Xoten pédagogika aliy téxnikomining mu'awin mudiri barat tursunbaqining kériye türmiside ikenliki ashkarilandi

Muxbirimiz shöhret hoshur
2019-11-27
Élxet
Pikir
Share
Print
Ürümchi bilen turpanning ariliqigha sélin'ghan "Terbiyelesh lagéri" ning sirtqi körünüshi. 2018-Yili 4-séntebir.
Ürümchi bilen turpanning ariliqigha sélin'ghan "Terbiyelesh lagéri" ning sirtqi körünüshi. 2018-Yili 4-séntebir.
REUTERS

Ötken aylarda torlarda Uyghur rayonidiki melum bir aliy mektepning siyasiy öginish yighinining neq meydani ikenliki ilgiri sürülgen bir xitayche awaz xatirisi tarqalghan idi. Uningda ma'arip sahesidin tutqun qilin'ghan atalmish "Ikki yüzlimichi" we "Bölgünchi" mektep mudirliri tilgha élin'ghan idi. Uningda xoten pédagogika aliy téxnikomining ikki mudiriningmu tutqunda ikenliki bayan qilin'ghan. Muxbirimizning bu yip uchigha asasen élip barghan téléfon ziyaretliri dawamida mezkur mektepning mu'awin mudiri barat tursunbaqining bir yil burun tutulghanliqi we nöwette kériye türmiside ikenliki ashkarilandi.

Ürümchidiki melum bir aliy mektepning yighin zalida xatirilen'genliki ilgiri sürülgen mezkur awaz xatiriside xoten pédagogika aliy téxnikomining ikki mudiriningmu bölgüchilik sewebidin tutqunda ikenliki tilgha élin'ghan.

Pa'aliyetchi abduweli ayup teripidin retlen'gen "Tutqundiki ziyaliylar tizimliki" de mezkur mektepning mudiri barat tursunbaqining ismimu tilgha élin'ghan. Bu heqte mezkur mektepke téléfon qilghinimizda mektepning ishxana xadimi özining yéngidin ishqa chüshkenlikini seweb qilip körsitip, bu mektepning tutqundiki mudirliri heqqide melumati yoqluqini éytti. Biz uningdin mektepning nöwettiki mudirining kim ikenlikini sorighinimizda u "Erkin ibrahim" dep jawab berdi.

Biz bu xadim teminligen téléfon nomurigha asasen mektepning mezkur ehwaldin xewerdar bir sabiq xadimidin melumat soriduq. Özining sadiq bir kompartiye ezasi ikenlikini tekitligen bu xadim barat tursunbaqining bir yil burun tutulghanliqi we nöwette kériyediki bir türmide ikenlikini ashkarilidi.

Déyilishiche, bu yil 50 yashlar chamisidiki barat tursunbaqi eslide xitay tili oqutquchisi bolup 20 nechche yil mezkur mektepte xizmet qilghan iken. Uzun mezgil mektep ishxana mudiri bolup ishligen barat tursunbaqi téxi yéqindila mu'awin mudirliqqa östürülgen iken. U ötken yili namelum seweb bilen tutqun qilin'ghan.

Melum bolushiche, barat tursunbaqi yighiwélish lagérida emes, belki kériyediki nahiye baziridin chet jaygha jaylashqan bir türmide qamilip yatmaqtiken.

Toluq bet