“копенһаген хәлқара музика фестивали” да уйғур музикилири яңриди

Мухбиримиз нуриман
2021.09.20
Share on WhatsApp
Share on WhatsApp
“копенһаген хәлқара музика фестивали” да уйғур музикилири яңриди Данийәниң пайтәхти копенһагенда өткүзүлүватқан “копенһаген хәлқара музика фестивали” да “лондон йипәк йоли ансамбили” уйғур нахша-музикилирини орунлимақта. 2021-Йили 19-сентәбир.
Rehime Mehmut teminligen

Данийәниң пайтәхти копенһагенда өткүзүлүватқан “копенһаген хәлқара музика фестивали” ға дуняниң һәрқайси җайлиридин қатнашқан музика гуруппилириниң қатарида әнглийәдә қурулған “лондон йипәк йоли ансамбили” му тәклип қелинған. Улар 18-сентәбирдин 20-сентәбиргичә данийәниң охшимиған шәһәрлиридә консерт бәргән.

Мәлум болушичә “лондон йипәк йоли ансамбили” узундин буян асаслиқи уйғур нахша-музикилирини хәлққә тәқдим қилип кәлгән. Улар хәлқаралиқ сәһниләрдә уйғур нахша-музикисини яңритиш билән бир вақитта уйғур мәдәнийити тонуштурушни нишан қилған.

“копенһаген хәлқара музика фестивали” ни тәшкиллигүчиләрниң иҗтимаий таратқуларда билдүрүшичә, “копенһаген хәлқара музика фестивали” һәр хил мәдәнийәтләрни арқа көрүнүш қилған данийә вә дуняниң һәр қайси җайлиридин кәлгән даңлиқ музикантлар орунлиған музикилар оттурисида көврүклүк рол ойнашни мәқсәт қилған. Улар йәнә “бу фестивалниң охшимиған мәдәнийәтләрни һөрмәтләш вә инсанпәрвәрлик характери күчлүк” дәп тәриплигән.

Дуня уйғур қурултийи лондон ишханисиниң мудири шундақла әнглийәдә қурулған “лондон йипәк йоли ансамбили” ниң нахшичиси рәһимә мәһмут ханим зияритимизни қобул қилип бу фестивал һәққидә чүшәнчә бәрди вә йәнә мундақ деди: “биз бу консерт арқилиқ вәтәндики түрмиләрдә тутуп турулуватқан вә һәтта өлүп кәткән сәнәткарлиримиз, музикант-шаирлиримизниң, вәтәндә азаб-чекиватқан хәлқимизниң аһу-зарини аңлаттуқ.”

Мәзкур ансамбил данийәгә йетип барғандин кейин 18-сентәбирдин 20-сентәбиргичә данийәниң алборг, нор снәд вә копенһаген қатарлиқ шәһәрлиридә арқа-арқа консерт бәргән. Коруна вируси түпәйли қатнашқан кишиләр бәк көп болмисиму әмма тамашибинларниң қизғин қарши елишиға еришкән.

“лондон йипәк йоли ансамбили” ниң дутарчиси, узун йиллардин буян уйғурларниң музика мәдәнийити тәтқиқати билән шуғуллинип келиватқан райчил харрис ханим консертлар һәққидә тохтилип мундақ деди мундақ деди: “коруна вируси сәвәблик елип берилған узун муддәт қамалдин кейин, данийәдә мушундақ нәқ мәйдан консерт берәлигәнликимиз үчүн мән бәк хурсән болдум. Һазирқи мәзгилдә явропада вә дуняниң башқа йәрлиридә уйғур музикилирини орунлаш наһайити муһим. Мениң билишимчә данийәдә уйғур мәсилири йетәрлик билинмәйду. Әнглийәликләргә селиштурғанда данийәликләр арисида уйғурларни билидиғанлар һәқиқәтән аз. Шуңа бу фестивал биз үчүн тамашибинларға гүзәл уйғур музикилирини орунлап берипла қалмастин бәлки ‛уйғур қирғинчилиқи‚ ни аңлтиш үчүнму наһайити яхши пурсәт болди.”

“лондон йипәк йоли ансамбили” да уйғур музикилириға иштияқ бағлиған, қәшқәр равабини вайиға йәткүзүп чалидиған өзбекистанлиқ сәрдар мирзахоҗайиф дегән бир музиканти бар икән. Сәрдар әпәнди зияритимизни қобул қилип мундақ деди: “мән ‛уйғур билән өзбек бир хәлқ, уйғурларниң бешиға кәлгән мүшкүлат өзбекләрниң бешиға кәлгән билән охшаш‚ дәп билимән. Қолимиздин келишичә уйғур мәдәнийитигә йүргүзүлүватқан суйиқәстни күйлиримиз арқилиқ дуняға билдүрүшкә тиришимиз.”

“лондон йипәк йоли ансамбили” ниң әзалири билән өткүзгән сөһбитимизгә қариғанда, “копенһаген хәлқара музика фестивали” дәк хәлқаралиқ сәһнә арқилиқ уйғурларниң авазини аңлитиш наһайити мувәппәқийәтлик болған.

Зияритимизниң ахирида рәһимә мәһмут ханим мундақ деди: “лондон йипәк йоли ансамбили” музикилар арқилиқ уйғурларниң авази болушни мәқсәт қилиду, әң муһими йәнә мушундақ гүзәл мәдәнийитимизни муһаҗирәттә сақлап қилиш вә кәлгүси әвладларға йәткүзүп бериш үчүн күрәш қилиду.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.