Amérikada "Uyghur kishilik hoquq qanun layihisi" ge qol qoydurush heptiliki bashlandi

Muxbirimiz méhriban
2019-10-16
Élxet
Pikir
Share
Print
16-Öktebirdin 23-öktebirgiche élip bérilidighan "Uyghur kishilik hoquq qanun layihisi" ge qol qoydurush heptilikining teshwiqat wereqisi. 2019-Yili öktebir.
16-Öktebirdin 23-öktebirgiche élip bérilidighan "Uyghur kishilik hoquq qanun layihisi" ge qol qoydurush heptilikining teshwiqat wereqisi. 2019-Yili öktebir.
Social Media

2019-Yil 11-séntebir küni "Uyghur kishilik hoquq siyasiti qanun layihisi" amérika kéngesh palatasining maqulluqidin ötkenliki élan qilin'ghan idi. Bu qanun layihisining kéngesh palatasida maqulluqtin ötkenliki Uyghurlarning weziyitini diqqet bilen közitip kéliwatqan közetküchilerning hem shundaqla chet'ellerdiki Uyghur jama'itining qizghin alqishigha érishti. Ular "Bu mezkur layihening resmiy qanun bolup ishqa kirishishidiki eng muhim qedemlerning biri," dep hésablimaqta.

Mezkur qanun layihesige qol qoyghan amérika dölet mejlisi ezalirining sani hazirgha qeder 100 din ashqan bolsimu, emma mezkur qanun layihisining bu yil axirighiche amérika prézidéntining huzurigha sunulup testiq sélinishi we resmiy küchke ige bolushi üchün yene amérika awam palatasidiki 400 din artuq parlamént ezasining yérimidin köprekining buni qollap imza qoyushi zörür iken. Shu sewebtin bu ish nöwette amérikadiki Uyghur jama'iti eng jiddiy köngül bölüwatqan mesililerning birige aylan'ghan.

Melum bolushiche, amérikadiki Uyghur kishilik hoquq qurulushi qatarliq teshkilatlar we amérikadiki Uyghur yashlirining hemkarliqida 16-öktebirdin bashlap dölet mejlisi ezalirini "Uyghur kishilik hoquq qanun layihesige imza qoydurush heptiliki" bashlan'ghan.

Uyghur kishilik hoquq qurulushining tetqiqatchisi zubeyre xanim bu munasiwet bilen radi'omiz ziyaritini qobul qildi. U amérikada "Uyghur kishilik hoquq qanun layihisi" ning bu yil axirighiche testiqtin ötüshini qolgha keltürüsh, uning resmiy qanun bolup ishqa kirishishi üchün awam palatasidiki ezalarning maqulluqidin ötüshini qolgha keltürüshning zörürlüki we texirsizlikini bildürdi.

Zubeyre xanim yene "Uyghur kishilik hoquq siyasiti qanun layihisi" ning Uyghurlar üchün qandaq ehmiyiti barliqi heqqidimu toxtaldi.

Amérikadiki Uyghur yashliridin elfidar xanim bilen firqet jewdet "Uyghur kishilik hoquq qanun layihesige qol qoydurush heptiliki" ning aktip teshkilligüchiliridin iken. 

Elfidar xanim "Uyghur kishilik hoquq siyasiti qanun layihisi" otturigha qoyulghandin tartip, bu yil 11-séntebir küni amérika kéngesh palatasining maqulluqidin ötkiche bolghan jeryandiki ehwallar heqqide toxtilip ötti.

Wirjiniye shtatidiki Uyghur yashliridin firqet jewdet 16-öktebir bashlan'ghan, "Uyghur kishilik hoquq qanun layihesige qol qoydurush heptiliki" ning konkrét orunlashturulush ehwali heqqide toxtaldi.

11-Séntebir küni mezkur qanun layihisi kéngesh palatadin ötkendin kéyin bu qanunni bash bolup tonushturghan palata ezasi marko rubiyo we bob menendez 11-séntebir küni birlikte élan qilghan bayanatida mezkur qanunning Uyghurlargha qaritilghan basturush herikitining aldini élishta muhim ehmiyetke ige ikenlikini bildürgen idi. Ular birleshme bayanatida: "Bu qanun layihisi mustebit xitay hökümitining shinjang Uyghur aptonom rayonida kölemleshtürgen dehshetlik kishilik hoquq depsendichiliki, jümlidin bir milyondin artuq Uyghur we bashqa musulman xelqlerni tutup turush lagérlirigha qamash qilmishigha qarshi turushtiki muhim qedemdur," dep körsetken.

Amérika tashqi ishlar ministiri mayk pompéyo Uyghur mesilisi üstide köp qétim toxtalghan bolup, u öz bayanlirida amérika qatarliq gherb démokratik döletler hökümetlirini xitayning Uyghur élidiki zulumini eyibleshke we emeliy tedbir qollinishqa chaqirghan idi.

Elfidar xanim ziyaritimiz axirida mezkur qanun layihisining bu yilning axirighiche bolghan 6 hepte ichide amérika awam palatasidinmu ötüp, amérika prézidéntining testiqlishigha sunulushi üchün nurghun tirishchanliqlarning zörür ikenlikini tekitlep ötti. U amérika tashqi ishlar ministiri mayk pompéyo, dölet mejlisi ezaliridin marko rubiyo we bob menendezge oxshash siyasiy erbablar shundaqla téximu köp bolghan awam palata ezalirining qollishini qolgha keltürüshte amérikadiki teshkilatlarning tirishchanliqidin bashqa yene amérikadiki her bir Uyghurning mes'uliyiti barliqini eskertip ötti. 

U yene démokratik döletlerde yashawatqan Uyghurlarning amérika hökümiti ichidiki Uyghurlarni yéqindin qollighan siyasiy erbablargha ayrim élxet yézish, ijtima'iy alaqe torlirida ularning Uyghur mesilisi heqqidiki bayanatlirigha qarita qollash awazi bérish, teshekkür inkaslirini yézishningmu nahayiti muhim ehmiyetke ige bolidighanliqini bildürdi.

Toluq bet