Хотән педагогика алий техникоминиң муавин мудири барат турсунбақиниң керийә түрмисидә икәнлики ашкариланди
2019.11.27
Үрүмчи билән турпанниң арилиқиға селинған “тәрбийәләш лагери” ниң сиртқи көрүнүши. 2018-Йили 4-сентәбир.
REUTERS
Өткән айларда торларда уйғур районидики мәлум бир алий мәктәпниң сиясий өгиниш йиғининиң нәқ мәйдани икәнлики илгири сүрүлгән бир хитайчә аваз хатириси тарқалған иди. Униңда маарип саһәсидин тутқун қилинған аталмиш “икки йүзлимичи” вә “бөлгүнчи” мәктәп мудирлири тилға елинған иди. Униңда хотән педагогика алий техникоминиң икки мудириниңму тутқунда икәнлики баян қилинған. Мухбиримизниң бу йип учиға асасән елип барған телефон зиярәтлири давамида мәзкур мәктәпниң муавин мудири барат турсунбақиниң бир йил бурун тутулғанлиқи вә нөвәттә керийә түрмисидә икәнлики ашкариланди.
Үрүмчидики мәлум бир алий мәктәпниң йиғин залида хатириләнгәнлики илгири сүрүлгән мәзкур аваз хатирисидә хотән педагогика алий техникоминиң икки мудириниңму бөлгүчилик сәвәбидин тутқунда икәнлики тилға елинған.
Паалийәтчи абдувәли аюп тәрипидин рәтләнгән “тутқундики зиялийлар тизимлики” дә мәзкур мәктәпниң мудири барат турсунбақиниң исмиму тилға елинған. Бу һәқтә мәзкур мәктәпкә телефон қилғинимизда мәктәпниң ишхана хадими өзиниң йеңидин ишқа чүшкәнликини сәвәб қилип көрситип, бу мәктәпниң тутқундики мудирлири һәққидә мәлумати йоқлуқини ейтти. Биз униңдин мәктәпниң нөвәттики мудириниң ким икәнликини сориғинимизда у “әркин ибраһим” дәп җаваб бәрди.
Биз бу хадим тәминлигән телефон номуриға асасән мәктәпниң мәзкур әһвалдин хәвәрдар бир сабиқ хадимидин мәлумат соридуқ. Өзиниң садиқ бир компартийә әзаси икәнликини тәкитлигән бу хадим барат турсунбақиниң бир йил бурун тутулғанлиқи вә нөвәттә керийәдики бир түрмидә икәнликини ашкарилиди.
Дейилишичә, бу йил 50 яшлар чамисидики барат турсунбақи әслидә хитай тили оқутқучиси болуп 20 нәччә йил мәзкур мәктәптә хизмәт қилған икән. Узун мәзгил мәктәп ишхана мудири болуп ишлигән барат турсунбақи техи йеқиндила муавин мудирлиққа өстүрүлгән икән. У өткән йили намәлум сәвәб билән тутқун қилинған.
Мәлум болушичә, барат турсунбақи йиғивелиш лагерида әмәс, бәлки керийәдики наһийә базиридин чәт җайға җайлашқан бир түрмидә қамилип ятмақтикән.
Көп көрүлгән хәвәрләр
RFA
- Шинҗаң һөкүмити йеқинда тәмбур чалған уйғур қизниң видийосини тартқан хитай сәнәткарни җазалиған
- Әркин асия радийоси уйғур бөлүми: хитайниң уйғурлар үстидики шәпқәтсиз һөкүмранлиқиниң зулмәтлирини йерип өткүчи нур
- Уйғур кишилик һоқуқ қурулуши хәлқаралиқ меһманхана зәнҗирлириниң уйғур районида кеңийиватқанлиқини әйибләп доклат елан қилди
- Хитай һөкүмити уйғур сәнәткарларни явропада оюн қойғузуп уйғур ирқий қирғинчилиқини ююшқа урунған дәп әйибләнмәктә
- Анализчилар: президент трампиниң хитайға қойған беҗи ши җинпиңниң һали әң хараб вақтиға тоғра кәлди
Көп көрүлгән хәвәрләр
Тәпсилий хәвәр
- Украина һөкүмити қолида хитайниң русийәгә қорал-ярақ тәминлигәнликиниң дәлили барлиқини билдүрди
- Америка һөкүмитиниң хитайға қойған таможна беҗиниң омумий нисбити 245 пирсәнткә йәткән
- Хитайниң америка билән сода урушини давамлаштуриши өзиниң иқтисадиға зор қийинчилиқ елип келидикән
- Америка президенти трамп хитай билән йеқинда таможна беҗи мәсилисидә келишидиғанлиқини елан қилди
- Хитай һөкүмити америка билән хитай арисидики сода урушиниң ақивитидин қаттиқ әндишә қилмақта