Amérika dölet mejlis ezaliri "Uyghur 2019" qanun layihesining awam palatadin ötkenlikini qizghin tebriklidi

Muxbirimiz irade
2019-12-04
Élxet
Pikir
Share
Print

3-Dékabir küni, tüzitish kirgüzülüp yéngidin tonushturulghan "Uyghurlargha ige chiqish we dunyawi insanperwerlikning ortaq inkasi" yeni "Uyghur 2019 qanun layihesi" amérika awam palatasida 1 ge qarshi 407 awaz bilen maqulluqtin ötti. Qanun layihelirining bundaq köp san bilen awazdin ötüshi adette az körülidighan bolup, bu chet'ellerdiki Uyghur jama'iti we shundaqla Uyghurlarning weziyitige köngül bölüwatqan barliq kishilerni xursen qildi.

Amérika dölet mejlisining ezalirimu bu qanun layihesining awam palatadin ötkenlikini qizghin qarshi élip, tiwittirdiki resmiy hésabliri arqiliq tebriklirini yollidi.

Amérika dölet mejlisi ezasi will xurd (Will Hurd) tiwittirdiki bayanatida mundaq dégen: "Xitay dölet re'isi shi jinping we uning kommunist réjimi öz puqraliri bolghan Uyghurlarning islam kimlikini yoq qilish üchün ularni azab-oqubetlik lagérlargha qamidi. Bügün men barliq xizmetdashlirim bilen birge bu qanun layihesige awaz bérish arqiliq qorqunchluq zulumni eyibligenlikimdin pexirlinimen!"

3-Dékabir künidiki awaz bérishtin kéyin dölet mejlisi will xurdning ishxani'ismu mejlis tor bétide mexsus yazma bayanat élan qilghan. "Xurd xitayning kishilik hoquq zulumigha qarshi Uyghurlar bilen bir septe" mawzusida élan qilghan yazma bayanatta "Amérika awam palatasida maqulluqtin ötken 2019 Uyghur qanun layihesining xitay hökümitining Uyghurlargha qiliwatqan zulumini, milyonlarche kishini lagérgha solashtin ibaret éghir kishilik hoquq depsendichilikini jazalash yolidiki muhim qedemlerning biri", dep körsitilgen. Bayanatta mejlis ezasi will xurdning "Uyghurlargha qiliniwatqan bu zulumgha qarshi sözleshni dawamlashturidighanliqi hem shundaqla xitayning hakimmutleq réjimining amérika we pütün dunyagha bir xewp ikenlikini tonushturush üchün heriket qilidighanliqi" bayan qilin'ghan.

Bundin bashqa yene, amérika dölet mejlisi ezasi raja kirishnamorti (Raja Krishnamoorthi) tiwittirde özining xitay hökümitining Uyghurlargha yürgüzüwatqan zulumini eyibleydighan Uyghur qanun layihesini qollighanliqini bildürdi. U bu heqte tiwittirgha yollighan qisqa widiyosida töwendikilerni dégen: "Köpchilik, men hazir xitay hökümitining Uyghurlargha yürgüzüwatqan zulumini eyibleydighan qanun layihesige awaz berdim. Uyghurlar özining perqliq medeniyiti, kimliki we dini tüpeylidin xitay hökümiti teripidin biwasite we sistémiliq halda nishan'gha éliniwatidu. Biz ulargha qolimizdin kélishiche yardem qilishimiz kérek. Mejlisimizning bu qanun layihesini maqullishimu xitay hökümitining Uyghurlarni dunya xeritisidin yoq qilish herikitige qarshi turushtin ibaret" dep izahat bergen.

Dölet mejlis ezasi andrey karson (André Carson) tiwittirdiki inkasida mundaq dégen: "Amérika dölet mejlisidiki her ikki partiyedin bolghan ezalarning xitay hökümitining Uyghur musulmanlirigha qiliwatqan qobul qilghusiz depsendichilikini eyiblesh yolida birleshkenlikini körüp tolimu söyündüm. Amérika barliq kishilerning hoquqi üchün des turushi kérek".

