Abdulhemit qaraxan Uyghur akadémiyesi wexpisining yéngi nöwetlik re'islikige saylandi

Uyghur akadémiyesi wexpisining nizamnamisi boyiche, wexpining re'isi doktor meghpiret kamalning re'islik wezipe mudditi toshqan bolup, 2024-yili 8-ayning 17-küni istanbuldiki wexpe ishxanisida yéngi nöwetlik re'is saylimi ötküzülgen. Saylamda abdulhemit qaraxan köp sanliq awaz bilen Uyghur akadémiyesi wexpisining yéngi bir nöwetlik re'isi bolup saylan'ghan.

Saylamgha Uyghur akadémiye wexpisining bash teptishi doktor ablet uyghar ependi riyasetchilik qilghan.

Ablet uyghar ependining bildürüshiche, bu qétimliq saylam yighinigha Uyghur akadémiyesi wexpisining türkiyede turushluq hey'et ezalirining köp qismi qatnashqan. Saylam wexpe nizamnamisige asasen yoshurun awaz bilen démokratik usulda élip bérilghan. Saylam yighin'gha yene Uyghur akadémiyesining re'isi, doktor rishat abbas ependi, akadémiye bash meslihetchisi piroféssor alimjan inayet ependi, akadémiye bash teptishi doktor memet émin ependi, xitay tetqiqati institutining mudiri ilshat hesen ependi we Uyghur akadémiyesining bashqa döletlerdiki tarmaqlirining re'isliri tor arqiliq qatnashqan.

RFA/Arslan

Uyghur akadémiyesi wexpisining re'is wekili bolup saylan'ghan ablet uyghar ependi, bu saylam toghrisida toxtilip ötti: “Bélet tashlash netijiside abdulhemit qaraxan ependi 21 kishining qoshulushi we 2 ikki kishining qarshi bélet tashlishi bilen Uyghur akadémiyesi wexpisining re'isi bolup saylandi. Abdulhemit qaraxanning re'islik wezipisi élan qilin'ghandin kéyin, u 11 kishilik resmiy hey'et, 11 kishilik zapas hey'et, üch kishilik resmiy nazaret hey'iti we üch kishilik zapas nazaret hey'itidin teshkil tapqan 28 kishilik bashqurush hey'itini teshkillep chiqti.”

Ablet uyghar ependining bildürüshiche, Uyghur akadémiyesi wexpisining bashqurush hey'itide ablet uyghar re'is wekillik wezipisini, doktor meghpiret kamal mu'awin re'islik wezipisini, doktor perhat qeshqerli bash katipliq wezipisini, piroféssor doktor alimjan inayet bash teptishlik wezipisini üstige alghan.

Igilinishiche, Uyghur akadémiyesining re'isi, tonulghan tébbiy dorigerlik alimi doktor rishat abbas ependi échilish sözide, Uyghur akadémiyesi wexpisining yéqinqi yillardiki muweppeqiyetlirini mu'eyyenleshtürüp ötken. U yene wexpining sabiq re'isi doktor meghpiret kamal xanimning akadémiye wexpisi üchün qilghan xizmetlirige rehmet éytqan, shundaqla abdulhemit qaraxan ependini yéngi re'islik wezipisi üchün tebrikligen.

Saylam axirida, Uyghur akadémiyesining re'isi doktor rishat abbas, akadémiye aliy meslihetchisi piroféssor alimjan inayet we wexpining sabiq re'isi doktor meghpiret kamal xanim bashchiliqidiki yighin qatnashquchiliri, abdulhemit qaraxan ependini yéngi re'islik wezipisi üchün tebrikligen we uning qilmaqchi bolghan xizmetlirige utuq tileshken.

Ziyaritimizni qobul qilghan abdulhemit qaraxan ependi, Uyghur akadémiyesi wexpisining buningdin kéyin qilmaqchi bolghan xizmet pilanliri toghrisida toxtilip mundaq dédi: “Nöwette Uyghur akadémiyesi wexpisining qurulmisini téximu yaxshilash meqsitide 17-awghust küni 28 kishilik bashqurush hey'iti qurup chiqtuq, bu hey'etlerni 5 bölümge bölüp xizmet layihelirini tüzüp ishqa kirishiwatimiz, Uyghur akadémiyesi wexpisi buningdin kéyin bash akadémiyening türkiyediki xizmetlirige mes'ul bolush bilen birge asasliqi yashlirimizning örlep oqushi, yash ösmürlerning ana til we mektep derslirige yardem bérish, Uyghur yashlirini sherqiy türkistan milliy kürishide uzun muddet terbiyelesh, enqerede lobyichliq pa'aliyetlerni kücheytish we Uyghurlar heqqide tetqiqat hem terjime xizmetlirige ehmiyet bérish qatarliq Uyghurlar üchün paydiliq bir qatar xizmetlerni qilish heqqide hey'etler bilen meslihet élip barduq, bu heqte xizmetlirimizni bashliduq”.

Abdulhemit qaraxan ependining bildürüshiche, Uyghur akadémiyesi wexpisi 2009-yili qurulghan Uyghur akadémiyesining türkiyediki tarmiqi hésablinidiken, Uyghur akadémiyesi wexpisi 2021-yili qurulghandin biri, asasliqi enqerede lobiychiliq pa'aliyiti élip bérish, tetqiqatchi we taratqulargha Uyghurlar heqqide melumat bérish we Uyghur yashlirini terbiyelesh pa'aliyetlirini qilip kelmekte iken.