"‍Uyghur qirghinchiliqi" ni toxtishi we meblegh sahiblirining shija'iti

Muxbirimiz eziz
2021-04-02
Share
Amérika tashqi ishlar ministirliqi "Yehudiylar öchmenlikini nazaret qilish" guruppisining wekili élliy koxanim (ongdin birinchi) we tashqi ishlar ministirliqi iqtisadiy tereqqiyat komitétining sabiq re'isi kéys krach (ongdin ikkinchi) ning "Amérika pikir yétekchiliri" aqillar merkizi bilen ötküzgen Uyghur qirghinchiliqi merkez qilin'ghan mexsus muhakimisidin bir körünüsh. 2021-Yili 25-mart.
Social Media

Her da'imqidek dunya miqyasida bu yilning béshida "Yehudiy zor qirghinchiliqi" ning 75 yilliqi xatiriliniwatqanda birleshken döletler teshkilati (b d t) we bashqa xelq'araliq teshkilatlar natsistlarning lagér sistémisida hayatidin ayrilghan alte milyondin artuq yehudiyning hörmitige bu xildiki paji'ening qaytidin körülmesliki üchün tégishlik tedbirlerni élishqa chaqiriq qildi. Emma del ene shu sözler boluwatqanda amérika hökümiti ‍uyghur diyarida dawam qiliwatqan mislisiz ijtima'iy paji'eni "Irqi'iy qirghinchiliq" dep élan qildi. Bu hökümning jakarlinishi eyni waqitta "Emdi qaytilanmaydu" dep yuqiri awazda towlan'ghan tarixiy sho'arning meghlup bolghanliqini yene bir qétim ashkara qildi.

Yéqinda amérika tashqi ishlar ministirliqi "Yehudiylar öchmenlikini nazaret qilish" guruppisining wekili élliy koxanim (Ellie Cohanim) we tashqi ishlar ministirliqi iqtisadiy tereqqiyat komitétining sabiq re'isi kéys krach (Keith J. Krach) Ning "Amérika pikir yétekchiliri" aqillar merkizi bilen ötküzgen mexsus muhakimiside bu mesile merkiziy téma boldi.

Kéys ependining qarishiche, Uyghur diyaridiki irqiy qirghinchiliqni toxtitishning tunji qedimi aldi bilen mushundaq bir qabahetning mewjutluqini étirap qilish iken. Derweqe amérikidiki ikki partiye terepdarliri bu mesilide asasiy jehettin oxshash mewqede bolup, ular otturisida Uyghurlar duch kéliwatqan irqiy qirghinchiliqni étirap qilishta pikir ixtilabi yoq iken. Bolupmu kéngesh palata ezasi bob ménandiz ependi "Qirghinchiliqqa xatime bérimiz, deydikenmiz jezmen buninggha qarshi ornimizdin dest turushimiz hemde heqiqetni sözlishimiz lazim" dep uzun ötmeyla sabiq tashqi ishlar ministiri mayk pompyo we uning ornigha chiqqan antoni bilinkén ependiler birdek buni "Irqiy qirghinchiliq" dep qaraydighanliqini bildürgen. Bu jehettin alghanda bu halni nöwette Uyghur qirghinchiliqigha qarshi turushtiki bir muhim qedem, déyishke bolidiken.

Élliy xanimmu bu jehette mushuninggha oxshap kétidighan qarashta bolup, uning pikriche Uyghur qirghinchiliqining bashlinishigha nezer salghanda eyni waqittiki "Yehudiylar zor qirghinchiliqi" ning omumiy jeryanigha bekmu oxshiship kétidighanliqini körüwélish mumkin iken. Bolupmu natsistlar gérmaniyesi aldi bilen barliq axbarat we neshriyat wasitiliridin paydilinip, yehudiylarni qurt-qongghuz, hasharat we chashqan dégendek ibariler bilen süpetligen hemde ularning obrazini dölet miqyasida xunükleshtürgeniken. Xitay kompartiyesimu mushu usulni qollinip Uyghurlarni "Zeherlik ösme", "Rohiy késellik bilen chirmalghan" dégendek süpetler bilen teswirlep, bu xil "Illetlik merez" ni yoqitish üchün uni "Tüp yiltizidin qomurup tashlash, menggü kökliyelmes qiliwétish" dégendek charilarni otturigha qoyghan. Emdilikte yuqiri pellige chiqiwatqan qabahetler bolsa qirghinchiliqning tarixtiki iznalirini qaytidin kishiler öngide zahir qilmaqta iken.

Kéyis ependining qarishiche, bu jehette amérika awam palatasining re'isi nensiy pélosining sözliri amérika hökümiti üchün ölchemlik ülge bolushi lazim iken. Bolupmu uning "Eger amérika hökümiti soda ishliridiki menpe'etni közlep nöwette xitay hökümiti sadir qiliwatqan heqler depsendichilikige qarshi söz qilmisa u halda bizning bu heqte söz qilghudek héchqandaq exlaqiy nopuzimiz qalmaydu" dégen sözliri bilen awam palata ezasi maykil mekkolning "Biz xitay döliti ijra qiliwatqan medeniyet qirghinchiliqigha közimizni parqiritip qarap oltursaq bizning bu sükütimiz mahiyette ashu qirghinchiliqqa shérik bolghanliqqa barawer bolup qalidu" dégen sözliri del mushu nuqtigha qaritilghaniken. Ene shu xil "Qirghinchiliqqa shérik bolup qélish" hadisisi nöwette amérika soda sahesidiki meblegh salghuchi shirketler we shexslerning Uyghur diyaridiki mejburiy emgek halqiliri bilen chétishliq teminat zenjirige baghlinip qélishida öz eksini tapmaqta iken. .

Kéyis ependi bu jehette alahide tekitligen yene bir nuqta ötken nechche on yildin buyan Uyghur diyarida dawam qiliwatqan zulumlargha dunya jama'itining sükütte turushi, shuningdek bu jaydiki zulumning emdilikte irqiy qirghinchiliqqa aylinip ketkenliki melum boluwatqandimu meblegh sélish shirketliri, bankilar dégenlerning pénsiye fondi, aliy mekteplerning zapas meblighi qatarliq ghayet zor sandiki jughlanmini xitaygha pay meblighi qilip sélishi bolmaqtiken. Uning qarishiche, bu xil meblegh sélish mahiyette Uyghurlarni qiriwatqan xitay hökümitige wasitilik halda yardem bergenlik bolup, bu ularning hemmisi ri'aye qilishqa tégishlik bolghan ijtima'iy mejburiyetke xilap qilmishlar iken. Emma bezilerning buni "Soda jehettiki mu'amilining éhtiyaji" déyish arqiliq xitay kompartiyesige tizliniwatqanliqi buningdiki köp qatlamliq amillarni téximu ashkara namayan qilmaqta iken. Emma buningdiki eng muhim amil bu meblegh shirketlirini mangduruwatqan amérika puqralirining xitayda mewjut bolmighan yüksek insaniyliq rohini jari qildurushi, "Amérika puqrasi" dégen namgha chushluq ish qilishi hésablindiken.

Muhakimining axirida irqiy qirghinchiliq yüz bériwatqanda buni toxtitish üchün aldi bilen amérika meblegh shirketlirining öz exlaqiy mejburiyitini ada qilishining neqeder muhimliqi tekitlinip "Insaniyet jem'iyiti bir qétimliq zor qirghinchiliqning körülüshini tosup qélishqa qadir bolalmighan. Emdi uning ikkinchisi bashlan'ghan iken uni jezmen tosup qélishimiz lazim. Hélihem téxi uning waqti ötmidi" dégen xulase chiqirildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet