Биринчи қетимлиқ уйғур аяллар илим чейи истанбулда ғәлибилик өткүзүлди

Ихтиярий мухбиримиз азиғ
2021-06-18
Share
Биринчи қетимлиқ уйғур аяллар илим чейи истанбулда ғәлибилик өткүзүлди Рисаләт турсун абдуқадир дамолламниң әхлақ чүшәнчиси намлиқ мақалисини оқумақта. 2021-Йили 12-июн, истанбул.
RFA/Azigh

Уйғур җәмийити сиясий җәһәттин қаттиқ бастурулуватқан бүгүнкидәк күндә, мутәхәссисләр күнсери өткүрлишиватқан иҗтимаий мәсилиләргә үнүмлүк һәл қилиш чариси тепишниң зөрүрийитини тәкитлимәктә.

Уйғур җәмийитидики аялларниң орни, аялларниң маарип, хизмәт вә сиясий җәһәттин баравәр пурсәткә еришиш мәсилиси муһаҗирәттики уйғур җәмийитидиму муһим нуқта болуп кәлмәктә.

12-Июн күни истанбулдики уйғур аяллириниң тәшкиллишидә илим чейи паалийити өткүзүлгән болуп, паалийәттә абдуқадир дамолламниң идийәси вә оттуриға қойған пикирлири тәпсилий муһакимә қилинған.

Паалийәткә мәғпирәт камал, аминә сәдәф, рисаләт турсун қатарлиқ истанбулдики уйғур зиялийлири қатнашқан болуп, қатнашқучилар абдуқадир дамолламниң һаяти, әхлақ чүшәнчиси, вәтәнпәрвәрлик вә аяллар һәққидики қарашлири тоғрисида тәйярлиған мақалилирини оқуп өткән.

Аминә сәдәф ханим

Мәзкур паалийәтниң тәшкиллинишидә муһим рол ойниған истанбулдики уйғур зиялийси вә паалийәтчи аминә сәдәф ханим зияритимизни қобул қилип, илим чейини абдуқадир дамоллам темиси билән башлашниң сәвәби һәққидә тохталди.

Хитайниң уйғур аилилирини парчилаш вә қирғинчилиқ сиясәтлири сәвәблик уйғур җәмийитидә нурғун иҗтимаий кризисларниң пәйда болуватқанлиқи оттуриға қоюлуватқан болуп, уйғур аяллириниң иҗтимаий орнини өстүрүш, аялларни тәрбийәләш вә ишқа орунлаштуруш мәсилиси нөвәттә түркийәдики уйғур җәмийитидики муһим мәсилиләрниң бири һесаблинидикән.

Мутәхәссисләр һәр хил иҗтимаий вә мәдәнийәт паалийәтлиридин пайдиллинип аялларни тәрбийәләш вә йетиштүрүшниң муһимлиқини тәкитлимәктә.

Мәзкур паалийәтниң тәшкиллиниши вә өткүзүлүшидә муһим рол ойниған шиветсийәдики уйғур зиялийлиридин абдушүкүр муһәммәт қумтур әпәндим зияритимизни қобул қилип, бу паалийәтниң роли вә мәқсити һәққидә тәпсилий тохталди.

Докторанит рисаләт турсун ханим зияритимизни қобул қилип бу хил илим чайлириниң көпләп өткүзүлүшиниң аялларниң турмуш вә маарип сәвийәсини өстүрүшкә, өзидә болған иқтидарларни җари қилдурушқа вә аялларниң өзигә ишинишини өстүрүшкә интайин пайдилиқ икәнликини ейтип өтти.

Бир қисим уйғур зиялийлири түркийәдики уйғур җәмийитидә йүз бериватқан иҗтимаий мәсилиләрни һәл қилиш үчүн һәр хил мәдәнийәт-сәнәт паалийәтлирини уюштурушниң муһим рол ойнайдиғанлиқини илгири сүрүп кәлмәктә. Улар мәдәнийәт-сәнәт паалийәтлири арқилиқ йүз бериватқан иҗтимаий мәсилиләрни чоңқур анализ қилғили, сиясий вә иҗтимаий мәсилиләр шәкилләндүрүватқан бесим вә психик мәсилиләрни мәдәнийәт-сәнәт вә һәр хил иҗтимаий паалийәтләр арқилиқ һәл қилғили болидиғанлиқини билдүрүшмәктә.

Көзәткүчиләрниң қаришичә, аяллар һоқуқи вә аялларниң орнини өстүрүш мәсилисидә җәмийәтниң техиму сәзгүр вә техиму аңлиқ болуши, уйғур җәмийитиниң мәвҗутлуқи вә тәрәққияти үчүн муһим рол ойнайдикән.

Рисаләт турсун ханим зияритимиз давамида, аялларниң җәмийәттики орнини өстүрүш, аилә зораванлиқи мәсилиси һәққидә җәмийәтни тәрбийәләш, аялларниң қануний җәһәттин өзини қоғдишини капаләтләндүрүш қатарлиқ мәсилиләрдә конкрет хизмәтләрниң елип берилиши керәкликини ейтти.

Көзәткүчиләрниң қаришичә, хитайниң қирғинчилиқ сиясити сәвәблик түрлүк иҗтимаий кризисларға йолуқуватқан уйғур җәмийити пүтүн дуняда миллий мәвҗутлуқини қоғдаш вә мәдәний бир җәмийәт қуруш йолида тиришчанлиқ көрситип кәлмәктә икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт