Türkiyede b d t ning himayiside turuwatqan yüsüpjan emet istanbulda qoralliq hujumgha uchridi

Muxbirimiz shöhret hoshur
2020-11-03
Share
yusupjan-emet-shohret-hoshur.jpg Radiyomiz ziyaritini qobul qilghan we özining xitayning sabiq alahide xadimi ikenlikini ilgiri sürgen yüsüpjan emet qoralliq hujumgha uchrighan. Muxbirimiz uni doxturxanida ziyaret qilmaqta. 2020-Yili 2-noyabir, türkiye.
RFA/Shöhret Hoshur

Ötken yili 2-ayda radiyomiz ziyaritini qobul qilghan we özining xitayning sabiq alahide xadimi ikenlikini ilgiri sürgen yüsüpjan emet 2-noyabir istanbul waqti kech sa'et 11 etrapida namelum kishi yaki kishilerning qoralliq hujumigha uchrighan. Muxbirimiz bügün yüsüpjan emet dawaliniwatqan doxturxanining jiddiy qutquzush bölümige bérip, uni ziyaret qildi. Hujumda qoli we dolisidin oq yégen yüsüpjan emet özining Uyghurdin düshmini yoqluqini, peqet özi ilgiri xizmet qilghan xitay terepning süyqestige uchrighanliqini ilgiri sürdi.

Bügün törkiyediki demir'ören xewer agéntliqining xewer qilishiche, istanbulning awchilar mehelliside 2-noyabir kéche sa'et 11 ge yéqin xitay wetendishi bolghan yüsüpjan emet isimlik bir ishchi namelum kishilerning qoralliq hujumigha uchrighan. Hujumda qoli we dolisigha oq tegken yüsüpjan istanbuldiki baqirköy dölet doxturxanisining jiddiy qutquzush bölümige yötkelgen. Biz bügün mezkur doxturxanining jiddiy qutquzush bölümige bérip, yaridar yüsüpjan emetni ziyaret qilduq. Yüsüpjanning bayan qilishiche, u awchilar mehelliside olturushluq dostining öyige kéliwétip, binagha yéqinlashqanda gumanliq kishilerning özige egishiwatqanliqini bayqighan. U dostining öyide 1-2 sa'etche olturup qaytqinida, yeni bina derwazisidin chiqiwatqinida baya özige egeshken gumanliq kishilerning qoralliq hujumigha uchrighan.

Démir'ören agéntliqining xewiridin melum bolushiche, gumandar weqe sadir qilip bolghandin kéyin neq meydandin qéchip ketken. Saqchilar nöwette gumandarni tutush üchün heriket qilmaqta we yüsüpjan emetning yéqin dostliridin délogha chétishliq ehwallarni sürüshte qilmaqtiken.

Yüsüpjan emet ötken yili "El-jezire" téléwiziyesi we radiyomizning ziyaritini qobul qilghan chéghida, özining xitay teripidin pakistan'gha chiqirilghanliqini we pakistan'gha chiqqandin kéyin xitaydin ashkara yüz örüp türkiyediki b d t ishxanisidin siyasiy panahliq tiligenlikini melum qilghan idi. U bir mezgilde türkiyening zongguldaq wilayitide panahlinip turghan, kéyinche istanbulgha yötkilip kélip, bir binakarliq qurulush shirkitide ishchi bolup ishlewatqan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet