Amérika kéngesh palatasining rehbiri "Uyghur kishilik hoquq qanuni" ning yéqinda awazgha qoyulidighanliqini bildürgen

Muxbirimiz erkin
2020-05-07
Élxet
Pikir
Share
Print
Amérika kéngesh palatasining rehbiri mich mikkonél ependi. 2020-Yili 21-aprél, washin'gton.
Amérika kéngesh palatasining rehbiri mich mikkonél ependi. 2020-Yili 21-aprél, washin'gton.
AP

Amérika kéngesh palatasining rehbiri mich mikkonél "Uyghur kishilik hoquq qanun layihisi" ning pat-yéqinda kéngesh palatasida awazgha qoyulushigha heriket qilidighanliqini bildürgen.

Roytérs agéntliqining xewer qilishiche, mich mikkonél jumhuriyetchi kéngesh palata ezasi marko rubiyo teripidin otturigha qoyulghan mezkur qanun layiheside prézidént trampning (Uyghurlarni) "Basturushta jawabkarliqi bar emeldarlargha nishanliq émbargo yürgüzüshke chaqirilghanliqi" ni bildürgen.

Weziyettin xewerdar bireylen roytérs agéntliqigha bergen uchurida, qanun layihesining téz bolsa kéler hepte, yaki uningdin kéyin awazgha qoyulushi mumkinlikini éytqan.

Bu qanun layihesi korona wirusi yuqumi seweblik amérika-xitay munasiwiti jiddiyliship, xitay qattiq bésimgha uchrawatqan mezgilde awazgha qoyulidu.

Xitay hökümiti wuxende partlighan korona wirusini yoshurup, uning dunyawi wabagha aylinishi, amérikada nurghun ademning ölüshi, iqtisadning éghir ziyan'gha uchrishini keltürüp chiqarghan.

Mich mikkonél 7-may kéngesh palatasida qilghan sözide: "Men kéngesh palatasining palata ezasi rubiyo sun'ghan 'Uyghur kishilik hoquq siyasiti qanun layihesi' ning pat-yéqinda maqullishini kütimen" dégen.

Rubiyoning ishxanisi bolsa qanun layihesining pat-arida birdek awaz bilen maqullinishini ümid qilidighanliqi, lékin uning qachan awazgha qoyulidighanliqini éytip bérelmeydighanliqini bildürgen.

Mezkur qanun layihesining yene bir nusxisi ötken yili dékabirda awam palatasida mutleq köp awazning qollishi bilen maqulluqtin ötken idi.

Roytérs agéntliqining bildürüshiche, weziyettin xewerdar bireylen qanun layihesi kéngesh palatasida maqullansa uning, prézidént trampning üstilige bir qedem yéqinlishidighanliqi, lékin qanun layihesi awam palatasining axirqi awaz bérishige qayta yollinip, uningdiki herqandaq özgirishning birlikke keltürülidighanliqini bildürgen.

Toluq bet