 Téléfonimizni qobul qilghan bir bashlan'ghuch mektep mudiri, öz mektipidiki yarilan'ghan oqughuchilarning yaxshi dawalan'ghanliqi we 12 nepirining yarilirining saqiyip doxturxanidin chiqqanliqini ashkarilidi. Mezkur weziyettin xewerdar kishining inkas qilishiche, örülüp chüshken mektep binasining hajetxana témida ilgiri chong bir dez (yériq) bayqalghan bolup, mektep rehberliri ehwalni alaqidar orunlargha doklat qilghan bolsimu, mesile tekshürülmigen we rémont qilinmighan iken. Mezkur mektep mudiri, mektep binasining lifitining rémont qilin'ghanliqi we nöwette binaning oqutush üchün eslige keltürülgenlikini tilgha aldi. Weziyettin xewerdar kishi yene mezkur mektep binasi örülüp chüshkendin kéyin, binaning bixeterlikide mes'uliyiti bar dep qaralghan ayding kent sékrétari memet ayup bilen qara yulghun kent sékrétari jüme réhim qatarliqlarning wezipisidin élip tashlan'ghanliqini pash qilghan idi. Yuqiriqi mektep mudiri, binaning örülüshide mes'uliyiti bar dep qaralghanlarning tekshürülüwatqanliqi we jawabkarliqi bayqalghan teqdirde jazalinidighanliqini tilgha aldi.

Tor arxipliridiki matériyallarda bayan qilinishiche, qirghizistan bilen chégradash bolghan yamansu yézisi yer shekli we alahidilikliri sewebidin möldür apiti, kelkün apiti we yer tewresh apetliri pat-pat yüz bérip turidighan jay bolup, bina we yollarning bixeterlik qurulushi üchün ötkende mexsus qurulush pilani tüzülgen we 840 ming yüen xirajet ajritilghan iken. Bultur 10‏-ayda püttürülüp bolushi pilanlan'ghan bu türning emeliyleshken yaki emeliyleshmigenliki we yaki chala emeliyleshkenliki hazirche melum emes.

Mezkur mektep mudirining déyishiche, yarilan'ghan oqughuchilardin 7 nepirining ehwali éghir bolup, ulardin bezilirining méngisi zeximlen'gen iken.

 Hazirghiche éniqlashlirimizdin yamansu yézisida bir yataqliq mektep binasining örülüp chüshkenliki we az dégende 20 che oqughuchining yarilan'ghanliqi aydinglashqan bolsimu, oqughuchilardin ölgenlerning bar-yoqluqi hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.