Uyghur yigiti dilmurat mijitof xitayda ötken boks dunya musabiqiside kümüsh médalgha érishti

Dilmurat mijitof(soldin birinchi) sepdashliri bilen xatire sürette. 2019-Yil, öktebir.

Musabiqidin qaytip kelgen qazaqistan boks komandisi trénér dolqun kamékof (ongdin üchinchi) bilen. 2019-Yil 28-öktebir, almuta.

Ammiwi axbarat wasitiliridin melum bolushiche, 18 we 27-öktebir ariliqida xitayning wuxen shehiride 7-nöwetlik herbiy tenheriket musabiqiler bolup ötti. Uninggha qazaqistanliq tenheriketchilermu qatnashti.

Mezkur herbiy tenheriket musabiqiler 1948-yili xelq'ara herbiy tenheriket kéngishi teripidin teshkillen'gen bolup, uninggha tenheriketning her xil türliri boyiche musabiqiler ötmektiken. Bu qétimqi musabiqige qazaqistanning boks komandisimu ishtirak qilip, 7 médal, shu jümlidin 2 altun, 2 kümüsh we 3 mis médal yéngiwélip, omumiy hésabta qazaqistan komandisi 12-orun'gha kötürülgen. Igilishimizche, qazaqistanliq bokschilar qatarida Uyghur yigiti dilmurat mijitof 64 kilogram salmaqta kümüsh médalgha érishken.

Bir qatar sheherlik, jumhuriyetlik, xelq'ara musabiqilerning ghalibi dilmurat mijitof radiyomiz ziyaritini qobul qilip, mundaq dédi: “Birinchi qétim 2017-yili ‛astana arlans‚ kulubi chémpiyon bölüm. Axirqi yekmu-yekte kubaliqlarni yéngiwalduq. Shu waqitta men birinchi qétim dunya chémpiyoni boldum. Emdi bu qétimda musabiqige boks boyiche 50 millet qatnashti. Men birinchi yekmu-yekte özbékistanliq, ikkinchiside wénézu'éla, kéyinkiside ezerbeyjan, andin aljiriyelikni yéngiwaldim. Axirqisida bélorus bokschisidin yéngilip qaldim.”

Dilmurat mijitof 1995-yili almuta wilayiti Uyghur nahiyesining chonja yézisida dunyagha kelgen. Kéyin a'ilisi bilen almuta shehirining aqbulaq mehellisige kélip orunlashqan. 2013-Yili sheherning dostluq mehellisidiki abdulla rozibaqiyéf namidiki 153-mektep-gimnaziyeni, andin 2017-yili tenheriket akadémiyesini tamamlighan. Dilmurat boks bilen 12 yéshidin tartip boks boyiche tenheriket mahiri dolqun kamékofning rehberliki astida shughullinip kelmekte.

Dilmurat mijitof wexen shehiride bolup ötken musabiqidin qattiq tesirlen'genlikini otturigha qoyup, yene mundaq dédi: “Elwette, xushal boldum. Ömrümdiki eng chong musabiqilerning biri boldi. Bir tereptin, özümning étini, bizning Uyghurimizning namini dunyagha tonuttum dep oylaymen. Kélechekte olimpik oyunlirigha qatnishish meqsitim bar. Trénérim dolqun kamékofqa rehmet éytimen. Men bokschilardin birinchi nöwette Uyghurlarning dangqini kötürgen merhum abduréshit abdraxmanofni ülge tutimen. Mushu kishi oxshash bolghum kélidu.”

Biz dilmurat mijitofning trénéri dolqun kamékof bilen alaqileshtuq. U mundaq dédi: “Dilmurat mijitof 15 yil burun meshiqlinishke kelgen. Bu yili u qazaqistan boyiche ötken musabiqide chémpiyon boldi. Emdi mana wuxenda ikkinchi orun élip keldi. Kélechekte mushu dékabir éyida qarighanda shehiride olimpik oyunigha qatnishishqa yollanma élish üchün musabiqe bolidu. Dilmurattin bashqa yene roziyéf na'il, toxtasun resul oxshash yash bokschilirimiz chiqiwatidu. Bultur dilmuratqa xelq'ara tenheriket mahiri dégen ataq bérildi.”

Dolqun kamékofning boks kulubi 2008-yildin ishlewatqan bolup, köpligen boks mahirlirini teyyarlap chiqqan. Bügünki künde uningda 40 qa yéqin yash bokschi meshiqliniwatmaqta. Dolqun kamékof buningdin tashqiri tenheriket boyiche aliy mektepte chong trénér wezipisini atqurmaqtiken. Uning déyishiche, yash bokschilar asasiy jehettin hökümet teripidin xirajet bilen teminlinidiken. Bezi waqitlarda dunya musabiqilirige qatnishish üchün hamiylarmu jelp qilinidiken.

Eyni waqitlarda qazaqistanliq tenheriketchiler ichidin dangliq bokschilarning yétilip chiqqanliqi melum. Shularning biri sowét ittipaqi boyiche ikki mertem chémpiyon atalghan, amérika, yawropa, afriqada ötken xelq'ara musabiqilerning ghalibi, dangliq bokschi we tonulghan kino artisi abduréshit abdraxmanoftur. Uning ismi hazir peqet qazaqistandila emes, belki dunyagha tonulghan. U xelq'ara tenheriket mahiri dégen ataqqa ige bolghan tunji qazaqistanliqtur. Abduréshit abdraxmanof mushu yili may éyida 73 yéshida alemdin ötti.

Yéqinda almuta wilayitining qarasay nahiyeside abduréshit abdraxmanof xatirisige béghishlan'ghan yash ösmürler arisida boks boyiche musabiqe bolup ötti. Jumhuriyetlik Uyghur étno-medeniyet merkizining almuta sheherlik shöbisi uyushturghan mezkur musabiqige qatnashqan merhumning sepdashliri we dostliri abduréshit abdraxmanofning qazaqistan tenherikitining tereqqiyatigha qoshqan töhpisini yuqiri bahalidi.

Ziyaritimizni qobul qilghan qazaqistanning boks boyiche xizmet körsetken trénéri rehim sidiqof ependi mezkur xatire murasimi heqqide toxtilip, mundaq dédi: “Özbékistandin, qirghizistandin bolup 160 bokschi keldi. Kelgen méhmanlar arisida deslepte amérikagha bille barghan jandos kukumof boldi. Yene köpligen akadémiklar, proféssorlar boldi. Almuta hakimiyitidinmu keldi. Ular chong rexmitini éytti. Hazir xet yézip qoyduq. Almutada kochigha we mektepke namini qoyush toghriliq. 17 Adem imzasini qoydi. Xetni prézidént qasim-jomart toqayéfqa yazduq.”

Rehim sidiqofning éytishiche, abduréshit abdraxmanof eyni waqitlarda qazaqistanning dangqini peqet sowét ittipaqidila emes, belki dunyagha chiqarghan iken. Hazir uning ishini shagirtliri dawam qiliwatqan bolup, ularmu chong utuqlargha érishmektiken.