“Kopénhagén xelq'ara muzika féstiwali” da Uyghur muzikiliri yangridi

Muxbirimiz nur'iman
2021.09.20
Share on WhatsApp
Share on WhatsApp
“Kopénhagén xelq'ara muzika féstiwali” da Uyghur muzikiliri yangridi Daniyening paytexti kopénhagénda ötküzülüwatqan “Kopénhagén xelq'ara muzika féstiwali” da “London yipek yoli ansambili” Uyghur naxsha-muzikilirini orunlimaqta. 2021-Yili 19-séntebir.
Rehime Mehmut teminligen

Daniyening paytexti kopénhagénda ötküzülüwatqan “Kopénhagén xelq'ara muzika féstiwali” gha dunyaning herqaysi jayliridin qatnashqan muzika guruppilirining qatarida en'gliyede qurulghan “London yipek yoli ansambili” mu teklip qélin'ghan. Ular 18-séntebirdin 20-séntebirgiche daniyening oxshimighan sheherliride konsért bergen.

Melum bolushiche “London yipek yoli ansambili” uzundin buyan asasliqi Uyghur naxsha-muzikilirini xelqqe teqdim qilip kelgen. Ular xelq'araliq sehnilerde Uyghur naxsha-muzikisini yangritish bilen bir waqitta Uyghur medeniyiti tonushturushni nishan qilghan.

“Kopénhagén xelq'ara muzika féstiwali” ni teshkilligüchilerning ijtima'iy taratqularda bildürüshiche, “Kopénhagén xelq'ara muzika féstiwali” her xil medeniyetlerni arqa körünüsh qilghan daniye we dunyaning her qaysi jayliridin kelgen dangliq muzikantlar orunlighan muzikilar otturisida köwrüklük rol oynashni meqset qilghan. Ular yene “Bu féstiwalning oxshimighan medeniyetlerni hörmetlesh we insanperwerlik xaraktéri küchlük” dep teripligen.

Dunya Uyghur qurultiyi london ishxanisining mudiri shundaqla en'gliyede qurulghan “London yipek yoli ansambili” ning naxshichisi rehime mehmut xanim ziyaritimizni qobul qilip bu féstiwal heqqide chüshenche berdi we yene mundaq dédi: “Biz bu konsért arqiliq wetendiki türmilerde tutup turuluwatqan we hetta ölüp ketken sen'etkarlirimiz, muzikant-sha'irlirimizning, wetende azab-chékiwatqan xelqimizning ahu-zarini anglattuq.”

Mezkur ansambil daniyege yétip barghandin kéyin 18-séntebirdin 20-séntebirgiche daniyening alborg, nor sned we kopénhagén qatarliq sheherliride arqa-arqa konsért bergen. Koruna wirusi tüpeyli qatnashqan kishiler bek köp bolmisimu emma tamashibinlarning qizghin qarshi élishigha érishken.

“London yipek yoli ansambili” ning dutarchisi, uzun yillardin buyan Uyghurlarning muzika medeniyiti tetqiqati bilen shughullinip kéliwatqan raychil xarris xanim konsértlar heqqide toxtilip mundaq dédi mundaq dédi: “Koruna wirusi seweblik élip bérilghan uzun muddet qamaldin kéyin, daniyede mushundaq neq meydan konsért béreligenlikimiz üchün men bek xursen boldum. Hazirqi mezgilde yawropada we dunyaning bashqa yerliride Uyghur muzikilirini orunlash nahayiti muhim. Méning bilishimche daniyede Uyghur mesiliri yéterlik bilinmeydu. En'gliyeliklerge sélishturghanda daniyelikler arisida Uyghurlarni bilidighanlar heqiqeten az. Shunga bu féstiwal biz üchün tamashibinlargha güzel Uyghur muzikilirini orunlap béripla qalmastin belki ‛Uyghur qirghinchiliqi‚ ni angltish üchünmu nahayiti yaxshi purset boldi.”

“London yipek yoli ansambili” da Uyghur muzikilirigha ishtiyaq baghlighan, qeshqer rawabini wayigha yetküzüp chalidighan özbékistanliq serdar mirzaxojayif dégen bir muzikanti bar iken. Serdar ependi ziyaritimizni qobul qilip mundaq dédi: “Men ‛Uyghur bilen özbék bir xelq, Uyghurlarning béshigha kelgen müshkülat özbéklerning béshigha kelgen bilen oxshash‚ dep bilimen. Qolimizdin kélishiche Uyghur medeniyitige yürgüzülüwatqan suyiqestni küylirimiz arqiliq dunyagha bildürüshke tirishimiz.”

“London yipek yoli ansambili” ning ezaliri bilen ötküzgen söhbitimizge qarighanda, “Kopénhagén xelq'ara muzika féstiwali” dek xelq'araliq sehne arqiliq Uyghurlarning awazini anglitish nahayiti muweppeqiyetlik bolghan.

Ziyaritimizning axirida rehime mehmut xanim mundaq dédi: “London yipek yoli ansambili” muzikilar arqiliq Uyghurlarning awazi bolushni meqset qilidu, eng muhimi yene mushundaq güzel medeniyitimizni muhajirette saqlap qilish we kelgüsi ewladlargha yetküzüp bérish üchün küresh qilidu.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.