Tramp hökümiti: “Xitayning Uyghurlargha qiliwatqanliri irqiy qirghinchiliqtur!”

Muxbirimiz eziz
2021.01.19
Tramp hökümiti: “Xitayning Uyghurlargha qiliwatqanliri irqiy qirghinchiliqtur!” Tramp hökümiti 2021-yili 19-yanwar küni “Xitay hökümitining Uyghurlar we bashqa musulman xelqlerge qiliwatqan zor kölemlik basturush herkiti irqiy qirghinchiliq hemde insaniyetke qarshi jinayettur” dep xulase chiqardi.
Social Media

Uyghur diyaridiki zor kölemlik siyasiy basturush hemde Uyghur jem'iyiti duch kéliwatqan éghir ijtima'i‍y paji'eler heqqide ötken yillardin buyan melum bolushqa bashlighan ghayet zor delil-ispatlar seweblik tramp hökümiti 2021-yili 19-yanwar küni “Xitay hökümitining Uyghurlar we bashqa musulman xelqlerge qiliwatqan zor kölemlik basturush herkiti irqiy qirghinchiliq hemde insaniyetke qarshi jinayettur” dep xulase chiqardi.

Bu tramp hökümitining aqsaraydin ayrilish harpisida chiqarghan eng muhim qararlardin biri bolup, gherp dunyasida ghayet zor tesir qozghidi. Amérika tashqiy ishlar ministiri mayk pompéyo bu munasiwet bilen qilghan sözide “Xitay kompartiyesining Uyghurlargha qandaq zulum séliwatqanliqini yéqindin közitip kéliwatimiz. Ularning Uyghurlarni milyonlap lagérgha qamishi we mejburiy emgekke sélishi, ularni eng eqelliy insaniy hoquqlardin mehrum qaldurushi, Uyghur ayallirini tughmas qiliwétishi, Uyghur qiz-chokanlirini mejburiy yosunda xitaylar bilen toylashturushi hemde Uyghur gödeklirini a'ilisidin juda qilishi qatarliq pakitlargha asasen biz buni qirghinchiliq dep qaraymiz” dédi. Shuningdek dunyaning hazir bir pütün milletni sistémiliq halda yoq qiliwétish herkitige shahid boluwatqanliqini alahide eskertti.

Roytéris agéntliqining 19-yanwardiki xewiride éytilishiche, mezkur qarar amérika dölet mejlisidiki köp qétimliq guwahliq bérish yighinliri hemde keskin munaziriler, shuningdek köpligen kolléktip tehlil we muhakime basquchliridin ötkendin kéyin élan qilin'ghan tolimu salmaqliq qarar iken.

Melum bolushiche, amérikaning prézidéntliq saylimi mezgilide jow baydinmu Uyghurlarning qirghinchiliqqa uchrawatqanliqini köp qétimlap ashkara sorunlarda tilgha alghan hemde Uyghurlar mesilisi tüpeylidin shi jinpingni “Uchigha chiqqan siyasiy lükchek” dep tenqidligen idi. Emdilikte yéngi hökümet ish bashlash harpisida amérika hökümitining bundaq bir tarixiy ehmiyetlik bir qararni élishi gherp dunyasidiki hökümetlerge téximu zor heydekchilik qilish rolini oynishi, shundaqla buninggha mas halda bir qatar yéngi tedbirlerning otturigha chiqishi texmin qilinmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.