Уйғур гимнастикичи нариман қурбаноф париждики олимпик мусабиқисигә қатнишидиған салаһийәтни қолға кәлтүрди

Алмутадин ихтиярий мухбиримиз ойған тәйярлиди
2024.05.02
qazaqistan-nariman-qurbanof-02 Олимпик мусабиқисигә қатнишидиған салаһийәтни қолға кәлтүргән гимнастика бойичә хәлқара тәнһәрикәт маһири нариман қурбаноф (оңдин биринчи киши). 2024-Йили, апрел. Доһа (қатар)
RFA/Oyghan

Қазақистанниң аммиви ахбарат васитилириниң хәвәр қилишичә, бир нәччә йиллардин буян қазақистанлиқ уйғурларниң пәхри болуп келиватқан һәмдә пүткүл қазақистанниң хәлқарадики шәнини қоғдап келиватқан даңлиқ гимнастикичи, гимнастика бойичә хәлқара тәнһәрикәт маһири нариман қурбаноф 26-июлдин 11-авғустқичә фирансийә пайтәхти парижда өткүзидиған 33-нөвәтлик олимпик мусабиқисигә йолланма алди.

Қазақистанда чиқидиған “олимпик” гезитиниң хәвиригә қариғанда, йеқинда қатар пайтәхти доһада өткүзүлгән гимнастика бойичә дуня мусабиқисидә қазақистан мәмликити гимнастика бойичә олимпик оюнлириниң иккинчи дәриҗисини қолға кәлтүргән иди. Хәвәрдә қазақистан хәлқиниң гимнастика маһири нариман қурбанофниң тәнһәрикәттә аз учрайдиған яғач атта оюн көрситиш түри бойичә бу мусабиқидә алтун медал елишини үмид қилидиғанлиқи ейтилған.

Мәзкур мақалидә дейилишичә, нариман қурбаноф мисир пайтәхти қаһирәдә өткүзүлгән мусабиқидә биринчиликни қолға кәлтүрәлмигән болсиму, әмма бир һәптидин кейинла германийәниң котбус шәһиридә өткүзүлгән дуня мусабиқисидә алтун медалға еришип, асасий риқабәтчиси иорданийәлик әһмәд әбу-астин ешип кәткән. Нариман қурбаноф әзәрбәйҗан пайтәхти бакуда өткүзүлгән мусабиқидә төтинчи орунни игилигән. Һалбуки, буларниң һәммисини мушу нөвәт доһада өткүзүлгән мусабиқә һәл қилған болуп, нәтиҗидә нариман қурбаноф дуняниң әң күчлүк тәнһәрикәтчилириниң алдиға өткән һәм иккинчи номур билән олимпик мусабиқисигә қатнишидиған салаһийәткә еришкән.

Гимнастика бойичә дуня мусабиқисидин көрүнүш. 2024-Йил, апрел. Доһа (қатар)
Гимнастика бойичә дуня мусабиқисидин көрүнүш. 2024-Йил, апрел. Доһа (қатар)
RFA/Oyghan

Шундақ қилип, омумән иорданийәлик әһмәд әбу-ас 85, нариман қурбаноф 70, тәйвәнлик ли чикәй 63 номурға еришкән.

Биз гимнастика бойичә қазақистан командисиниң әзаси, гимнастика бойичә хәлқара тәнһәрикәт маһири нариман қурбаноф билән алақиләштуқ. У вақтиниң җиддий икәнликигә қаримай, бизниң зияритимизни қобул қилип, мундақ деди: “қатарниң доһа шәһиридә болуп өткән дуня мусабиқиси бу мәвсумдики төтинчи қетимлиқ мусабиқә болуп һесаблиниду. Униңда мән төтинчи орунни игилигән болсамму, лекин парижда өткүзүлидиған олимпик мусабиқисигә қатнишиш салаһийитини қолға кәлтүрдүм. Омумән мусабиқиләр яхши өтти. Өз алдимизға қойған мәқситимизгә йәттуқ. Төт дуня мусабиқисидә бир қетим биринчи, икки қетим төтинчи вә бир қетим бәшинчи орунни игилидим. Нәтиҗидә дуня бойичә иккинчи орунға игә болдум. Олимпик оюнлириға қатнишидиған салаһийәт пәқәт биринчи вә иккинчи орунларғила берилди. Мусабиқигә пүткүл дунядин кәлгән тәнһәрикәтчиләр қатнашти. Демәк, һәр бир мусабиқигә 90 мәмликәтниң әң күчлүк тәнһәрикәтчилири қатнашти. Мән уларниң күчини көрүп, әмди олимпик оюнлириға тәйярлинишқа кириштим. ”

Радийомиз зияритини қобул қилған “кентавр” қабилийәтлик тәнһәрикәтчиләргә ярдәм қилиш җәмийәтлик фондиниң рәиси, қазақистанниң хизмәт көрсәткән тиренери, нариман қурбанофниң устази мәхмут искәндәроф, шагиртиниң парижда өткүзүлидиған олимпик мусабиқисигә қатнишиш йолланмисини утувалғанлиқиниң қазақистан дөлити вә қазақистан тәнһәрикити үчүн чоң ғәлибә икәнликини оттуриға қоюп, мундақ деди: “нариман қурбаноф һазир японийәдә өткүзүлидиған асия мусабиқисигә тәйярлиниватиду. Бу униң үчүн олимпик оюнлири алдидики йәнә бир синақ болмақчи. Нариман қаидә бойичә әң күчлүк сәккизниң тәркибигә кириши керәк. Әлвәттә, нариман өзиниң риқабәтчилирини яхши билиду, тонуйду. Уларму нариманни яхши билиду. Йәнә бир муһим нәрсә шуки, нариман қурбаноф гимнастика бойичә хәлқара бирләшминиң тизимида биринчиләрдин болуп келиватиду. Шуниң үчүн нариманға мән чоң утуқ тиләймән. ”

Мәхмут искәндәроф, гимнастика бойичә йәнә икки уйғур йигити һәсән салимоф вә иляс әзизофниң өзбекистан пайтәхти ташкәнттә өткүзүлидиған асия мусабиқисигә тәйярлиқ қиливатқанлиқини, һәр иккилисиниң хәлқара дәриҗидики тәнһәрикәт маһирлири икәнликини билдүрди.

Игилишимизчә, қазақистанда тәнһәрикәтниң һәр хил түрлири бойичә йетилип чиқиватқан уйғур қиз-йигитлири чоң нәтиҗиләргә еришмәктә. Уларниң бәзилири хәлқара мусабиқиләрниң ғалиблири. Шуларниң бири болған нариман қурбаноф һазирчә бу йил парижда өткүзүлидиған олимпик мусабиқисигә қатнишиш салаһийитини қолға кәлтүргән қазақистан бойичила әмәс, бәлки оттура асия бойичиму бирдинбир уйғур тәнһәрикәтчисидур.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.