Белгийәлик яш әсма гүн: әмәлийәттә пикирләр сиясәттин күчлүк

Мухбиримиз нуриман
2021-01-05
Share
Белгийәлик яш әсма гүн: әмәлийәттә пикирләр сиясәттин күчлүк Белгийә уйғур җәмийитиниң әзаси, бруксәл университети пәлсәпә бөлүми оқуғучиси әсма гүн 1-январ өзгичә шәкилдә даңлиқ маркиларниң журнал муқава сүритигә тәқлид қелип тартилған сүрәтләрниң бири. 2021-Йили январ.
Esma Gün teminligen

Белгийә уйғур җәмийитиниң әзаси, бруксәл университети пәлсәпә бөлүми оқуғучиси әсма гүн 1-январ өзгичә шәкилдә даңлиқ маркиларниң журнал муқава сүритигә тәқлид қелип тартилған сүрәтләр арқилиқ уйғур мәҗбурий әмгикини ашкарилаш паалийити башлиған.

Тәқлиди сүрәтләрдә моделниң үстидики кийимләрниң чүшәндүрүлүшигә "җаза лагерида ясалған", "йүз пирсәнт уйғурлар тәрипидин ясалған", "мәҗбурий туғмас қелинған уйғур аял тәрипидин ишләнгән" қатарлиқ җүмлиләр ишлитилгән.

Белгийә уйғур җәмийитиниң әзаси, бруксәл университети пәлсәпә бөлүми оқуғучиси әсма гүн 1-январ өзгичә шәкилдә даңлиқ маркиларниң журнал муқава сүритигә тәқлид қелип тартилған сүрәтләрниң бири. 2021-Йили январ.

Әсма ханим бу сәпәрвәрлик паалийити арқилиқ уйғурларниң мәҗбурий әмгикидин нәп алидиған маркиларни байқут қилишқа чақирған. Әсма ханим бу паалийәтниң сүрәтлирини өзиниң иҗтимаий алақә торида шу җүмлиләр билән һәмбәһирлигән: "сиз яхши көридиған дукандин кийим сетивелиштин бурун икки қетим ойлаң".

Әсма ханим бу паалийәт һәққидә радийомизниң зияритини қобул қилди. У мундақ деди: "иқтисад һәммимизгә мунасивәтлик бир тема. Кийим-кечәк сетивелиш, содилиқ қилиш дегәндәк. Болупму бу күнләрдә кишиләр еһтияҗи болсиму-болмисиму техиму көп кийим кечәк сетивалидиған болди. Нурғун даңлиқ маркилиқ мәһсулатларниң уйғурларни мәҗбурий ишлитиш арқилиқ ишләпчқирилғанлиқи вә бу даңлиқ маркилиқ мәһсулатлар карханилириниң бу мәсилини йошуруши әслидә бир чоң мәсилә. Мән бу паалийитимиз арқилиқ уйғурларға қилинған зулумға бизниң қанчилик йеқин икәнликимизни билдүрүшни мәқсәт қилдим. Йәни кишиләрниң көзигә челиқидиған, лекин бәк биарам қилмайдиған мушундақ шәкилдә қилишни мувапиқ көрдүм".

Белгийә уйғур җәмийитиниң әзаси, бруксәл университети пәлсәпә бөлүми оқуғучиси әсма гүн 1-январ өзгичә шәкилдә даңлиқ маркиларниң журнал муқава сүритигә тәқлид қелип тартилған сүрәтләрниң бири. 2021-Йили январ.

Әсма гүн ханим, униң фотограф дости том иммәнуәл вә иниси кәрим гүн қатарлиқ явропада туғулуп чоң болған яшларниң иҗтимаий таратқуларда актип бир шәкилдә тәшвиқ қелиши билән уйғурларниң нөвәттики вәзийитидин хәвәрдар болған яшлар, болупму белгийә вә түркийәдики яшлар бу паалийәткә наһайити актип аваз қошқан.

Белгийә уйғур җәмийитиниң аммиви мунасивәт вә тәшвиқат ишлириға мәсул хадими әкбәр турсун әпәнди мушундақ чәтәллик яшларниң қоллиши билән белгийәдики уйғур вәзийитини аңлитишиниң нәтиҗилик болуватқанлиқинии билдүрүп мундақ деди: "биз җәмийитимизниң иҗтимаий таратқулирида һәрхил тилларда уйғур вәзийитини аңлитип үнүмини көрдуқ. Бу қетимқи паалийитимизму мәҗбурий ишлитиливатқан қериндашлиримизниң аһу-зарини мушу аддий усул билән аңлаттуқ, кәлгән инкасларму бәк яхши болуватиду".

