Үрүмчидики сақчи хадимлири от апитидә ишиккә селинған қулупниң өлүм санини ашурғанлиқини етирап қилди

Мухбиримиз шөһрәт һошур
2022.11.28
Share on WhatsApp
Share on WhatsApp
urumchi-ot-apiti-24-noyabir.jpg
AP

Үрүмчидики хадимлар, от апитидики өлүм һадисисигә қулуплинишниң сәвәб болғанлиқини дәлиллиди.

Хитай даирилири 24-ноябир от апити һәққидә ачқан ахбарат йиғинида, от кәткән бина җайлашқан аһалиләр райониниң юқум категорийәси бойичә “йеник кесәл райони” икәнлики, бинадики аһалиләрниң сиртқа чиқип-кириш имкани барлиқини тилға алди, әмәлийәттә, иҗтимаий таратқулардики йүзләрчә син көрүнүшлиридин бинаниң пүтүн ишиклириниң қулуп селиқлиқ, һәтта паят қиливетиклик һаләттә икәнлики мәлум иди. Шуңа биз телефон зиярәтлиримиз давамида, бинаниң ишиклири һәққидә нуқтилиқ һалда соал соридуқ. Үрүмчидики бахуляң сақчихана хадими вәқә һәққидә, ахбарат йиғинидики учурларни асас қилишимизни вә иғва сөзләргә ишәнмәсликимизни тәвсийә қилиш билән бирликтә, өлгәнләр саниниң көпийип кетишидә, бинаниң ишиклириниң тақақ болушиниң һәл қилғуч рол ойниғанлиқини инкар қилмиди.

Бәхтйоли сақчихана хадими, өзиниң яридарларни қутқузуш үчүн бинаниң ичигә немә үчүн кирмигәнликини сориғинимизда “ишикләр тақақ” дәп җаваб бәрди. У бу һәқтә илгириләп сориған соаллиримизға җаваб беришни рәт қилди.

Хитайниң ахбарат йиғинида йәнә вәқәдә өлгәнләр сани 10, яридарлар сани 9 дәп билдүрүлгән. Әмма от ялқуни вә ис-түтәкниң 15-қәвәтни башлап 7 қәвәтни қаплиғанлиқидәк реаллиқни көрүп турған аһалиләр бу учурға қилчә ишәнмигән.

Үрүмчи 24-ноябир от апитидә еғир дәриҗидә көйүп кәткән егиз қәвәтлик олтурақ бинаниң оттин кейинки һали. Иҗтимаий таратқу син көрүнүши, 2022-йили 25-ноябир, үрүмчи.

Аһалиләрдин бири, бина ишиклириниң тақалғанлиқидәк реаллиқини йошурған хитай даирилриниң өлүм санини тәбиий һалда йошуридиғанлиқини баян қилди. У, дохтурхана саһәсидин аңлиғанлириға асасән, аз дегәндә 40 нәччә киши өлгәнликини тилға алди. Бу аһалә тәминлигән телефон номуриға асасән, яридарларни давалашқа қатнашқан мәлум бир дохтурхана хадимидин мәлумат соридуқ. У, өзи ишлигән бөлүмгә 5 яридарниң елип келингәнлики вә бәшиниңла сақиялмай җан үзгәнликини ашкарилиди. Башқа бөлүмләргә қанчилик яридар елип келингәнликини сориғинимизда, буниңдин хәвәрсизликини ейтти. Һөкүмәт елан қилған санға, һөкүмәт хадимлириниңму ишәнмигәнликини тилға алған бир хадим, аңлиғанлириға асасән, 9 кишиниң көйүп өлгәнлики, 10 нәччә кишиниң болса иста боғулуп өлгәнлики вә җәмий 26 киши өлгәнликини баян қилди.

Әһвалдин хәвәрдар мәзкур аһалиниң дейишичә, у от кәткән бинаға қошна бинада олтурушлуқ болуп, отта көйгәнләрниң пәрядлирини аңлап вә көрүп бәрдашлиқ берәлмигән, әмма ярдәм қилай десә өзлириниң ишики тақақ болғачқа, бинадин чиқалмиған. Бу хадимниң дейишичә, тәвәликтики биналарниң нормал ишиклиридин башқа, от апити йүз бәргәндә чиқип кетиш бекитилгән от бихәтәрлик ишиклири вә түңлүкләрму тақиветилгән. Униң үстигә бинаниң алдиға орнитилған яғач вә төмүр тосуқлар болуп, бу тосуқларни пачақлап ташлаш үчүнму от өчүрүш хадимлири саәтләп вақит сәрп қилған. Бинаниң алдидики машинилар 3 айдин бери һәйдәлмигән болғачқа, от алмиған вә бәзи машиниларниң игилири карантинда болғачқа, бу машиниларни йөткигилии болмиған, нәтиҗидә от өчүрүш машиниси бинаға йеқинлишалмай су шланкиси 15-вә 16-қәвәтләргә йәтмәй, отни тизгинлигини болмиған. Бу әһвални бир хитай аһалисиму тордики инкасида баян қилиду.

Инкас қилинишичә, от өчүрүш хадимлири, пәқәт бинаға узақтин су чечиш, әтрапқа машина йиғивелиш билән болған, әмма бинаниң ишикини тезидин чеқиш вә бесип киришкә урунмиған. Бәзи аһалиләр от хадимлириниң хәтәрдин қорққанлиқини баян қилса, йәнә бәзилири, ишикни ечишта, юқиридин йәни мәркәздин буйруқ күткәнликини илгири сүрди. 119 Җиддий қутқузуш қоманданлиқ мәркизи, от кетишниң сәвәби, отниң улғийиши вә өлүмниң көпийишидики сәвәб вә җавабкарлар үстидә тәкшүрүш елип бериливатқанлиқини мәлум қилди. Әмма, аһалиләр, бу от апити вә униң зиян-зәхмәтлиригә қамал сәвәб болғанлиқи вә җавабкарниң һәр дәриҗилик һөкүмәт икәнликини тәкитләшти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.