Amérika dölet mejlis ezasi don béyér (Don Beyer) tiwittir arqiliq yuqiridiki bu qanun layihesining maqullan'ghanliqini qarshi alghan. U mundaq dégen: "Xitay hökümiti Uyghurlargha qorqunchluq zulum qilip keldi. Amérika xitayda kishilik hoquq üchün yenimu köp ishlarni qilishi kérek. Men Uyghur qanun layihesini qollap awaz berdim".

Mezkur qanun layihesini tonushturushta rol oynighan dölet mejlis ezasi téd yoxomu

(Ted Yoho) Tiwittirdiki inkasida xitay hökümitining Uyghurlargha qiliwatqan zulumining choqum dunya teripidin étirap qilinishi kéreklikini eskertti we qanun layihesining awam palatadin ötkenlikini tebrikligen.

Dölet mejlis ezaliridin élis sitifanik (Elise Stefanik) we jénnifér wekstonlarmu (Jennifer Wexton) ayrim-ayrim tiwittirda inkas qayturup özlirining bu qanun layihesige awaz bergenlikidin tolimu pexirlinidighanliqini ipade qilghan we "Xitay özining Uyghurlar we bashqa musulman milletlerge qiliwatqan zulumining jazasiz qalmaydighanliqini tonup yétishi kérek" dégen.

Dölet mejlis ezasi téd bad (Ted Budd) inkasida özining mezkur qanun layihesige awaz bergenlikidin iptixarlinidighanliqini ipade qilghan we "Biz bundaq kishilik hoquq depsendichiliklirining jawabkarliqqa tartilmay ötüp kétishige yol qoymasliqimiz kérek" dep eskertken.

Awam palata ezasi bil paskirl (Bill Pascrell) bu heqtiki inkasida "Axsham amérika dölet mejli'isi mutleq köp sanni teshkil qilghan awaz arqiliq xitay hökümitige uning insan ghururigha qiliwatqan depsendichiliki we hazirqi zamandiki gulag lagérlirigha qarap turmaydighanliqi heqqide küchlük signal berdi" dégen.

Awam palata ezasi adam simis (Adam Smith) qanun layihesining maqullinishini tiwittirda: "Bügün amérika dölet mejlisi xitay hökümitini Uyghurlar we bashqa milletlerge qiliwatqan zulumi üchün jawabkarliqqa tartidighan qanun layihesini maqullidi. Amérika kishilik hoquqqa qiliniwatqan zulumgha qarshi turushta her da'im rehberlik rol oynishi kérek" dégen sözler arqiliq tebriklidi.

Kéngesh palata ezasi koriy gardnér (Cory Gardner) tiwittirdiki uchurida "Biz insaniy pezilet we tüp insan hoquqini yaqlighanliqimiz üchün xitay amérika mu'essesilirige cheklime qoyush arqiliq bizdin öch almaqchi boluwatidu. Emma ular bizni qorqutalmaydu. Biz xongkongluqlarning mutleq aptonomiyesi we xitayning mejburiy emgek lagérlirigha qamalghan milyonlighan Uyghur üchün dawamliq heriket qilimiz" dédi.

Tiwittirda yene rob witmen (Rob Wittman) we téd déuch (Ted Deutch) qatarliq awam palata ezalirimu Uyghur qanun layihisining awam palatada köp sanliq awazgha érishkenlikini qarshi aldi.

"Uyghur 2019" qanun qanun layihisining awam palatada mutleq köp awaz bilen maqullinishi kishilik hoquq organliri we Uyghurlar üchün pa'aliyet körsitip kéliwatqan ilim erbabliri we kishilik hoquq aktiplirining qizghin alqishigha érishti.

Toluq bet