Асия яш-өсмүрләр бокс мусабиқисидә икки уйғур қизи мис медалға еришти

• Ихтиярий мухбиримиз ойған
  2021-09-03

Аммиви ахбарат васитилиридин мәлум болушичә, 17-авғусттин 30-авғустқичә әрәб бирләшмә хәлипиликиниң әң чоң шәһири дубайда яшлар вә өсмүрләрниң асия бокс мусабиқиси болуп өткән. Униңға 2003- вә 2004-йиллири туғулғанлар яшлар гурупписиға, 2005- вә 2006-йиллири туғулғанлар өсмүрләр гурупписиға бөлүнүп, оғул вә қизлар болуп, җәмий 51 йеңи чемпийонниң чиқиши мөлчәрләнгән. Шуниң ичидә болупму қазақистан, өзбекистан вә һиндистандин әң көп тәнһәрикәтчиләр қатнашқан.

22-Авғустта “деловой қазақистан” ахбарат агентлиқида елан қилинған “бокс бойичә асия яшлар мусабиқисини қазақистанлиқ қиз ғалибийәт билән башлиди” намлиқ мақалиниң бешида әләнур турғанованиң таҗикистанлиқ риқабәтчисини йәңгәнлики хәвәр қилинған. Қизлар арисида у 46 килограм салмақта таҗикистан вәкили йокубовани тиз пүктүргән.

Игилишимизчә, мәзкур мусабиқидә қазақистан омумән 49 медалға еришип, медал сани бойичә биринчи, өзбекистан иккинчи, һиндистан үчинчи орунни игилигән.

Биз дубайда өткән бокс бойичә асия мусабиқиси тоғрилиқ тәпсилий мәлумат елиш үчүн бир нәччә күн мабәйнидә шу мусабиқиниң шаһити болған, алмута вилайитиниң әмгәкчиқазақ наһийәсигә қарашлиқ қорам йезисиниң турғуни, җумһурийәтлик “асия бүгүн” гезитиниң баш муһәррири, шаирә ташгүл һезиярова билән алақиләштуқ. Ташгүл һезиярова әнә шу мусабиқидә өзиниң тунҗи ғалибийити билән вәтәндашлирини, сәпдашлирини роһландурған әләнур турғанованиң момисидур.

Ташгүл һезиярова ханимниң ейтишичә, мәзкур мусабиқә әрәб бирләшмә хәлипиликиниң бокс бирләшмиси тәрипидин уюштурулуп, униңға 20гә йеқин дөләтниң тәнһәрикәтчилири қатнашқан.

У мундақ деди: “уларни дубайда интайин яхши күтүвалди. Мусабиқә интайин зор дәриҗидә өтти, десәм хаталашмаймән. Чүнки мусабиқигә әрәб әллири түгәл қатнашти. яшлар яхши тәйярлиқ қилған. Асасән һиндистан билән өзбекистанниң яшлири күчлүк чиқти. Шуларниң арисида бизниң тәнһәрикәтчилиримиз 19 алтун, 15 күмүш вә 15 мис медалға игә болди. Шуниң билән әрәбистанниң бокс бойичә бирләшмисиниң башлиқи қазақистан тәнһәрикәтчилиригә интайин юқири баһа бәрди”.

Ташгүл һезиярованиң ейтишичә, қазақистанлиқ боксчиларниң чоң утуқларға йетишигә болупму тонулған тренерлар елдос сайдалин, қайрат сейитҗан, аркадий тапайеф, шуниңдәк алмута шәһиридики “динамо” чениқиш-тәнһәрикәт җәмийитиниң тренери рәһим садиқофлар чоң күч чиқарғаникән. 30-Авғустта мусабиқә нәтиҗилири чиқирилип, униң ғалиплири медаллар вә маддий соғилар билән тәқдирләнгәникән.

У мәзкур мусабиқигә көпинчә мәхсус бокс кулублирида тәрбийәлинип чиққан яшларниң қатнашқанлиқини оттуриға қоюп, йәнә мундақ деди: “балиларниң һәммиси чоң тәнһәрикәт мәктәплиридин кәлгән. Шулар ичидә қорам мәктипиниң оқуғучиси әләнур турғановаму қатнашти. У 15 яшта. Әң кичики әләнур болди. яш-өсмүр қизларниң карван бешини әләнур башлап чиқти. Әләнур таҗикистанниң қизини йәңгәндин кейин бизниң қизлар кәйни-кәйнидин йеңишкә башлиди. Әләнурниң мәктәптә тренери сәмәт әхметофниң қолида тәйярлинип, шу йәрдин шунчилик чоң дәриҗидики мусабиқигә қатнишишниң өзи чоң утуқ болди”.

Хуласә сөзидә ташгүл һезиярова әләнур турғанованиң дуня мусабиқисигә қатнишишини пүткүл алмута вилайитидә яшаватқан уйғурларниң қоллап-қуввәтлигәнликини, һәтта бәзи милләтпәрвәр шәхсләрниң маддий җәһәттин ярдәм көрсәткәнликини, әләнурниң дубайдики утуқиниң көпчиликни қаттиқ хушал қилғанлиқини алаһидә тәкитлиди һәм барлиқ қоллиғучиларға чәксиз миннәтдарлиқини изһар қилди.

Радийомиз зияритини қобул қилған әләнур турғанованиң тренери сәмәт әхметоф әпәнди мундақ деди. “чоң асия мусабиқисидә мис медал алди дегән бу мениң үчүн чоң нәтиҗә. Әләнур үчүнму шундақ дәп ойлаймән, сәвәби у техи кичик. Бу утуқ униң маңлай тәри билән кәлди, чүнки у тохтимай мәшиқләнди, тәйярлиқ қилди. Шундақла униңға уруқ-туғқанлириму ярдәм бәрди, қоллиди. Келәчәктиму еринмәй әмгәк қилип, тиришидиған болса, парижда болидиған олимпик оюнлириғиму йетип бариду, дәп ойлаймиз. Мениң шагиртлирим ичидә мундақ утуққа йетишкән әнә шу бирла әләнур. Қазақистан бойичә чемпийон болған балилирим болсиму, әмма улар асия мусабиқиси охшаш чоң мусабиқиләргә өтәлмиди. Шуниң үчүн әләнурдин үмид қиливатимиз”.

Зияритимизни қобул қилған “динамо” чениқиш-тәнһәрикәт җәмийитиниң тренери, қазақистанниң хизмәт көрсәткән тренери рәһим садиқоф мундақ деди: “һазирқи вақитта уларға чоң үмидләр артиливатиду, йәни париҗда болидиған яшлар арисидики олимпик оюнлирида бокс бойичә қатнишидиған балиларниң тизими қарап чиқиливатиду. Биз кәм дегәндә икки-үч балини таллаймиз. Шундақла биз дубайдики мусабиқигә актип қатнашқан қизлиримиздинму олимпик оюнлириға таллаймиз, дәп ойлаймән. Шуниң үчүн уларни тәйярлаш ишлириға чоң диққәт бөлүшимиз лазим. Шуниңдәк уларниң өзлириму көп тиришиши керәк. Дубайдики мусабиқигә қатнашқан икки уйғур қизи, йәни әләнур турғанова вә шахназ исайева мис медалға еришти. Бу яхши көрсәткүч, дәп ойлаймән.”

Игилишимизчә, әләнур турғанова мушу йилниң оттурилирида сербийәдә өткән бокс бойичә хәлқара мусабиқигә қизлардин қатнашқан бирдин-бир қазақистанлиқ икән. У мәзкур мусабиқидә үчинчи орунни игиләп, қазақистанлиқ бокс маһирлириниң диққитини тартқаниди. У йеқинда бокс бойичә тәнһәрикәтниң кандидат маһири дәриҗисигә еришкән. Әләнур турғанова қорам оттура мәктипиниң 10-синип оқуғучиси, мәктәп әлачилириниң бири, юртиниң пәхри.

Дубайда өткән асия мусабиқисигә йәнә бир уйғур қизи шахназ исайева қатнишип, үчинчи орунға еришкән. Қазақистанниң икки мәртәм чемпийони шахназ исайева сәккиз йешидин тартип бокс билән шуғулланмақтикән. У бокс бойичә тәнһәрикәт маһири.

Мәлуматларға қариғанда, қазақистанда тәнһәрикәтниң һәр хил түрлири бойичә көзгә көрүнүп келиватқан уйғур қизлири көп болуп, шуларниң арисида рано пархатова, адиләм һошурова, гүлминәм иминова, аминәм мәшүроваға охшаш тәнһәрикәтчиләрдин чоң үмидләр күтүлмәктә.