"Uyghur kishilik hoquq siyasiti qanun layihesi" amérika kéngesh palatasida maqulluqtin ötti

Muxbirimiz jüme
2019-09-11
Élxet
Pikir
Share
Print
Amérika kéngesh palatasining ezasi marko rubyu ependi yighinda sözlimekte. 2019-Yili 21-awghust, filorida.
Amérika kéngesh palatasining ezasi marko rubyu ependi yighinda sözlimekte. 2019-Yili 21-awghust, filorida.
AP

11-Séntebir, "Uyghur kishilik hoquq siyasiti qanun layihesi" amérika kéngesh palatasida maqulluqtin ötüp, mezkur layihening resmiy qanun bolup maqullinish yolidiki eng muhim qedemlerning biri élindi.

Bu qanunning kéngesh palatasida maqulluqtin ötkenliki, qanunni bash bolup tonushturghan palata ezasi marko rubiyo we bob menendezlerning alqishigha érishti.

Palata ezasi rubiyo we menendezler bu heqte birlikte élan qilghan bayanatida mezkur qanunning Uyghurlargha qaritilghan basturush herikitining aldini élishta muhim ehmiyetke ige ikenlikini bildürdi.

Bayanatta mundaq déyildi: "Bu qanun layihesi mustebit xitay hökümitining shinjang Uyghur aptonom rayonida kölemleshtürgen dehshetlik kishilik hoquq depsendichiliki, jümlidin bir milyondin artuq Uyghur we bashqa musulman xelqlerni tutup turush lagérlirigha qamash qilmishigha qarshi turushtiki muhim qedemdur."

Bayanatta yene mezkur qanun layihening béyjing da'iriliri amérika puqraliri we amérikida menggülük turush ruxsiti alghan kishilerge qaratqan tehditlergimu taqabil turushta muhim ehmiyetke ige ikenliki bildürüldi.

Bayanatta neqil élishiche, palata ezasi rubiyo mundaq dédi: "Amérika hökümiti xitay kompartiyesining shinjangdiki sistémiliq we esheddiy kishilik hoquq depsendichiliki we belki insaniyetke qarishi jinayetlirini xéli burunla jawabkarliqqa tartishi kérek idi."

U yene amérika dölet mejlisi awam palatasini bu qanunni derhal awazgha qoyup maqulluqtin ötküzüshke chaqirdi.

Bob menendez ependim bu qanun layihening kéngesh palatasida tonushturulushigha bash bolghan erbablarning béridu.

Umu bu qanun layihening kéngesh palatasida maqulluqtin ötkenlikini tebriklidi.

U mundaq dédi: "Bu qanun layihesi milyonlighan Uyghur musulmanliri naheq qamilip, keng kölemlik teqibge muptila qilin'ghan we mustebit hakimiyet teripidin emgek lagérlirigha bend qilin'ghan peytte dölet mejlisining tetür qariwalmaydighanliqini namayan qilidu."

"Uyghur kishilik hoquq siyasiti qanun layihesi" 2018-yili noyabirda tunji qétim we 2019-yili baharda ‍ikkinchi qétim tüzitip tonushturulghan idi.

Qanun layihesi ilgiri kéngesh palatasining tashqi munasiwetler komitétida awazgha qoyulghan.

Eger bu qanun layihesi awam palatasida maqulluqtin ötse amérika prézidénti donald trampning aldigha élip kélinidu we prézidént imza qoyghandin kéyinla resmiy küchke ige bolidu.

Toluq bet