Asiya yash-ösmürler boks musabiqiside ikki Uyghur qizi mis médalgha érishti

Yash-ösmürlerning asiya boks musabiqisige qatnashqan qazaqistanliq tenheriketchiler (ongdin ikkinchisi mis médalgha erishken Uyghur qizi elanur turghanowa). 2021-Yili awghust. Dubey.

Ammiwi axbarat wasitiliridin melum bolushiche, 17-awghusttin 30-awghustqiche ereb birleshme xelipilikining eng chong shehiri dubayda yashlar we ösmürlerning asiya boks musabiqisi bolup ötken. Uninggha 2003- we 2004-yilliri tughulghanlar yashlar guruppisigha, 2005- we 2006-yilliri tughulghanlar ösmürler guruppisigha bölünüp, oghul we qizlar bolup, jem'iy 51 yéngi chémpiyonning chiqishi mölcherlen'gen. Shuning ichide bolupmu qazaqistan, özbékistan we hindistandin eng köp tenheriketchiler qatnashqan.

22-Awghustta “Délowoy qazaqistan” axbarat agéntliqida élan qilin'ghan “Boks boyiche asiya yashlar musabiqisini qazaqistanliq qiz ghalibiyet bilen bashlidi” namliq maqalining béshida elenur turghanowaning tajikistanliq riqabetchisini yenggenliki xewer qilin'ghan. Qizlar arisida u 46 kilogram salmaqta tajikistan wekili yokubowani tiz püktürgen.

Igilishimizche, mezkur musabiqide qazaqistan omumen 49 médalgha ériship, médal sani boyiche birinchi, özbékistan ikkinchi, hindistan üchinchi orunni igiligen.

Biz dubayda ötken boks boyiche asiya musabiqisi toghriliq tepsiliy melumat élish üchün bir nechche kün mabeynide shu musabiqining shahiti bolghan, almuta wilayitining emgekchiqazaq nahiyesige qarashliq qoram yézisining turghuni, jumhuriyetlik “Asiya bügün” gézitining bash muherriri, sha'ire tashgül héziyarowa bilen alaqileshtuq. Tashgül héziyarowa ene shu musabiqide özining tunji ghalibiyiti bilen wetendashlirini, sepdashlirini rohlandurghan elenur turghanowaning momisidur.

Tashgül héziyarowa xanimning éytishiche, mezkur musabiqe ereb birleshme xelipilikining boks birleshmisi teripidin uyushturulup, uninggha 20ge yéqin döletning tenheriketchiliri qatnashqan.

U mundaq dédi: “Ularni dubayda intayin yaxshi kütüwaldi. Musabiqe intayin zor derijide ötti, désem xatalashmaymen. Chünki musabiqige ereb elliri tügel qatnashti. Yashlar yaxshi teyyarliq qilghan. Asasen hindistan bilen özbékistanning yashliri küchlük chiqti. Shularning arisida bizning tenheriketchilirimiz 19 altun, 15 kümüsh we 15 mis médalgha ige boldi. Shuning bilen erebistanning boks boyiche birleshmisining bashliqi qazaqistan tenheriketchilirige intayin yuqiri baha berdi”.

Tashgül héziyarowaning éytishiche, qazaqistanliq bokschilarning chong utuqlargha yétishige bolupmu tonulghan trénérlar éldos saydalin, qayrat séyitjan, arkadiy tapayéf, shuningdek almuta shehiridiki “Dinamo” chéniqish-tenheriket jem'iyitining trénéri rehim sadiqoflar chong küch chiqarghaniken. 30-Awghustta musabiqe netijiliri chiqirilip, uning ghalipliri médallar we maddiy soghilar bilen teqdirlen'geniken.

U mezkur musabiqige köpinche mexsus boks kulublirida terbiyelinip chiqqan yashlarning qatnashqanliqini otturigha qoyup, yene mundaq dédi: “Balilarning hemmisi chong tenheriket mektepliridin kelgen. Shular ichide qoram mektipining oqughuchisi elenur turghanowamu qatnashti. U 15 yashta. Eng kichiki elenur boldi. Yash-ösmür qizlarning karwan béshini elenur bashlap chiqti. Elenur tajikistanning qizini yenggendin kéyin bizning qizlar keyni-keynidin yéngishke bashlidi. Elenurning mektepte trénéri semet exmétofning qolida teyyarlinip, shu yerdin shunchilik chong derijidiki musabiqige qatnishishning özi chong utuq boldi”.