Әсма ханим өзлири тәқлиди журнал муқависида қолланған зара қатарлиқ маркиларни таллишиниң сәвәби һәққидә тохтилип мундақ деди: "бу маркилар бизниң билидиған маркилиримиз. Тордин ахтуруп қарайдиған болсақ әң көп яхши көрүлгән маркилар. Тәтқиқатчилар ашкарилиған һөҗҗәтләргә қариғанда, електронлуқ үскүниләрдин тартип, күндилик әшялиримиз, кийим-кечәклиримизгичә нурғун истемал боюмлиримиз лагерларға соланған уйғурларниң мәҗбурий әмгики арқилиқ ишләпчиқирилған. Нурғун даңлиқ маркилар бу тизимликтә бар икән. Лекин баһаси мувапиқрақ зара, юнкло қатарлиқ маркилиқ мәһсулатларниң истемалчилири көп. Шуңа көпрәк кишигә тәсир көрситиш үчүн истемалчилири көп маркини таллидим".

Әсма ханим мунуларни қошумчә қилди: "пәқәт зара ширкитила кийим тикмәйду. Тоғра әң чоң, әң қарши елинидиған маркиларниң бири. Мениңму әң яхши көридиған маркилиримниң бири иди. Лекин униң арқа көрүнүшни ойлиғинимда буниңдин кейин һәргиз у маркилиқ кийимини кийәлмәймән".

Тәтқиқатчи адрян зензниң көрситишичә, нөвәттә уйғурларниң милйонлап лагерларға қамилиши лагерларниң янлиридики яки униңға анчә йирақ болмиған нуқтилардики мәҗбурий әмгәкниң мәнбәси болуп қалған.

Австралийә истратегийәлик сиясәт институтиниң өткән йили 1-март күни елан қилған доклатида хитай даирилири уйғур елидин 80 миңдин артуқ кишини хитайниң ичкири өлкилиридики завутларда ишләшкә йөткигәнлики, бу уйғурларниң көпи хитайға җайлашқан дунядики даңлиқ маркилиқ ширкәтләрниң, мәсилән, алма, найки, соний, зара, җәк & җонис қатарлиқ 83 даңлиқ маркилиқ мәһсулатларни ишләп чиқиридиған завутларда мәҗбурий вә әрзан баһада ишлитилгәнликини елан қилғаниди.

Әсма ханим вә әкбәр әпәнди бу паалийәтниң наһайити яхши тәсир қозғиғанлиқини вә үнүмлүк болғанлиқини ейтишти.

Әсма ханим: "инкаслар бәк яхши. %99 Киши бу паалийәтни қоллаватиду. Чоң маркилиқ мәһсулат дуканлиридин кейим-кечәк сетивелишқа адәтлинип қалған кишиләр үчүн бу адитидин ваз кечиш тәс. Лекин бизниң паалийитимиздин хәвәрдар болғанлар бизниң немә демәкчи болғанлиқимизни чүшәнди, дәп қараймән. Әгәр биз бу чоң маркилиқ мәһсулатларни қоллисақ, бу уйғурларниң тихиму иғир зулумға учрайдиғанлиқидин дерәк бериду. Әгәр биз қоллимисақ, қандақ өзгиришләрниң болдиғанлиқини билмәймиз, әмма бир өзгириш болиду. Һеч болмиса уйғурларниң улар учраватқан зулумни бизниң билидиғанлиқимизни вә уларни қоллайдиғанлиқимизни билиши маңа йетиду".

Әсма ханим ахирида мундақ деди: "адәттә дөләтниң бешида болған сиясәтчиләр дөләтни, дуняни өзгәртиду дәп ойлаймиз, әмәлийәттә нурғун кишиләр бир мәзгилдин кейин у дөләт рәһбириниң исмини әслийәлмәйду, лекин пикирлири арқилиқ җәмийәтни өзгәрткән кишиләрни билимиз. Йәни әслидә сөзләр, пикирләр техиму күчлүк. Мән бу паалийәт җәрянида нурғун қоллашқа ериштим. Шуңа өзүмдә техиму чоң бир мәсулийәт һес қиливатимән. Һазирчә кейинки паалийәт үчүн бир ениқ пиланим йоқ. Әмма кәлгүсидә йәнә башқа паалийәт қилишни ойлишиватимән".

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт