Türkiyede Uyghur naxshiliri arqiliq Uyghurlarning éghir weziyiti anglitildi

Ixtiyariy muxbirimiz erkin tarim
2019-11-05
Élxet
Pikir
Share
Print
Türkiyening bursa shehiridiki konsértta Uyghur naxsha-muzikiliridin örnekler körsitildi we Uyghurlarning hazirqi éghir weziyiti anglitildi. 2019-Yili noyabir.
Türkiyening bursa shehiridiki konsértta Uyghur naxsha-muzikiliridin örnekler körsitildi we Uyghurlarning hazirqi éghir weziyiti anglitildi. 2019-Yili noyabir.
RFA/Erkin Tarim

Türkiyening bursa shehiridiki konsértta Uyghur naxsha-muzikiliridin örnekler körsitilgendin sirt Uyghurlarning hazirqi éghir weziyitimu anglitilghan.

Bursadiki uludagh uniwérsitéti türk dunyasi muzika tetqiqat merkizi, bursa sheherlik hökümet we türk tereqqiyat idarisi ortaqliship uyushturghan ikkila pa'aliyette Uyghur naxsha-muqamliri we xitayning Uyghurlargha élip bériwatqan éghir bésim siyasiti anglitilghan.

Mezkur pa'aliyetni uyushturghan uludagh uniwérsitéti türk dunyasi muzika tetqiqat merkizi mudiri dotsént doktor erdem özdemir ependi mezkur pa'aliyetler toghrisida melumat bérip mundaq dédi: "Bursada türkiy milletler muzika tetqiqati ilmiy muhakime yighini bilen türk dunyasi konsért kéchiliki ötküzüldi. Buni ötküzüshtiki meqsitimiz türkologiyening muhim bir qismi bolghan türkiy milletler muzikisini tetqiq qilish, ögitish we ilmiy doklatlar arqiliq bu sahege matériyal we menbe teminleshtin ibaret".

Doktor erdem özdemir ependi yighin'gha türkiyedin we chet'eldin Uyghur muzikisini tetqiq qilidighan mutexessislerningmu ishtirak qilghanliqini, shu küni axsham konsért bérilgenlikini bayan qilip mundaq dédi: "Yighin'gha london uniwérsitéti proféssori Uyghur muzika tetqiqatchisi rachél xarris xanim, wén'giriyelik tonulghan muzikishunas proféssor janos sipos ependi, qazaqistanliq muzikishunas qayirgazi tölen ependi we türkiyening her qaysi uniwérsitétlirida türkiy milletlerning muzikilirini tetqiq qiliwatqan mutexessisler qatniship, özliri teyyarlighan ilmiy doklatlarni oqup ötti. Shu küni yeni 3-noyabir küni axsham sen'etchiler konsért berdi. Konsértta Uyghur naxshichi rehime mexmut xanim Uyghur muqam we naxshiliridin örnekler sundi".

Konsért Uyghurlarning tonulghan sen'etchisi abduréhim héyitni tonushturush bilen bashlandi. Muzika kespi boyiche doktorluq alghan erdem özdemir ependi konsértning abduréhim héyitning "Uchrashqanda" dégen naxshisi bilen bashlinidighanliqini bayan qilip mundaq dédi: "Qolumdiki dutar sherqiy türkistandiki Uyghurlarning chalghu eswabi, türkiyediki "Baghlama" dégen chalghu dutardin kelgen. Dutarning eng muhim ustisi abduréhim héyittur. Epsus xitayda jaza lagérlirida tutup turuldi. Bügünki konsértimiz abduréhim héyitning 'uchrashqanda' dégen naxshisi bilen bashlinidu".

Rehime mexmut xanim yekshenbe küni axsham bergen konsértida aldi bilen Uyghur muqamini, arqidin Uyghur xelq naxshiliridin örnekler sun'ghanliqini bayan qildi.

Bursa shehiridiki teyyare zalida ötküzülgen konsértta türkiyede türkiy milletlerning naxshilirini oqup dang chiqarghan gürdal ependi, qazaqistanliq tonulghan naxshichilarmu naxsha orundighan. Lékin Uyghur naxshiliri tamashibinlarning qattiq alqishigha érishken. Rehime mexmut xanim bu heqte toxtaldi.

Türkiyening gherbige jaylashqan bursa shehiridiki bursa uludagh uniwérsitéti eng köp Uyghur oqughuchi oquwatqan uniwérsitétlardin biri hésablinidu. Mezkur uniwérsitétta her qaysi kesiplerde oquwatqan Uyghur oqughuchilarning sani 120 etrapida iken. Bu oqughuchilarning wekili abdulqadir abdulkérim konsértqa barghanliqini, öz wetinidin uzaq bursa shehiride "Wetenni séghindim, mektup yazmay özüng kel" dégen naxshilarni anglighan waqtida qattiq tesirlen'genlikini bayan qildi.

Bursadiki uludagh uniwérsitétidiki türk dunyasi muzika tetqiqat merkizi türkiyede türkiy milletlerning muzikilirini tetqiq qilidighan birdinbir tetqiqat merkizi hésablinidu.

Toluq bet