Xulase sözide tashgül héziyarowa elenur turghanowaning dunya musabiqisige qatnishishini pütkül almuta wilayitide yashawatqan Uyghurlarning qollap-quwwetligenlikini, hetta bezi milletperwer shexslerning maddiy jehettin yardem körsetkenlikini, elenurning dubaydiki utuqining köpchilikni qattiq xushal qilghanliqini alahide tekitlidi hem barliq qollighuchilargha cheksiz minnetdarliqini izhar qildi.

Radiyomiz ziyaritini qobul qilghan elenur turghanowaning trénéri semet exmétof ependi mundaq dédi. “Chong asiya musabiqiside mis médal aldi dégen bu méning üchün chong netije. Elenur üchünmu shundaq dep oylaymen, sewebi u téxi kichik. Bu utuq uning manglay teri bilen keldi, chünki u toxtimay meshiqlendi, teyyarliq qildi. Shundaqla uninggha uruq-tughqanlirimu yardem berdi, qollidi. Kélechektimu érinmey emgek qilip, tirishidighan bolsa, parizhda bolidighan olimpik oyunlirighimu yétip baridu, dep oylaymiz. Méning shagirtlirim ichide mundaq utuqqa yétishken ene shu birla elenur. Qazaqistan boyiche chémpiyon bolghan balilirim bolsimu, emma ular asiya musabiqisi oxshash chong musabiqilerge ötelmidi. Shuning üchün elenurdin ümid qiliwatimiz”.

Ziyaritimizni qobul qilghan “Dinamo” chéniqish-tenheriket jem'iyitining trénéri, qazaqistanning xizmet körsetken trénéri rehim sadiqof mundaq dédi: “Hazirqi waqitta ulargha chong ümidler artiliwatidu, yeni parijda bolidighan yashlar arisidiki olimpik oyunlirida boks boyiche qatnishidighan balilarning tizimi qarap chiqiliwatidu. Biz kem dégende ikki-üch balini tallaymiz. Shundaqla biz dubaydiki musabiqige aktip qatnashqan qizlirimizdinmu olimpik oyunlirigha tallaymiz, dep oylaymen. Shuning üchün ularni teyyarlash ishlirigha chong diqqet bölüshimiz lazim. Shuningdek ularning özlirimu köp tirishishi kérek. Dubaydiki musabiqige qatnashqan ikki Uyghur qizi, yeni elenur turghanowa we shaxnaz isayéwa mis médalgha érishti. Bu yaxshi körsetküch, dep oylaymen.”

Igilishimizche, elenur turghanowa mushu yilning otturilirida sérbiyede ötken boks boyiche xelq'ara musabiqige qizlardin qatnashqan birdin-bir qazaqistanliq iken. U mezkur musabiqide üchinchi orunni igilep, qazaqistanliq boks mahirlirining diqqitini tartqanidi. U yéqinda boks boyiche tenheriketning kandidat mahiri derijisige érishken. Elenur turghanowa qoram ottura mektipining 10-sinip oqughuchisi, mektep elachilirining biri, yurtining pexri.

Dubayda ötken asiya musabiqisige yene bir Uyghur qizi shaxnaz isayéwa qatniship, üchinchi orun'gha érishken. Qazaqistanning ikki mertem chémpiyoni shaxnaz isayéwa sekkiz yéshidin tartip boks bilen shughullanmaqtiken. U boks boyiche tenheriket mahiri.

Melumatlargha qarighanda, qazaqistanda tenheriketning her xil türliri boyiche közge körünüp kéliwatqan Uyghur qizliri köp bolup, shularning arisida rano parxatowa, adilem hoshurowa, gülminem iminowa, aminem meshürowagha oxshash tenheriketchilerdin chong ümidler kütülmekte.