Абдуқадир: акамниң мал-мүлки мусадирә қилинған вә өзиниң из-дерики йоқ

Мухбиримиз нуриман
2020-03-11
Елхәт
Пикир
Share
Принт
«Шинҗаң рәйһан био пән-техника чәклик ширкити» ниң директори исмайилҗан абдуваһид дубайда чүшкән сүрити.
«Шинҗаң рәйһан био пән-техника чәклик ширкити» ниң директори исмайилҗан абдуваһид дубайда чүшкән сүрити.
Photo: RFA

Үрүмчидики «шинҗаң рәйһан био пән-техника чәклик ширкити» ниң директори исмайилҗан абдуваһидниң 2018-йили 4-айда тутқун қилинғандин һазирғичә һечқандақ хәвири болмиған вә униң бир милйон доллар қиммитидики мал-мүлкиниң мусадирә қилинғанлиқи мәлум.

Исмаил абдуваһидниң америкида турушлуқ иниси абдуқадир акисиниң әһвали вә башқа уруқ-туғқанлириниң әһваллирини һәр хил қаналлар арқилиқ сүрүштүрүши нәтиҗисидә акисиниң тутуп кетилгәнлики һәм ширкитиниң мал-мүлүклириниң мусадирә қилинғанлиқини игилигән.

Униң билдүрүшичә, ширкәтниң акисиниң намидики пул, өй вә машинилири һәтта ширкәтниң намида болмиған дадисиниң намидики өй, машина қатарлиқ барлиқ мал-мүлүклири мусадирә қилинған шуниңдәк ширкәт тохтитилған.

Биз абдуқадирниң тәминлигән учури бойичә, «шинҗаң рәйһан био пән-техника чәклик ширкити» ниң телефон номурлириға телефон қилған болсақму, бу номурлар уланмиди. Һәтта мәзкур ширкәтниң уйғурчә тор адресиму ечилмиди. Игилишимизчә бу тор адреси 2018-йили 5-айдин башлап ечилмиған.

«Шинҗаң рәйһан био пән-техника чәклик ширкити» 2006-йили қурулған болуп, хитайлар арисидиму яқтурушқа еришип, хитайниң 18 өлкә вә шәһәрлиридә вакалитән сетиш орни тәсис қилинғаникән. Һелиһәм хитайчә тор бекәтлиридә «гүли рәйһан» маркилиқ хенә буюмлириниң кона еланлирини тапқили болидикән. Ширкәт «гүли рәйһан» маркисини чәтәлләргичә кеңәйткән болуп, дубәйдики бир ширкәт билән бирлишип үнчә-марҗан билән безәлгән сомка ишләпчиқирип уйғур районидики базарларға салған. Ширкәтниң өзидә 18 ишчи-хизмәтчи ишләйдиған болуп, йиллиқ оттуричә сетиш кирими бир милйон 300 миң сомдин бир йерим милйон сомғичә болғаникән.

Ширкәтниң баш директори исмайилҗан абдуваһид яш игилик тиклигүчиләрдин болуп, «шинҗаң сода-санаәтчиләр бирләшмиси» ниң әзаси, «яш карханичилар уюшмиси» ниң даимий әзалиқиға сайланған. Иниси абдуқадир бу һәқтә тохтилип: «хитай өзи бәргән унванларни өзи инкар қилип акамни тутуп кәтти» деди.

Абдуқадир мундақ деди: «акам исмайилҗан абдуваһид 1984 йили туғулған, 2006 йили үрүмчидә шинҗаң рәйһан био техника ширкитини қурған, ширкәт қурулуп қисқиғинә 5 йил ичидә йәрлик мәһсулатлиримизни дөләт ичи вә сиртида базарға селип тонутқан вә ишсиз яшларни хизмәт пурсити билән тәминләп районимиздики ишсизлиқ нисбитини төвәнлитишкә бир кишилик төһписини қошқан, акам йәнә чиңхуа университетиниң сода-санаәт башқуруш (MBA) мәхсус кәспидә тәрбийилинип оқуш пүттүргән, акамни бу нәтиҗилирини көргәндин кейин һөкүмәт өзи акамға шинҗаң сода-санаәтчиләр бирләшмисиниң әзаси, яш карханичилар уюшмисиниң даимий әзаси, мунәввәр карханичи, игилик тикләштики үлгилик шәхс қатарлиқ намларни бәргән иди. Акамниң қайта тәрбийәлиниши еһтияҗи йоқ».

Абдуқадир өзиниң аилисидикиләр болған алақисиниң 2017-йили апрелдин башлап үзүлгәнликини ейтип: ахирқи қетим үндидар арқилиқ алақиләшкинимдә ата-анамниң маңа дегән гепи: ‹балам биз сени издимигүчә сән бизни издимигин, биз сәндин рази, сәнму биздин рази болғин, өзүңни асрап яхши яша. Аман бол! 'дегән сөзләр болди, җаваб қайтурушқиму үлгүрәлмидим». Деди.

Абдуқадирниң ейтишичә, униңға акиси вә аилә әзалириниң тутқун қилинғанлиқи вә мал-мүлкиниң мусадирә қилинғанлиқиға аит учурларни тәминлигән, ичкири хитайда туридиған мәлум бир кишиму узун өтмәй униң билән болған алақисини үзүвәткәнлики үчүн у йеқинқи вақитларда юртидики аилә әзалириниң әһваллиридин хәвәрсиз қалған.

Пикирләр (0)
Share
Толуқ бәт