“Uyghur 2019 namliq” qanun layihisi amérika dölet mejliside maqulluqtin ötti
2019.12.03
Tüzitip yéngidin tonushturulghan “Uyghurlargha ige chiqish we dunyawi insanperwerlikning ortaq inkasi” yeni “Uyghur 2019 namliq” qanun layihisi 3-dékabir amérika dölet mejliside mutleq üstün awaz bilen maqulluqtin ötti.
Qanun layihesi awam palatasida 1 ge qarshi 407 awaz bilen maqulluqtin ötti.
Mezkur qanunning yene bir wariyanti yeni “Uyghur kishilik hoquq siyasiti qanun layihisi” kéngesh palata ezasi marko rubiyo qatarliqlar teripidin tonushturulup, bu yil 11- séntebir kéngesh palatasida maqulluqtin ötken idi.
Halbuki, bu nöwet tonushturulghan qanun layihesi awam palatasida ilgiri tonushturulghan “Uyghurlargha ige chiqish we dunyawi insanperwerlikning ortaq inkasi qanun layihisi” bilen kéngesh palatasida tonushturulup maqulluqtin ötken “Uyghur kishilik hoquq siyasiti qanun layihisi” biriktürülgen yéngi qanun layihisi hésablinidiken.
Qanun layihisi dölet mejliside 40 minut etrapida munazire qilindi we shu küni kech sa'et 7 din 12 minut ötkende qanunning maqulluqtin ötkenliki resmiy jakarlandi.
Qanun layihisi kelgüside kéngesh palatasida awazgha qoyulidu we kéngesh palatasida maqulluqtin ötkendin kéyin, prézidéntning imzalishigha yollinidu we prézidént imza qoyghandin kéyin resmiy qanun bolup maqullinidu.