Abduqadir: akamning mal-mülki musadire qilin'ghan we özining iz-dériki yoq

Muxbirimiz nur'iman
2020-03-11
Élxet
Pikir
Share
Print
"Shinjang reyhan bi'o pen-téxnika cheklik shirkiti" ning diréktori ismayiljan abduwahid dubayda chüshken süriti.
"Shinjang reyhan bi'o pen-téxnika cheklik shirkiti" ning diréktori ismayiljan abduwahid dubayda chüshken süriti.
Photo: RFA

Ürümchidiki "Shinjang reyhan bi'o pen-téxnika cheklik shirkiti" ning diréktori ismayiljan abduwahidning 2018-yili 4-ayda tutqun qilin'ghandin hazirghiche héchqandaq xewiri bolmighan we uning bir milyon dollar qimmitidiki mal-mülkining musadire qilin'ghanliqi melum.

Isma'il abduwahidning amérikida turushluq inisi abduqadir akisining ehwali we bashqa uruq-tughqanlirining ehwallirini her xil qanallar arqiliq sürüshtürüshi netijiside akisining tutup kétilgenliki hem shirkitining mal-mülüklirining musadire qilin'ghanliqini igiligen.

Uning bildürüshiche, shirketning akisining namidiki pul, öy we mashiniliri hetta shirketning namida bolmighan dadisining namidiki öy, mashina qatarliq barliq mal-mülükliri musadire qilin'ghan shuningdek shirket toxtitilghan.

Biz abduqadirning teminligen uchuri boyiche, "Shinjang reyhan bi'o pen-téxnika cheklik shirkiti" ning téléfon nomurlirigha téléfon qilghan bolsaqmu, bu nomurlar ulanmidi. Hetta mezkur shirketning Uyghurche tor adrésimu échilmidi. Igilishimizche bu tor adrési 2018-yili 5-aydin bashlap échilmighan.

"Shinjang reyhan bi'o pen-téxnika cheklik shirkiti" 2006-yili qurulghan bolup, xitaylar arisidimu yaqturushqa ériship, xitayning 18 ölke we sheherliride wakaliten sétish orni tesis qilin'ghaniken. Hélihem xitayche tor béketliride "Güli reyhan" markiliq xéne buyumlirining kona élanlirini tapqili bolidiken. Shirket "Güli reyhan" markisini chet'ellergiche kéngeytken bolup, dubeydiki bir shirket bilen birliship ünche-marjan bilen bézelgen somka ishlepchiqirip Uyghur rayonidiki bazarlargha salghan. Shirketning özide 18 ishchi-xizmetchi ishleydighan bolup, yilliq otturiche sétish kirimi bir milyon 300 ming somdin bir yérim milyon somghiche bolghaniken.

Shirketning bash diréktori ismayiljan abduwahid yash igilik tikligüchilerdin bolup, "Shinjang soda-sana'etchiler birleshmisi" ning ezasi, "Yash karxanichilar uyushmisi" ning da'imiy ezaliqigha saylan'ghan. Inisi abduqadir bu heqte toxtilip: "Xitay özi bergen unwanlarni özi inkar qilip akamni tutup ketti" dédi.

Abduqadir mundaq dédi: "Akam ismayiljan abduwahid 1984 yili tughulghan, 2006 yili ürümchide shinjang reyhan bi'o téxnika shirkitini qurghan, shirket qurulup qisqighine 5 yil ichide yerlik mehsulatlirimizni dölet ichi we sirtida bazargha sélip tonutqan we ishsiz yashlarni xizmet pursiti bilen teminlep rayonimizdiki ishsizliq nisbitini töwenlitishke bir kishilik töhpisini qoshqan, akam yene chingxu'a uniwérsitétining soda-sana'et bashqurush (MBA) mexsus kespide terbiyilinip oqush püttürgen, akamni bu netijilirini körgendin kéyin hökümet özi akamgha shinjang soda-sana'etchiler birleshmisining ezasi, yash karxanichilar uyushmisining da'imiy ezasi, munewwer karxanichi, igilik tikleshtiki ülgilik shexs qatarliq namlarni bergen idi. Akamning qayta terbiyelinishi éhtiyaji yoq".

Abduqadir özining a'ilisidikiler bolghan alaqisining 2017-yili apréldin bashlap üzülgenlikini éytip: axirqi qétim ündidar arqiliq alaqileshkinimde ata-anamning manga dégen gépi: 'balam biz séni izdimigüche sen bizni izdimigin, biz sendin razi, senmu bizdin razi bolghin, özüngni asrap yaxshi yasha. Aman bol! 'dégen sözler boldi, jawab qayturushqimu ülgürelmidim". Dédi.

Abduqadirning éytishiche, uninggha akisi we a'ile ezalirining tutqun qilin'ghanliqi we mal-mülkining musadire qilin'ghanliqigha a'it uchurlarni teminligen, ichkiri xitayda turidighan melum bir kishimu uzun ötmey uning bilen bolghan alaqisini üzüwetkenliki üchün u yéqinqi waqitlarda yurtidiki a'ile ezalirining ehwalliridin xewersiz qalghan.

Toluq bet