Тәңгитағ сода сарай зәнҗириниң саһиблири, ака-ука милярдер рәхмутулла сәмәт вә абдусопур сәмәт 20 йиллиқтин кесилгән

Мухбиримиз шөһрәт һошур
2021-06-03
Share
Тәңгитағ сода сарай зәнҗириниң саһиблири, ака-ука милярдер рәхмутулла сәмәт вә абдусопур сәмәт 20 йиллиқтин кесилгән 20 Йиллиқтин кесиветилгәнлики дәлилләнгән, тәңгитағ сода сарай зәнҗириниң саһиби, ака-ука милиярдерлар рәхмутулла сәмәт(солда) вә абдусопур сәмәт.
Oqurmen teminligen

Норвегийәдики уйғуряр фонди уйғур районининиң атуш шәһиридинла 200 нәччә сода карханичиниң тутқун қилинғанлиқини архиплаштурғаниди. Уйғуряр фонди мәзкур архиптикиләрдин 4 нәпәр милярдерниң өткән айниң биринчи һәптиси сотланғанлиқи һәққидә учур алған. Мухбиримизниң ениқлашлири давамида, сотланғанлардин, тәңгитағ сода сарай зәнҗириниң саһиби, ака-ука милиярдерлар рәхмутулла сәмәт билән абдусопур сәмәтниң 20 йиллиқтин кесиветилгәнлики дәлилләнди. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Норвегийәдики уйғуряр фонди 2019-йили елип барған бир қатар тәкшүрүшлири нәтиҗисидә, содисини атушта башлап уйғур райони вә чәтәлләргичә кеңәйткән 200 дин артуқ сода-карханичиниң тутқунда икәнликини ениқлап чиққан вә уларниң архиплирини алақидар хәлқара орган вә ахбаратларға йоллиғаниди. Алақидар органларниң бу һәқтики тәкшүрүшлири давам қиливатқан мәзгилдә, уйғуряр фонди, улардин 4 милярдерниң өткән айниң 1-һәптиси сотланғанлиқи һәққидә учур алған. Булардин иккиси үрүмчи булақбешидики тәңгитағ сода сарай зәнҗириниң саһиблири ака-ука милиярдер рәхмутулла сәмәт билән абдусопур сәмәттур.

Атуш шәһәрлик сот мәһкимиси хадими, өткән айда сотланғанлар ичидә рәхмутулла сәмәт вә абдусопур сәмәт исимлики ака-ука милярдерларниң бар-йоқлуқини сориғинимизда, соаллиримизға җаваб беришни рәт қилди.

Мәзкур ака-укиларниң содиси вә иш-излирини узундин буян көзитип келиватқан уйғуряр фондиниң қурғучиси абдувәли аюпниң тонуштурушичә, уларниң иликидә бәш ширкити, уйғур райони бойичә 9 наһийә вә шәһәрдә тәңгитағ намида сода сарайлири бар болуп, мәблиғи бир қанчә милярд йүәндин ашидикән. Улар аз өй-мүлүк, йемәк-ичмәк, аптомобил, чегра содиси қатарлиқ көп саһәләрдә сода қиливатқаникән. Бәйду учур амбиридики материяллардиму, рәхмутулла сәмәт, абдусопур сәмәт вә абдухелил сәмәт қатарлиқ үч ака-укиниң қолида җәмий 10 ға йеқин ширкәт барлиқи, булардин иккисиниңла 50 милйон вә 30 милйон йүәнлик мәблиғи барлиқи қәйт қилинған.

Қизилсу оттура сот мәһкимиси мәзкур ака-укилар һәққидә учур елишимиз үчүн, атушқа келишимизни тәвсийә қилди, әмма уларниң тутқунда икәнликини рәт қилмиди.

Уйғуряр фондиниң тутқундики уйғур содигәрләр һәққидики архипида қәйт қилинишичә, уйғур содигәрләрниң тутқун қилинишида, нисбәтән омумийлиққа игә болған 10 нәччә хил сәвәб бар болуп, рәхмутулла сәмәт вә абдусопур сәмәтләрниң тутқун қилинишида, уларниң сода сарайлириниң миллий бинакарлиқ услубида селиниши, бу сәвәбтин уйғур содигәрләр мәркәзләшкән содиға базириға айлинипла қалмастин чәтәллик саяһәтчиләрниңму диққәт мәркизигә айлиниши асаслиқ сәвәб болған.

Мәлум болушичә, бу ака-ука милярдерлар һөкүмәт билән мунасивәтлири давамида һәддидин зиядә еһтиятчан позитсийә тутуп кәлгән. Шуңа улар бир мәзгил даириләр тәрипидин әтиварланған йәни рәхмутулла сәмәт аптоном районлуқ сода-санаәтчиләр бирләшмисиниң муавин рәисликигә қәдәр вәзипидар болған болсиму, йәнила ақивәттә, уйғурлуқ салаһийитиниң бәдилини төләштин сақлиналмиған, төлигәндиму хели еғир төлигән: ака-ука иккиси 20 йиллиқтин кесилгәндин башқа, пүтүн мал дуняси мусадирә қилинған.

Қизилсу сот мәһкимисиниң йәнә бир хадими, мәзкур ака-укилар һәққидә өткән айда сот ечилип болғанлиқини баян қилиш арқилиқ, улар һәққидики учурларниң асасән дегүдәк тоғра икәнликини дәлиллиди.

Абдувәли аюпниң йәнә әскәртишичә, бу ака-укилар, хитайниң сиясий кеңәш, хәлқ қурултийи қатарлиқ органлирида юқири мәнсәп тутқан мәзгиллиридиму, сақчиларниң тутуш вә сорақ қилишлиридин сақлиналмиған. Абдувәли аюп өзи тутқундики мәзгилидә, рәхмутулла сәмәтму бир қетим тутқун қилинған болуп, абдувәли аюп уни сорақ қилған сорақчиларниң сорақ җәряни вә тәсиратидин хәвәр тапқан.

Рәхмутулла сәмәтниң абдухелил сәмәт исимлик йәнә қериндишиниң бар болуп, униң нөвәттики тәқдири һәққидә һечқандақ учур мәлум әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт