"Uyghur herikiti" teshkilatining yawropadiki pa'aliyetliri zor tesir qozghimaqta

Ixtiyariy muxbirimiz ekrem
2021-10-21
Share
Gérmaniyening paytexti bérlinda ötküzülgen "Uyghur siyasiy aktiplirini terbiyilesh kursi" gha qatnashqanlar. 2021-Yili öktebir.
RFA/Ekrem

"Uyghur herikiti" teshkilatining yawropadiki ikki heptige sozulghan pa'aliyetliri köp xil mezmunlardin terkip tapti.

Merkizi washin'gtonda bolghan "Uyghur herikiti" teshkilatining yawropadiki ikki heptige sozulghan pa'aliyiti 14-séntebir gérmaniye paytexti bérlindin bashlan'ghan idi. Biz teshkilat re'isi roshen abbas xanimni biwaste ziyaret qilish hem uning uyushturghan yighinlirigha qatnishish arqiliq bu pa'aliyetlerning 3 asasiy mezmun da'iriside dawam qiliwatqanliqidin waqip bolduq. Buning biri, amérikaning yawropa döletliridiki elchiliri we konsulliri bilen körüshüp Uyghurlarning nöwettiki weziyiti toghrisida söhbet ötküzüsh. Ikkinchisi, "Hedem nede?" namliq höjjetlik filimning qoyulush murasimida nutuq sözlesh. Üchinchisi, "Uyghur siyasiy aktiplirini terbiyilesh kursi" ötküzüsh.

Uyghur siyasiy aktiplirini terbiyilesh kursidin körünüsh. 2021-Yili öktebir, gérmaniye.
Uyghur siyasiy aktiplirini terbiyilesh kursidin körünüsh. 2021-Yili öktebir, gérmaniye.

"Uyghur siyasiy aktiplirini terbiyilesh kursi" 15-16-öktebir künliri gérmaniye paytexti bérlinda ötküzüldi. Kursqa yawropa döletliridin bir qisim Uyghur yashliri kélip qatnashqan bolup, amérikadiki bezi meshhur siyasiy shexsler tor arqiliq ders sözlidi. "Uyghur herikiti" teshkilatining re'isi roshen abbas xanim bu heqte toxtalghanda, kursning muweppeqiyetlik ötküzülgenlikini, Uyghur yashlirigha küchlük tesir körsetkenlikini tilgha aldi.

"Uyghur herikiti" teshkilatining yawropadiki pa'aliyetlirining eng tesirlik bir bölümi-bash pirsunazh roshen abbasning "Hedem nede?" namliq höjjetlik filimning qoyulush murasimida nutuq sözlep, gherb kishilirining diqqitini Uyghur diyaridiki éghir zulumlargha tartishidin ibaret boldi. Bu murasim 14-öktebir küni amérikaning bérlindiki elchixanisida tunji qétim ötküzülgen idi. Bügün 21-öktebir amérikaning myunxéndiki konsulxanisining uyushturushi bilen myunxéndiki "Amérika sariyi" da ötküzüldi. Aldimizdiki künlerde yene gérmaniyening bashqa sheherliri we bashqa yawropa döletliride ötküzülidiken.

"Uyghur herikiti" teshkilatining yawropadiki ikki heptige sozulghan pa'aliyiti jeryanida péshqedem Uyghur siyasiy erbabliridin erkin aliptékin ependi(ongdin üchinchi) bilen körüshken. 2021-Yili öktebir, myunxén.

"Hedem nede?" namliq filimning kishilerge küchlük tesir qilishidiki seweb néme? filimda qandaq mezmunlar ekis ettürülgen?

Mezkur filimda rol alghan dunya Uyghur qurultiyining bash teptishi, merkizi washin'gtondiki "Uyghur tetqiqat merkizi" ning mudiri abdulhakim idris ependi bu so'algha jawab bérip, bu filimning mutexessisler, lagér shahidliri, muxbirlar, tetqiqatchilar we dewagerlerning bayanliri hemde pakitliq körünüshler arqiliq sherqiy türkistandiki xitay zulumining hemme sahesini yorutup bergen uniwérsal bir filim bolghanliqini, filimda mewjut paji'eler éniq ekis ettürülgenliki üchün kishilerge küchlük tesir körsitiwatqanliqini tilgha aldi.

"Uyghur herikiti" teshkilatining yawropadiki pa'aliyetlirining yene bir muhim terkibi qismi amérikaning yawropa elliridiki elchiliri we déplomatlirini Uyghurlar mesilisige a'it eng yéngi melumatlar bilen teminlesh, kélichekte öz'ara hemkarliship élip baridighan pa'aliyetlerni muzakire qilish boldi. "Hedem nede?" namliq höjjetlik filim 14-öktebir küni amérikaning bérlindiki elchixanisida tunji qétim qoyulghanda, amérikaning gérmaniyediki waqitliq bash elchisi klark pirs nutuq sözlep, filimgha yuqiri baha bergen we "Uyghur herikiti" teshkilatining bu pa'aliyitini qollaydighanliqini 100 ge yéqin déplomatlar aldida ochuq otturigha qoyghan idi. Bügün ular amérikaning myunxéndiki konsulxana xadimliri bilen körüshüp, ularningmu qizghin hésdashliqini qolgha keltürdi.

19-Öktebir küni pishqedem Uyghur siyasiy erbabliridin erkin aliptékin ependi kisel bolushigha qarimay gérmaniyening würsburg shehiridin alayiten myunxén shehrige yétip kélip, "Uyghur herikiti" teshkilatining re'isi roshen abbas xanimning weten-millet yolida körsitiwatqan pidakarliqlirigha apirin éytti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet