Amérika dölet mejliside "Uyghur hémayichiliqi küni" ötküzüldi

Muxbirimiz eziz
2019-06-12
Élxet
Pikir
Share
Print
Amérika dölet mejliside "Uyghur hémayichiliqi küni" qatnashqanlar bir yaki birnechche palata ezaliri bilen körüshni pilanlimaqta. 2019-Yili 12-iyun, washin'gton.
Amérika dölet mejliside "Uyghur hémayichiliqi küni" qatnashqanlar bir yaki birnechche palata ezaliri bilen körüshni pilanlimaqta. 2019-Yili 12-iyun, washin'gton.
Ömer Qanat ependi teminligen

Uyghur diyaridiki siyasiy basturushlar barghanséri éghirlap, herqaysi sahelerning we axbarat wasitilirining zor derijide diqqitini qozghighan bolsimu amérika siyasiy sahesidiki yene bir qisim erbablarning bu ishlardin toluq xewerdar bolup ketmigenliki melum. Ene shu xil boshluqni qismen bolsimu toldurush meqsitide washin'gtondiki Uyghur kishilik hoquq qurulushi 12-iyun küni amérika dölet mejliside "Uyghur hémayichiliqi küni" pa'aliyiti teshkillidi.

Mezkur pa'aliyet washin'gtondiki "Uyghur heptiliki" ayaghlashqandin kéyin barliqqa kelgen yene bir pa'aliyet bolup, pa'aliyet bashlinish aldida Uyghur kishilik hoquq qurulushining diréktori ömer qanat ayrim ziyaritimizni qobul qilip, bu qétimqi pa'aliyetning asasliq meqsiti heqqide qisqiche chüshenche berdi.

Pa'aliyetning orunlashturulushi boyiche amérikadiki Uyghurlar we Uyghurlargha hésdashliq qilghuchi xiristyanlar jama'iti, yehudiylar jama'iti qatarliq sahelerdin kelgen shexsler öz aldigha bir yaki birnechchidin palata ezaliri bilen 12-iyun küni yüzmu-yüz söhbette bolushqa aldin'ala kélishken iken. Ular mushu teriqide amérika awam palatasi we kéngesh palatasidiki özliri turushluq shitatlardin saylan'ghan palata ezaliri bilen körüshüsh jeryanida özlirining kechürmishliri hemde özlirige melumluq paji'elerni bayan qilish arqiliq ularni hazir muzakire qiliniwatqan "Uyghur kishilik hoquq qanun layihisi" we "Uighur layihesi" ge imza qoyushqa dewet qilghan.

Biz shu xildiki uchrishishlarning biride alayiten amérikaning gherbiy qirghiqidiki washin'gton shtatidin kelgen bil klark ependini uchrattuq. U "Uyghur hémayichiliqi küni" üchün washin'gton shtatidiki séyatul shehridin kelgen bolup, ömer qanat bilen birlikte shimaliy karolina shitatidin saylan'ghan palata ezasi alma adamgha Uyghurlar heqqide melumat bérip chiqqan iken. Biz uningdin "Siz qandaqlarche bu sepke qoshulup qaldingiz?" dep sorighinimizda u özini Uyghurlargha qerzdar, dep hésablaydighanliqini, shunga mushu arqiliq özining bu ishqa bir kishilik hesse qoshmaqchi bolghanliqini bildürdi.

"Mushu taptiki héssiyatimni sorisingiz kallamda Uyghurlarni himaye qilishtin bashqa héchnerse yoq. Chünki hazir Uyghurlar üchün bekmu qiyin bir mezgil boluwatidu. Men bilidighan, manga shunche yéqin bolghan köpligen dostlirim we ularning a'ilisidikiler hazir xitayning yighiwélish lagérlirigha qamaldi. Shunga washin'gton shehiridiki kéngesh palata ezalirini, qanun sahesidiki kattilarni izdep tépip bu ishlarning qobul qilishqa bolmaydighan qilmishlar ikenlikini éytmaqchimiz. Biz lagérlarning taqalghanliqini, lagérlargha qamalghan ayallar, erler we gödeklerning öz a'ilisidikiler bilen jem bolghanliqini körüshni bekmu xalaymiz. Bu kishilerning hemmisining bowiliri bar. Men bu yil 63 yashqa kirdim. Emma lagérgha qamalghanlar ichide méning qurdashlirim, shundaqla 70 yaki 80 yashliq kishiler bar. Bu kishiler jinayetchilerge oxshash qamaqqa élin'ghan. Bu ishlar insaniyetke qarshi jinayet bolghanliqi üchün biz bu yerde uninggha qarshi chiqiwatimiz. Shexsen özümni alsam men ashu makanda in'gliz tili oqutquchisi bolup nurghun yillar yashighanmen. Kéyinche washin'gton uniwérsitétidin doktorluq unwani élip, Uyghurlarni tetqiq qilidighan insanshunas boldum. Men méni, méning a'ilemni, méning üch perzentimni söygen Uyghur xelqi üchün, exlaqiy jehettin öz mejburiyitimni ada qilish üchün bu yerge keldim."

Bügünki pa'aliyetke qatnashqan amérikadiki Uyghurlarning beziliri köp sandiki Uyghur musapirlirigha ortaq bolghan siyasiy panahliq mesilisini munasiwetlik kishilerge yene bir qétim esletken hemde bu jehette Uyghur musapirlirigha ongayliq yaritip bérish telipini otturigha qoyghan. Uyghur pa'aliyetchilerdin qeyser séyit özining mushu mesilini mexsus tekitligenlikini bildürdi.

Uyghur yashliridin tumaris almasmu özlirining munasiwetlik palata ezaliri bilen uchriship, ularni xitay hökümiti bilen bolghan söhbetlerde Uyghurlar mesilisini otturigha qoyushqa dewet qilidighanliqini bayan qildi.

Melum bolushiche, bügünki pa'aliyetning wujudqa chiqishigha amérika Uyghur birleshmisi we Uyghur karxanichilar tori yéqindin yardemde bolghan bolup, bu xildiki pa'aliyetlerning dawamliq teshkillinishi pilan qilinmaqta iken.

Toluq bet