Yawropa Uyghur akadémiyesi gérmaniyede yazliq tetillik dala pa'aliyiti ötküzdi

• Bérndin ixtiyariy muxbirimiz hebibulla izchi teyyarlidi
  2023-08-04

Yawropa Uyghur akadémiyesi bu yil 7-ayning 30-künidin 8-ayning 4-künigiche gérmaniyening rayin-palatini shitatidiki mozél deryasi boyigha jaylashqan hatzénport sayahet rayonida bir heptilik dala pa'aliyiti ötküzdi.

Bu qétimliq pa'aliyet, yawropa Uyghur akadémiyesige eza bolghan Uyghur a'ililer we ularning perzentliri üchün öz'ara uchrishish pursiti yaritish؛ öz'ara chüshinish we pikir almashturushni chongqurlashturush؛ bolupmu Uyghur perzentliri arisidiki dostluq hem qérindashliq rishtisini chingitishni asasliq meqset qilghan iken.

Melumki, yawropadiki herqaysi döletlerde melum kölemde we mu'eyyen sanda Uyghur jama'iti yashawatqan bolup, ular türlük tillarda sözlishidighan milliy döletlerde tarqaq olturaqlashqanliqi, öz ara dawamliq uchriship turush mumkinchilikining bolmasliqi qatarliq sewebler tüpeylidin ikkinchi ewlad Uyghur perzentliri arisida melum perq we ariliqlar shekillinishke bashlighan. Shu sewebtin yawropa Uyghur akadémiyesi özlirige eza a'ililer, bolupmu perzentlerning öz'ara uchrishishigha shara'it hazirlap bérish üchün bu qétimliq yazliq tetillik dala pa'aliyitini uyushturghan.

Bu qétim gérmaniyede ötküzülgen bu 5 künlük pa'aliyetke shiwétsariye, firansiye, gérmaniye, en'gliye, bélgiye, gollandiye, shiwétsiye we kanada qatarliq döletlerdin bolup, 15 a'ile, 60 qa yéqin kishi qatnashqan.

Mezkur pa'aliyet jeryanida yawropa Uyghur akadémiyesining re'isi doktor abdushükür abduréshitning riyasetchilikide bir qatar ilmiy we ijtima'iy témidiki muhakimiler hem pikir almashturushlar bolup ötken. Yeni penni omumlashturush sahesi boyiche köpchilikke doklat bérilgen, uchur bixeterliki heqqidiki tewsiyeler otturigha qoyulghan. Uningdin bashqa yérim ‍ötküzgüch sahesidiki yéngi tereqqiyatlar we bashqa nazuk we yuqiri téxnika sahesidiki eng yéngi tereqqiyatlar heqqidimu muhakimiler bolup ötken. Shuning bilen bir waqitta, yawropa Uyghur akadémiyesi élip bériwatqan nishanliq terbiyelesh pirogrammisining ehwali we mushu qétimliq pa'aliyetke qatnashqan nishanliq terbiyelesh pirogrammisidiki oqughuchilarning tesiratliri anglap ötülgen. Axirida yawropa Uyghur ansambilining xizmetliri we buningdin kéyinki nishani heqqidiki doklat anglap ötülgen.

Bu munasiwet bilen yawropa Uyghur akadémiyesining re'isi doktor abdushükür abduréshit radiyomizning mexsus ziyaritini qobul qilip, bu qétimqi pa'aliyet toghrisida melumat bérip ötti. U bu qétimqi pa'aliyet jeryanida, yawropa Uyghur akadémiyesi nishanliq terbiyelewatqan oqughuchilarning öginish ehwali we qolgha keltürgen netijilirining alahide doklat qilin'ghanliqini tekitlep ötti.

Bu qétimliq pa'aliyet jeryanida yene Uyghur perzentlirige ussul meshiq qildurush, dutar chélishni öginish qatarliq mezmunlardiki edebiyat-sen'et pa'aliyetlirimu orunlashturulghan. Dala sayahiti dawamida kechlik tamaqtin kéyin köngül échish pa'aliyetliri uyushturulup, yash-ösmürlerge Uyghur sen'iti, medeniyiti we örp-adetliri tonushturulghan. Bu qétimliq pa'aliyetke qatnashqan yashlar guruppisi sherqiy türkistanning tarixi, jughrapiyesi, Uyghur yémek-ichmek medeniyiti we Uyghur sen'iti heqqide mexsus doklat teyyarlap, bu qétimliq dala pa'aliyitining yépilish künide köpchilikke teqdim qilghan.

Doktor abdushükür abduréshit bu heqtimu tepsiliy melumat berdi. Bolupmu bu qétimliq dala pa'aliyitige qatnashqan yashlar we balilarning Uyghur medeniyiti, sen'iti we örp-adetliri toghriliq tepsiliy bilim alghanliqini eskertip ötti.

Yawropa Uyghur akadémiyesining bu qétimliq dala pa'aliyitige en'gliyedin kélip qatnashqan doxtur exmetjan polat ependimmu öz tesiratlirini bayan qilip ötti.

Bu qétimliq dala pa'aliyitige qatnashqan yawropa Uyghur akadémiyisining bash katipi yasin ultashmu ziyaritimizni qobul qilip, 5 künlük dala pa'aliyitining tolimu köngüllük we mol mezmunlar bilen ötkenlikini, yawropadiki herqaysiy döletlerde tarqaq yashawatqan Uyghur a'ililiri üchün bir qétimliq uchrishish pursiti bolghanliqini, shundaqla bu pa'aliyette peqetla Uyghur tilida sözlishishni asas qilip pa'aliyet qilghanliqini, pa'aliyet jeryanida Uyghur medeniyet-sen'iti we sherqi türkistanning tarixi-jughrapiyesi tonushturulghanliqini éytip ötti.

Bélgiyedin bu qétimqi pa'aliyetke qatnashqan adile adil isimlik qizmu özining bu qétimqi pa'aliyet heqqidiki tesiratlirini bayan qilip ötti.

Yépilish murasimida yawropa Uyghur akadémiyesining re'isi doktor abdushükür abdurishit söz qilip, bu pa'aliyetni teshkilleshte alahide küch chiqarghan exmetjan polat bilen yasin ultashqa, yawropa Uyghur ansambilining yétekchisi muxter janbazgha, 5 künlük dala pa'aliyiti jeryanda yémek-ichmekke mes'ul bolghan perhat ustam we bashqa méhnetkesh anilargha alahide rehmitini bildürgen. Axirida bu qétimliq dala pa'aliyitige qatnashqan oqughuchilargha sherep guwahnamisi tarqitip bérilgen we xatire süretke chüshken.