Америка кеңәш палатасиниң рәһбири «уйғур кишилик һоқуқ қануни» ниң йеқинда авазға қоюлидиғанлиқини билдүргән

Мухбиримиз әркин
2020-05-07
Елхәт
Пикир
Share
Принт
Америка кеңәш палатасиниң рәһбири мич микконел әпәнди. 2020-Йили 21-апрел, вашингтон.
Америка кеңәш палатасиниң рәһбири мич микконел әпәнди. 2020-Йили 21-апрел, вашингтон.
AP

Америка кеңәш палатасиниң рәһбири мич микконел «уйғур кишилик һоқуқ қанун лайиһиси» ниң пат-йеқинда кеңәш палатасида авазға қоюлушиға һәрикәт қилидиғанлиқини билдүргән.

Ройтерс агентлиқиниң хәвәр қилишичә, мич микконел җумһурийәтчи кеңәш палата әзаси марко рубийо тәрипидин оттуриға қоюлған мәзкур қанун лайиһәсидә президент трампниң (уйғурларни) «бастурушта җавабкарлиқи бар әмәлдарларға нишанлиқ ембарго йүргүзүшкә чақирилғанлиқи» ни билдүргән.

Вәзийәттин хәвәрдар бирәйлән ройтерс агентлиқиға бәргән учурида, қанун лайиһәсиниң тез болса келәр һәптә, яки униңдин кейин авазға қоюлуши мумкинликини ейтқан.

Бу қанун лайиһәси корона вируси юқуми сәвәблик америка-хитай мунасивити җиддийлишип, хитай қаттиқ бесимға учраватқан мәзгилдә авазға қоюлиду.

Хитай һөкүмити вухәндә партлиған корона вирусини йошуруп, униң дуняви вабаға айлиниши, америкада нурғун адәмниң өлүши, иқтисадниң еғир зиянға учришини кәлтүрүп чиқарған.

Мич микконел 7-май кеңәш палатасида қилған сөзидә: «мән кеңәш палатасиниң палата әзаси рубийо сунған ‹уйғур кишилик һоқуқ сиясити қанун лайиһәси' ниң пат-йеқинда мақуллишини күтимән» дегән.

Рубийониң ишханиси болса қанун лайиһәсиниң пат-арида бирдәк аваз билән мақуллинишини үмид қилидиғанлиқи, лекин униң қачан авазға қоюлидиғанлиқини ейтип берәлмәйдиғанлиқини билдүргән.

Мәзкур қанун лайиһәсиниң йәнә бир нусхиси өткән йили декабирда авам палатасида мутләқ көп авазниң қоллиши билән мақуллуқтин өткән иди.

Ройтерс агентлиқиниң билдүрүшичә, вәзийәттин хәвәрдар бирәйлән қанун лайиһәси кеңәш палатасида мақулланса униң, президент трампниң үстилигә бир қәдәм йеқинлишидиғанлиқи, лекин қанун лайиһәси авам палатасиниң ахирқи аваз беришигә қайта йоллинип, униңдики һәрқандақ өзгиришниң бирликкә кәлтүрүлидиғанлиқини билдүргән.

Пикирләр (0)
Share
Толуқ бәт