Uyghur rézhissor memetjan semetning “Axirlishishni kütüsh” namliq filimi heqqide mexsus söhbet

2024-Yili 2-ayning 10-küni kech sa'et 6 de, amérika wirjiniye shtatining arlington shehiridiki AMC kino merkizide los-anzhélésta turushluq kespiy kino rézhissori we sénarist memetjan semetning “Axirlishishni kütüsh” namliq tunji filimining qoyulush murasimi ‍ötküzüldi.

“Axirlishishni kütüsh” namliq bu filim memetjan semetning muhajiret hayatida ishligen tunji kinosi bolup, uningda chet elde yashawatqan bir Uyghur yashning wetini sherqiy türkistanda qalghan dadisining xitay saqchiliri teripidin tutulup kétishi, a'ilisi bilen bolghan pütkül alaqilirining üzülüshi, shundaqla bir a'ile kishilirining shuningdin kéyinki astin-üstün bolup ketken échinishliq hayati teswirlen'gen. Bu filim muhajirettiki Uyghur yashliri bashtin kechürüwatqan köp qatlamliq müshkülatlarni chongqur teswirlep, kimlik, siyasiy qarash we shexsiy munasiwet qatarliq murekkep témilarni chongqur eks ettürgen. Bu filimda wetendiki Uyghurlarning ehwali heqqide biwasite uchur bérilmigen bolsimu, emma u yerde yüz bériwatqan tragédiyelik ré'alliqni amérika taratqulirining közniki arqiliq yorutushqa tirishqan, shundaqla bu arqiliq Uyghurlar wetinide yüz bériwatqan irqiy qirghinchiliqining muhajirettiki Uyghur yashlirigha élip kelgen biwasite we wasitilik tesirliri janliq détallar arqiliq ekis-ettürülgen.

RFA/Shehrizad

Memetjan semet kichikidin bashlapla yéziqchiliq bilen shughullinishqa bashlighan bolup, u uniwérsitétta oquwatqan mezgilliride qisqa filimlarni ishleshke bashlighan. U amérikagha kelgendin kéyinmu özining bu kespiy arzusidin héchqachan waz kechmigen. Özining bu sahediki uzun mezgillik tejribiliri, qaytmas iradisi, xeterge tewekkül qilish xaraktéri we kino sen'itige bolghan küchlük ishtiyaqi bilen bir heweskar filim ishligüchidin axiri kespiy filim ishligüchige aylan'ghan.

“Axirlishishni kütüsh” 2023-yili 1-ayda süretke élinishqa bashlighan bolup, resmiy kino bazirigha sélin'ghuche bir yildin köprek waqit ketken. Bu filim amérikada bir Uyghur rézhissorluq qilghan, Uyghurlar rol alghan, Uyghurlarning hayati teswirlen'gen, shundaqla Uyghurlar wetinidiki irqiy qirghinchiliq arqa körünüsh qilin'ghan tunji filimdur. Bu filim özining yuqiriqidek alahidilikliri bilen muhajirettiki Uyghurlarning hayati we Uyghur kinochiliqidiki bir yéngi qedem bolup qalghusi. Bu filimning ishlinishidin resmiy pütüp qoyulushighiche bolghan jeryanda, amérikadiki yazghuchi we rézhissor tahir hamut izgilge oxshash bir qisim kespiy xadimlar, Uyghur teshkilatliri we Uyghur réstoranliri yardemde bolghan. Ular mezkur filimda rol élishqa qatnashqan amérikaliq artistlar we kespi xadimlarning Uyghurlar teswirlen'gen bu filimni ishlesh jeryanida uchrighan mesililerni bir terep qilishigha köp qulayliqlarni yaritip bergen.

RFA/Shehrizad

Bu filimning qoyulush murasimigha washin'gton we wirjiniye etrapidiki Uyghurlarni asas qilghan 100 din artuq tamashibin qatnashti. Filim körsitilgendin kéyin, filim ishligüchi memetjan semet, filimda rol alghan artistlar we muzikantlar sehnige teklip qilinip, bu filimni ishlesh jeryanidiki bezi tesiratlirini tamashibinlar bilen ortaqlashti, shundaqla so'allargha jawab berdi.

Töwende biz bu filimning rézhissori, sénaristi we filim ishligüchisi bolghan memetjan semet ependi, kinodiki bash rolchi gheyret, shundaqla bir qisim tamashibinlar bilen ötküzgen söhbitimizni diqqitinglargha sunimiz.

Yuqiriqi awaz ulinishidin tepsilatini anglighaysiz.