Uyghur gimnastikichi nariman qurbanof parizhdiki olimpik musabiqisige qatnishidighan salahiyetni qolgha keltürdi

Qazaqistanning ammiwi axbarat wasitilirining xewer qilishiche, bir nechche yillardin buyan qazaqistanliq Uyghurlarning pexri bolup kéliwatqan hemde pütkül qazaqistanning xelq'aradiki shenini qoghdap kéliwatqan dangliq gimnastikichi, gimnastika boyiche xelq'ara tenheriket mahiri nariman qurbanof 26-iyuldin 11-awghustqiche firansiye paytexti parizhda ötküzidighan 33-nöwetlik olimpik musabiqisige yollanma aldi.

Qazaqistanda chiqidighan “Olimpik” gézitining xewirige qarighanda, yéqinda qatar paytexti dohada ötküzülgen gimnastika boyiche dunya musabiqiside qazaqistan memlikiti gimnastika boyiche olimpik oyunlirining ikkinchi derijisini qolgha keltürgen idi. Xewerde qazaqistan xelqining gimnastika mahiri nariman qurbanofning tenherikette az uchraydighan yaghach atta oyun körsitish türi boyiche bu musabiqide altun médal élishini ümid qilidighanliqi éytilghan.

Mezkur maqalide déyilishiche, nariman qurbanof misir paytexti qahirede ötküzülgen musabiqide birinchilikni qolgha keltürelmigen bolsimu, emma bir heptidin kéyinla gérmaniyening kotbus shehiride ötküzülgen dunya musabiqiside altun médalgha ériship, asasiy riqabetchisi i'ordaniyelik ehmed ebu-astin éship ketken. Nariman qurbanof ezerbeyjan paytexti bakuda ötküzülgen musabiqide tötinchi orunni igiligen. Halbuki, bularning hemmisini mushu nöwet dohada ötküzülgen musabiqe hel qilghan bolup, netijide nariman qurbanof dunyaning eng küchlük tenheriketchilirining aldigha ötken hem ikkinchi nomur bilen olimpik musabiqisige qatnishidighan salahiyetke érishken.

RFA/Oyghan

Shundaq qilip, omumen i'ordaniyelik ehmed ebu-as 85, nariman qurbanof 70, teywenlik li chikey 63 nomurgha érishken.

Biz gimnastika boyiche qazaqistan komandisining ezasi, gimnastika boyiche xelq'ara tenheriket mahiri nariman qurbanof bilen alaqileshtuq. U waqtining jiddiy ikenlikige qarimay, bizning ziyaritimizni qobul qilip, mundaq dédi: “Qatarning doha shehiride bolup ötken dunya musabiqisi bu mewsumdiki tötinchi qétimliq musabiqe bolup hésablinidu. Uningda men tötinchi orunni igiligen bolsammu, lékin parizhda ötküzülidighan olimpik musabiqisige qatnishish salahiyitini qolgha keltürdüm. Omumen musabiqiler yaxshi ötti. Öz aldimizgha qoyghan meqsitimizge yettuq. Töt dunya musabiqiside bir qétim birinchi, ikki qétim tötinchi we bir qétim beshinchi orunni igilidim. Netijide dunya boyiche ikkinchi orun'gha ige boldum. Olimpik oyunlirigha qatnishidighan salahiyet peqet birinchi we ikkinchi orunlarghila bérildi. Musabiqige pütkül dunyadin kelgen tenheriketchiler qatnashti. Démek, her bir musabiqige 90 memliketning eng küchlük tenheriketchiliri qatnashti. Men ularning küchini körüp, emdi olimpik oyunlirigha teyyarlinishqa kirishtim. ”

Radiyomiz ziyaritini qobul qilghan “Kéntawr” qabiliyetlik tenheriketchilerge yardem qilish jem'iyetlik fondining re'isi, qazaqistanning xizmet körsetken tirénéri, nariman qurbanofning ustazi mexmut iskenderof, shagirtining parizhda ötküzülidighan olimpik musabiqisige qatnishish yollanmisini utuwalghanliqining qazaqistan döliti we qazaqistan tenherikiti üchün chong ghelibe ikenlikini otturigha qoyup, mundaq dédi: “Nariman qurbanof hazir yaponiyede ötküzülidighan asiya musabiqisige teyyarliniwatidu. Bu uning üchün olimpik oyunliri aldidiki yene bir sinaq bolmaqchi. Nariman qa'ide boyiche eng küchlük sekkizning terkibige kirishi kérek. Elwette, nariman özining riqabetchilirini yaxshi bilidu, tonuydu. Ularmu narimanni yaxshi bilidu. Yene bir muhim nerse shuki, nariman qurbanof gimnastika boyiche xelq'ara birleshmining tizimida birinchilerdin bolup kéliwatidu. Shuning üchün nariman'gha men chong utuq tileymen. ”

Mexmut iskenderof, gimnastika boyiche yene ikki Uyghur yigiti hesen salimof we ilyas ezizofning özbékistan paytexti tashkentte ötküzülidighan asiya musabiqisige teyyarliq qiliwatqanliqini, her ikkilisining xelq'ara derijidiki tenheriket mahirliri ikenlikini bildürdi.

Igilishimizche, qazaqistanda tenheriketning her xil türliri boyiche yétilip chiqiwatqan Uyghur qiz-yigitliri chong netijilerge érishmekte. Ularning beziliri xelq'ara musabiqilerning ghalibliri. Shularning biri bolghan nariman qurbanof hazirche bu yil parizhda ötküzülidighan olimpik musabiqisige qatnishish salahiyitini qolgha keltürgen qazaqistan boyichila emes, belki ottura asiya boyichimu birdinbir Uyghur tenheriketchisidur.