Amérikida öz xirajiti bilen meshiq qiliwatqan Uyghur boks chémpiyoni hézim izbaqi yene netije qazandi

Ixtiyariy muxbirimiz oyghan
2019-10-16
Élxet
Pikir
Share
Print
Amérikida öz xirajiti bilen meshiq qiliwatqan Uyghur boks chémpiyoni hézim izbaqi.
Amérikida öz xirajiti bilen meshiq qiliwatqan Uyghur boks chémpiyoni hézim izbaqi.
RFA/Oyghan

Melumki, köpligen qazaqistanliq tenheriketchiler dunya musabiqilirige qatniship, tenheriketning her xil türliri, shu jümlidin boks boyiche chong utuqlargha érishmekte. Ularning ichide Uyghurlarmu bar bolup, ular heqqide ammiwi axbarat wasitiliride hem ijtima'iy taratqularda xewerler bérilmekte.

Yéqinda biz qazaqistanning "Prosport" tor bétide élan qilin'ghan "Qazaqistanliq éghir derijidiki bokschi birinchi meydanda riqabetchisini yengdi" namliq maqalidin qazaqistanliq bokschi hézim izbaqining üchinchi qétim ghalibiyetke érishkenlikidin xewer taptuq. 24 Yashliq hézim izbaqi amérikaning michégan shtatidiki flint shehiride ötküzülgen boks musabiqiside amérikiliq troy olbring bilen musabiqige chüshüp, birinchi meydandila ghelibe qilghan.

Mushu yili awghust éyida Uyghur yigiti hézim izbaqining amérikaning oklaxoma shtatining brokén arraw shehiride ötküzülgen éghir derijidiki bokschilar musabiqiside amérikaliq boks mahiri armont samérsni yéngip, chémpiyon bolghanliqi heqqide uchur tarqalghanidi. 

Biz qazaqistanning almuta wilayiti emgekchiqazaq nahiyesining chélek yézisidin kélip chiqqan, hazir amérikida dawamliq musabiqilerge teyyarliq qiliwatqan hézim izbaqi bilen alaqiliship, uningdin mezkur musabiqe heqqide sorighinimizda u mundaq dédi: 

"Rastini éytsam, bu musabiqige intayin qisqa waqit boldi. Sewebi almutada mushu yekmu-yek musabiqige qatnishish üchün özümning burunqi trénérlirim baxit orazbayéf bilen hémit toxtaxunofning rehberlikide meshiq qildim. Musabiqige on kün qalghanda amérikigha uchtum. Bu yerde burunqi trénérim bilen meshiq qildim. 2-Öktebir küni flint shehirige barduq. Shu yerning balisi troy bilen musabiqileshtim. Alte meydanliq soqush bolush kérek idi, biraq men uni birinchi r yéngiwaldim. Shu musabiqige méni teyyarlighan baxit orazbayéf, hémit toxtaxunof, shawket izbaqigha men rehmet éytimen."

Hézim izbaqining éytishiche, uning mundaq utuqlargha yétishige tunji trénéri malik xayrullin we "Fré'é sparing" birleshmisining prézidénti, qazaqistanning xizmet körsetken trénéri, chambashchiliq we boks boyiche xelq'ara tenheriket mahiri hémit toxtaxunofmu alahide töhpe qoshqan iken.

Igilishimizche, hézim izbaqi 1994-yili almuta wilayitining chélek yézisida tughulghan bolup, abdulla rozibaqiyéf namidiki Uyghur ottura mektipini tamamlighan iken. U kichikidin tartip tenheriketning boks, kikboksing, yeni erkin mushtlishish we bashqimu türliri boyiche köpligen musabiqilerge qatniship, chong utuqlar qazan'ghan. 

Hézim izbaqining almuta shehiride yashawatqan akisi rénat ziyaritimizni qobul qilip, mundaq dédi: "Mushu yili dékabir éyida yene bir yekmu-yek pilanliniwatidu. U éghir derijidiki tötinchi bolup hésablinidu. Yéshi boyichimu eng yash. Uyghurlar ichidin chiqqan birinchi shu. Uni qazaqistandiki Uyghurlar hemmisi bilidu. Hézimmu özining Uyghurlar ichidin chiqiwatqan éghir derijilikler boyiche bokschi ikenlikini bilidu. U, golofkin, qanat islamgha oxshash qazaqistanning derijisini kötürüwatidu, dep oylaymen."

Biz hézim izbaqining trénéri hémit toxtaxunof bilen alaqileshtuq. U qazaqistan Uyghurliri ichidin köpligen dangliq shexslerning yétilip chiqqanliqini otturigha qoyup, mundaq dédi: "Boks boyiche musabiqe ötküzgüchi kompaniyeler bilen kélishimler bar. Bokschilarni derijisi boyiche ilghap éliwatimiz. Hézimdin chong ümidlerni kütüwatimiz. U özining yémek-ichmikini, turushluq jayini özi teminlewatidu. Bizmu qoldin kélishiche yardem qiliwatimiz. Bu ongay ish emes. Éghir derijilik mahirlardin bizde dyachko we bashqilar bar. Uyghur yashliridin chiqiwatqan yalghuz hézim."

Melum bolushiche, hézim izbaqi hazir öz chiqimliri bilen amérikida dawamliq turup, boks musabiqilirige qatnishish üchün teyyarliniwatqan bolup, u qazaqistan hökümiti teripidin héchqandaq iqtisadiy yardemge érishmigen, uning éytishiche, amérikadiki shirket uning bir qisim chiqimlirini kötürsimu, emma turmush we yataq chiqimlirini özi kötürüshi kérek iken. 

Hémit toxtaxunofning éytishiche, hézim izbaqi qazaqistandiki Uyghurlar ichidin chiqqan meshhur shexslerning biri iken. Kéyinki waqitlarda uning ismi qazaqistanliq Uyghurlar ichide keng da'iride taralmaqtiken. Igilishimizche, hézim izbaqi qazaqistanning meshhur shexsliri kitabigha kirgen Uyghurlarning biri bolup, uningda hézim izbaqining bir qatar musabiqilerning ghalibi atalghan tenheriket mahiri ikenliki éytilghan.

Toluq bet