“Uyghur herikiti” teshkilati tokyoda pa'aliyetchilerge terbiyelesh kursi achti

Enqeredin ixtiyariy muxbirimiz erkin tarim teyyarlidi
2025.01.20
Tokyoda-kurs-04 Merkizi amérikadiki “Uyghur herikiti” teshkilatining uyushturushi bilen yaponiye paytexti tokyoda Uyghur pa'aliyetchilerni terbiyelesh kursi échildi. 2025-Yili 19-yanwar, tokyo
RFA/Erkin Tarim

18-We 19-yanwar künliri merkizi amérikadiki “Uyghur herikiti” teshkilatining uyushturushi bilen yaponiye paytexti tokyoda Uyghur pa'aliyetchilerni terbiyelesh kursi échildi. Bu qétimliq kursta Uyghur pa'aliyetchilirining xelq'ara sorunlarda dunya jama'etchilikige, hökümetlerge, axbaratlargha we munasiwetlik ammiwi teshkilatlargha sherqiy türkistan dewasini qandaq anglitishning yolliri heqqide mexsus léksiyeler sözlen'gen.

Bu qétimliq kursqa yaponiyediki Uyghur pa'aliyetchiler ishtirak qilghan bolup, kursta ulargha yaponiyening emeliy ehwaligha mas halda, buning siyasiy atmosférasi, metbu'ati qatarliq qurulmilarni chüshen'gen halda, az adem küchi bilen yuqiri ünüm yaritish üchün qandaq taktikilarni qollansa bolidu? dégen témilarda nahayiti qimmetlik léksiyeler bérilgen.

“Uyghur herikiti” teshkilatining bashliqi roshen abbas xanim téléfon ziyaritimizni qobul qilip, bu kursni uyushturushtiki meqsiti toghrisida toxtilip mundaq dédi: “Xelqimiz bügünki künde tarixta körülüp baqmighan eng éghir qismetlerni béshidin ötküzmekte. Muhajirettiki Uyghurlar bolsa weten we millitini qutuldurush üchün qolidin kélishiche tirishchanliq körsetmekte. Sherqiy türkistanning musteqilliqi bizge qachan nésip bolidu, biz bilmeymiz. Lékin küreshlirimizni dawamlashturushimiz kérek. Millitimizning éghir weziyitini Uyghurlar özliri turuwatqan döletlerde qandaq qilghanda ünümlük anglitip, utuqlarni qolgha keltüreleymiz? bularni ögitish meqsiti bilen uyushturghan iduq. Ünümlük boldi dep oylaymen.”

Merkizi amérikadiki “Uyghur herikiti” teshkilatining uyushturushi bilen yaponiye paytexti tokyoda Uyghur pa'aliyetchilerni terbiyelesh kursi échildi. 2025-Yili 19-yanwar, tokyo
Merkizi amérikadiki “Uyghur herikiti” teshkilatining uyushturushi bilen yaponiye paytexti tokyoda Uyghur pa'aliyetchilerni terbiyelesh kursi échildi. 2025-Yili 19-yanwar, tokyo
RFA/Erkin Tarim

Ikki kün dawam qilghan terbiyelesh kursida, amérika qoshma ishtatlirining sabiq dunya ayallar ishliri alahide elchisi kélliy kurriy (Kelley Currie) xanim, amérikadiki jorj washin'gton uniwérsitéti xelq'ara tetqiqat türining diréktori, ottura asiya mesililiri mutexessisi piroféssor shan robérts (Sean Roberts), teywen parlaménti kishilik hoquq komitétining bash katipliq wezipisi ötewatqan örkesh dölet ependi, kanada albérta Uyghur jem'iyitining re'isi mukerrem qurban xanim we bezi zhurnalistlar her xil témilarda léksiye sözligen. Mukerrem qurban xanim bu toghriliq melumat bérip mundaq dédi: “Bu kursqa qatnashqan xanim-qizlar, erler we yashlar hemmisi ikki künlük kurstin kéyin yaxshi nep alghanliqini we köp yéngi uchurlargha ige bolghanliqini, özi ögen'gen bu uchurlarni dewa yolida qollinidighanliqini éytishti. ”

Mezkur kursta sabiq amérika dunya ayallar ishliri alahide elchisi kélliy kurriy (Kelley Currie) xanim “Hökümet we xelq'araliq teshkilatlar bilen ünümlük arilishish” témisida léksiye bergen. U, bergen léksiyeside Uyghur xanim-qizlirining pütün dunyagha xoja bolimen dewatqan xitay döliti bilen robiro küresh qiliwatqanliqini, bu dewani téximu kücheytken halda dawamlashturushi kéreklikini tekitligen. Mukerrem qurban xanim bu heqte toxtaldi.

Yaponiyening tokyo shehiride ötküzülgen ikki künlük kursqa yandash halda, amérikaning tokyodiki elchixanisida Uyghur mesilisige béghishlan'ghan höjjetlik filimni qoyush pa'aliyiti ötküzülgen. Yaponiye Uyghur jem'iyiti re'isi exmet létip ependi pa'aliyet heqqide melumat bérip mundaq dédi: “Bu pa'aliyetke amérika elchixanisimu munasiwetlik ademlirige teklipname yollighan. Bizmu qollighuchi siyasiyonlargha, ammiwi teshkilat mes'ullirigha, metbu'atlargha teklip ewetip bu pa'aliyetke qatnashturduq. Buning netijiside yaponiyediki eng chong gézitlerdin biri bolghan ‛yomi'uri géziti‚ bu pa'aliyetning tepsilatini, jewher xanimni ziyaret qilghan bir xewerni élan qildi. Buninggha xitayning yaponiyede turushluq bash elchisi derhal x te xewer tarqitip, mezkur gézitning bu xewerni élan qilghanliqi üchün xitaydin epu sorishini, derhal xewerni tüzitishi kéreklikini dep, éghir tenqid qildi. Démek bu xitaygha tesir qildi.”

Merkizi amérikadiki “Uyghur herikiti” teshkilatining uyushturushi bilen yaponiye paytexti tokyoda Uyghur pa'aliyetchilerni terbiyelesh kursi échildi. 2025-Yili 19-yanwar, tokyo
Merkizi amérikadiki “Uyghur herikiti” teshkilatining uyushturushi bilen yaponiye paytexti tokyoda Uyghur pa'aliyetchilerni terbiyelesh kursi échildi. 2025-Yili 19-yanwar, tokyo
RFA/Erkin Tarim

Uyghur pa'aliyetchilerni terbiyelesh kursigha qatnashqan yaponiye Uyghur jem'iyitining teptishi, dunya Uyghur qurultiyining mu'awin teptishi ghalip mijit ependi 18-we 19-yanwar künliri ötküzülgen terbiyelesh kursida köp yéngi melumatlarni ögen'genlikini bu xil kurslarning dunyaning her qaysi jaylirida dawamliq ötküzülüshi kérekliki tekitlidi.

Merkizi amérikadiki “Uyghur herikiti” teshkilati 2023-yili 11-12-féwral künliri yaponiyening tokyo shehiridiki shinjuku méhmanxanisida Uyghur xanim-qizlirini terbiyelesh kursi ötküzgenidi.

 Uyghur herikiti teshkilati hazirghiche awstriye, awstraliye, kanada, gérmaniye, yaponiye, gollandiye, firansiye, shiwétsiye we türkiye qatarliq 15 dölette Uyghur yashlirini terbiyelesh kursi ötküzgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.