"Uyghur sot kollégiyesi" ning guwahliq anglash yighini tosqunluqqa uchrimaqta

Muxbirimiz nur'iman
2021-05-28
Share
Geoffrey-Nice-jefferi-nayis-2.jpg Kishilik hoquq adwokati jéfféri nayis(Geoffrey Nice) ependi(soldin birinchi) xitayning kishilik hoquq depsendichilikige guwahliq bérish sotida. 2018-Yili dékabir, london.
Photo: RFA

En'gliyening london shehiride dangliq kishilik hoquq adwokati jéfféri nayis bashchiliqida qurulghan "Uyghur sot kollégiyesi" 10-may küni bayanat élan qilip, 4-iyundin7-iyun'ghiche guwahliq anglash yighini ötküzidighanliqini uqturghan idi. Guwahliq anglash yighinigha neq meydan qatnashmaqchi bolghanlar "Uyghur sot kollégiyesi" ning tor bétige kérip aldin tizimlitish telep qilin'ghan.

"Uyghur sot kollégiyesi" ning resmiy tiwittér hésabida 28-may küni seher sa'etlerde bélet sétish sistémisining buzghunchiliqqa uchrighanliqi, shunga tordin bilet zakaz qilish xizmetlirining aqsap qalghanliqi, qatnashmaqchi bolghanlarning biwasite éléktronluq xet ewetishi kérekliki heqqide uqturush bergen.

Xitay hökümiti 25-may küni béyjingda mexsus "Shinjanggha munasiwetlik ishlar" dégen témida axbarat ilan qilish yighini échip, "Uyghur sot kollégiyesi" ge hujum qilghan idi. Hetta Uyghur aptonom rayonluq hökümetning bayanatchisi shü güyshyang yighinda muxbirlarning su'aligha jawab bérip: "Uyghur sot kollégiyesi" ning bu guwahliq anglash yighinigha qet'iy qarshi turidighanliqini bildürgen idi.

"Uyghur sot kollégiyesi" ning bu guwahliq anglash yighinigha qatnishish üchün london'gha yétip barghan Uyghur herkiti teshkilatining re'isi rushen abbas xanim "Uyghur sot kollégiyesi" ning qatmu-qat bésimlar astida élip bériwatqan xizmetliri heqqide toxtilip mundaq dédi: "Quyashni étek bilen bilen yapqili bolmighandek, xitay némila qilsimu heqiqetni yoshuralmaydu."

"Uyghur sot kollégiyesi" ning tor bétidiki melumatlargha qarighanda, "Uyghur sot kollégiyesi" héchbir maddiy payda almaydighan yettidin artuq adwokat we mutexessislerdin terkib tapqan bir sot kollégiyesi iken. Mezkur sot kolligéyesi héchqandaq bir dölet, teshkilatqa baghliq bolmighan musteqil sot kollégiyesi bolup, uning ezalirining Uyghurlarning hoquqini qoghdaydighan siyasiy pa'aliyetchiler emesliki alahide eskertilgen.

Rushen abbas xanim xitay bésiqturushqa urun'ghan her qandaq ishning toghra ikenlikini eskertti we yene mundaq dédi: "Xitay jinayitining otturigha chiqishidin qorquwatidu."

Mushu ayning bashlirida bélgiye parlaméntida ötküzülmekchi bolghan xitayning Uyghur diyaridiki jaza lagérliri toghrisida guwahliq bérish yighinimu tor xakkérlirining hujumi seweblik tor késilip, yighin kéchiktürülgen idi.

Mezkur kollégiyening re'isi jéfféri nayis guwahliq anglash yighini heqqide bergen bayanatida mundaq dégen idi: "Kollégiyening nishani yüz bergen ishlar heqqide heqiqetni otturigha chiqirish. Heqiqet ashkarilan'ghandin kéyin, zulumgha uchrawatqanlar belkim tinchliqqa érishishi mumkin."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet