Türme etret bashliqi: “Mehbuslar emgek meydanigha aptomat we apsharkilar bilen yalap élip chiqilidu”

Kériye türmisining bir etret bashliqi mehbuslarning emgek meydanigha aptomat we apsharka itlar bilen yalap élip chiqilip, éghir bir tehdit astida ishqa sélinidighanliqini ashkarilidi. Ilgiri kériye türmiside jaza ötigen, nöwette chet'elde yashawatqan bir sabiq mehbus, mezkur türmidikilerning qish-yaz bikar qoyulmaydighanliqi, paxta térighan mezgilliride qolliri qapirip, hetta qanap ketküche ishqa sélinidighanliqini ashkarilidi.

Kériye türmiside etret bashliqi bolup wezipe ötigen bir xadim, kériye türmisidiki emgek meydanlirini xitay köchmenlirining höddige alidighanliqi we Uyghur mehbuslarning ishqa sélinidighanliqini ashkarilash bilen birlikte, mehbuslarning türme qorusidin emgek meydanigha heywe we tehdit bilen élip chiqidighanliqini bayan qildi.

Nöwette chet elde yashawatqan, ilgiri kériye türmiside bir mezgil jaza mudditi ötigen bir sabiq mehbusmu mehbuslarning türme qorusidin heywe bilen élip chiqilish arqiliq, ularning qéchip kétish yaki qarshiliq körsitishining toluq aldi élinidighanliqini eskertti. U yene mehbuslarning emgek meydanidiki japaliq ishlesh we qattiq nazaret qilinish jeryani heqqidimu melumat berdi. Uning déyishiche, mehbuslar qish-yaz bikar qoyulmaydiken, héchqandaq ish tépilmighanda mehbuslarni yer kolash we yer tindurush bilen meshghul qilinidiken. Mehbuslar bu xil éghir ishqa sélinish bilen birlikte ménge charchitish sheklidiki siyasiy öginishlermu dawamlishidiken.

Mezkur sabiq mehbus yene mehbuslar ichide ashxanigha yardemleshküchiler bilen yétip qalghan aghriqlarningla emgekke sélinmaydighanliqi, adettiki aghriqlarning bolsa harwigha olturghuzup emgek meydanigha élip chiqilidighanliqini ashkarilidi.

Yuqiriqi türme etret bashliqimu özining témitip sughurushqa mes'ul bolghan mezgilide, mehbuslarning ximiyelik oghutni qollliri bilen chachqanliqini bayan qilish arqiliq, emgekke séliniwatqan mehbuslarning salametlik ehwalining qilche nezerge élinmaydighanliqini delillidi.

Mezkur sabiq mehbus 2005- we 2010‏-yillar arisida kériye türmiside jaza mudditi ötigen bolup, u türmining kéyinki weziyitini özidin kéyin qoyup bérilgen kamirdashliri arqiliq uqup turghan iken. U nöwettiki türme meshghulatliri we emgeklirining buningdin nechche hesse éghir ikenlikini ilgiri sürdi.