Америкида өз хираҗити билән мәшиқ қиливатқан уйғур бокс чемпийони һезим избақи йәнә нәтиҗә қазанди

Ихтиярий мухбиримиз ойған
2019-10-16
Елхәт
Пикир
Share
Принт
Америкида өз хираҗити билән мәшиқ қиливатқан уйғур бокс чемпийони һезим избақи.
Америкида өз хираҗити билән мәшиқ қиливатқан уйғур бокс чемпийони һезим избақи.
RFA/Oyghan

Мәлумки, көплигән қазақистанлиқ тәнһәрикәтчиләр дуня мусабиқилиригә қатнишип, тәнһәрикәтниң һәр хил түрлири, шу җүмлидин бокс бойичә чоң утуқларға еришмәктә. Уларниң ичидә уйғурларму бар болуп, улар һәққидә аммиви ахбарат васитилиридә һәм иҗтимаий таратқуларда хәвәрләр берилмәктә.

Йеқинда биз қазақистанниң «проспорт» тор бетидә елан қилинған «қазақистанлиқ еғир дәриҗидики боксчи биринчи мәйданда риқабәтчисини йәңди» намлиқ мақалидин қазақистанлиқ боксчи һезим избақиниң үчинчи қетим ғалибийәткә еришкәнликидин хәвәр таптуқ. 24 яшлиқ һезим избақи американиң мичеган штатидики флинт шәһиридә өткүзүлгән бокс мусабиқисидә америкилиқ трой олбриң билән мусабиқигә чүшүп, биринчи мәйдандила ғәлибә қилған.

Мушу йили авғуст ейида уйғур йигити һезим избақиниң американиң оклахома штатиниң брокен аррав шәһиридә өткүзүлгән еғир дәриҗидики боксчилар мусабиқисидә америкалиқ бокс маһири армонт самерсни йеңип, чемпийон болғанлиқи һәққидә учур тарқалғаниди. 

Биз қазақистанниң алмута вилайити әмгәкчиқазақ наһийәсиниң челәк йезисидин келип чиққан, һазир америкида давамлиқ мусабиқиләргә тәйярлиқ қиливатқан һезим избақи билән алақилишип, униңдин мәзкур мусабиқә һәққидә сориғинимизда у мундақ деди: 

«Растини ейтсам, бу мусабиқигә интайин қисқа вақит болди. Сәвәби алмутада мушу йәкму-йәк мусабиқигә қатнишиш үчүн өзүмниң бурунқи тренерлирим бахит оразбайеф билән һемит тохтахунофниң рәһбәрликидә мәшиқ қилдим. Мусабиқигә он күн қалғанда америкиға учтум. Бу йәрдә бурунқи тренерим билән мәшиқ қилдим. 2-Өктәбир күни флинт шәһиригә бардуқ. Шу йәрниң балиси трой билән мусабиқиләштим. Алтә мәйданлиқ соқуш болуш керәк иди, бирақ мән уни биринчи р йеңивалдим. Шу мусабиқигә мени тәйярлиған бахит оразбайеф, һемит тохтахуноф, шавкәт избақиға мән рәһмәт ейтимән.»

Һезим избақиниң ейтишичә, униң мундақ утуқларға йетишигә тунҗи тренери малик хайруллин вә «фрее спариң» бирләшмисиниң президенти, қазақистанниң хизмәт көрсәткән тренери, чамбашчилиқ вә бокс бойичә хәлқара тәнһәрикәт маһири һемит тохтахунофму алаһидә төһпә қошқан икән.

Игилишимизчә, һезим избақи 1994-йили алмута вилайитиниң челәк йезисида туғулған болуп, абдулла розибақийеф намидики уйғур оттура мәктипини тамамлиған икән. У кичикидин тартип тәнһәрикәтниң бокс, кикбоксиң, йәни әркин муштлишиш вә башқиму түрлири бойичә көплигән мусабиқиләргә қатнишип, чоң утуқлар қазанған. 

Һезим избақиниң алмута шәһиридә яшаватқан акиси ренат зияритимизни қобул қилип, мундақ деди: «мушу йили декабир ейида йәнә бир йәкму-йәк пиланлиниватиду. У еғир дәриҗидики төтинчи болуп һесаблиниду. Йеши бойичиму әң яш. Уйғурлар ичидин чиққан биринчи шу. Уни қазақистандики уйғурлар һәммиси билиду. Һезимму өзиниң уйғурлар ичидин чиқиватқан еғир дәриҗиликләр бойичә боксчи икәнликини билиду. У, голофкин, қанат исламға охшаш қазақистанниң дәриҗисини көтүрүватиду, дәп ойлаймән.»

Биз һезим избақиниң тренери һемит тохтахуноф билән алақиләштуқ. У қазақистан уйғурлири ичидин көплигән даңлиқ шәхсләрниң йетилип чиққанлиқини оттуриға қоюп, мундақ деди: «бокс бойичә мусабиқә өткүзгүчи компанийәләр билән келишимләр бар. Боксчиларни дәриҗиси бойичә илғап еливатимиз. Һезимдин чоң үмидләрни күтүватимиз. У өзиниң йемәк-ичмикини, турушлуқ җайини өзи тәминләватиду. Бизму қолдин келишичә ярдәм қиливатимиз. Бу оңай иш әмәс. Еғир дәриҗилик маһирлардин биздә дячко вә башқилар бар. Уйғур яшлиридин чиқиватқан ялғуз һезим.»

Мәлум болушичә, һезим избақи һазир өз чиқимлири билән америкида давамлиқ туруп, бокс мусабиқилиригә қатнишиш үчүн тәйярлиниватқан болуп, у қазақистан һөкүмити тәрипидин һечқандақ иқтисадий ярдәмгә еришмигән, униң ейтишичә, америкадики ширкәт униң бир қисим чиқимлирини көтүрсиму, әмма турмуш вә ятақ чиқимлирини өзи көтүрүши керәк икән. 

Һемит тохтахунофниң ейтишичә, һезим избақи қазақистандики уйғурлар ичидин чиққан мәшһур шәхсләрниң бири икән. Кейинки вақитларда униң исми қазақистанлиқ уйғурлар ичидә кәң даиридә таралмақтикән. Игилишимизчә, һезим избақи қазақистанниң мәшһур шәхслири китабиға киргән уйғурларниң бири болуп, униңда һезим избақиниң бир қатар мусабиқиләрниң ғалиби аталған тәнһәрикәт маһири икәнлики ейтилған.

Толуқ бәт