Даңлиқ уйғур гимнастикичи нариман қурбаноф қазақистанға йәнә бир алтун медал елип кәлди

Узун йиллардин буян, қазақистандики уйғурлар мәмликәтниң иқтисадий вә мәдинийәт һаятида муһим рол ойнап кәлмәктә. Болупму кейинки вақитларда уйғур қиз-йигитлириниң илим-пән, әдәбият, сәнәт билән бир қатарда тәнһәрикәтниң һәр хил түрлиридиму чоң утуқларға еришип, қазақистанниң шан-шәрипини қоғдаватқанлиқи һәмдә шуниң билән бирликтә уйғурларниму дуняға тонутуватқанлиқи мәлум. Мәсилән, дилмурат миҗитоф билән әланур турғанова бокстин, рәйһангүл гөһәрбақийева әркин муштлишиштин, әзиз турдийеф путболдин, зарина тохтийева хаккей, йәни муз топ ойнаштин, һәсән тохтахуноф чаңға тейилиштин, нариман қурбаноф гимнастикадин, гүлминәм иминова бразилийәчә җю-җитсу, йәни әркин челишиш вә муштлишиштин, фариңиз ғопурова вушу-санда, йәни чамбашчилиқтин қазақистан, асия вә дуня чемпийони дәриҗисигә йәткәнликидин қазақистан уйғурлири қаттиқ хурсән болмақта. Бу нәтиҗиләрниң һәммиси җумһурийәлик “уйғур авази” гезитидә давамлиқ йорутулуп кәлмәктә.

RFA/Oyghan

Йеқинда қазақистан уйғурлири үчүн йәнә бир хушаллиқ һадисә йүз бәрди. Атап ейтқанда, радийомизниң даимлиқ меһмини, даңлиқ гимнастикичи нариман қурбаноф бу қетим қазақистанға йәнә бир алтун медал елип кәлди. “уйғур авази” гезитидә елан қилинған йолдаш молотофниң “нариман қурбанофниң йәнә бир утуқи” намлиқ мақалисидин мәлум болушичә, нариман қурбаноф йеқинда әзәрбәйҗан пайтәхти баку шәһиридә өткүзүлгән гимнастика бойичә дуня мусабиқисиниң нөвәттики басқучида “ат үстидә” оюн көрситиш түридә 14.633 Пай топлап, ғалип аталған. Қазақистанниң “спорт” тәнһәрикәт ториму нариман қурбанофниң биринчиликни игилигәнликини, шуниңдәк иккинчи орунға албанийәлик матвей петрофниң, үчинчи орунға болса, фирансийәлик томмасон сирилниң еришкәнликини көрсәткән.

Биз бакуда өткән дуня мусабиқиси һәққидә мәлумат игиләш мәқситидә нариман қурбанофни зиярәт қилдуқ. Нариман қурбаноф апрелниң бешида бакуда дуня мусабиқисиниң нөвәттики басқучи болуп, униңға 34 мәмликәттин 145 тәнһәрикәтчилинң қатнашқанлиқини оттуриға қоюп, мундақ деди: “қазақистандин төт адәм, йәни мән, милад карими, фарух набийеф вә димитрий потанин қатнаштуқ. Нәтиҗидә милад карими күмүш медалға игә болди. Дуня мусабиқилиридә алған икки алтун медалиниң нәтиҗиси билән мән һазир биринчи орунда туримән. Мән дуня мусабиқилири басқучлиридиму яхши көрсәткүчләрни намайиш қилип, алтун медал елишни үмид қилдим һәм шуниңға йәттим. Қазақистан үчүн бу икки медал чоң утуқ болуп, мениң командамму буниңға интайин хушал. Бизниң бу қетимқи сәпиримизгиму қазақистан гимнастика бирләшмиси тәрипидин хираҗәт бөлүнди. Бәхиткә яриша бу қетим һеч қандақ бир мәсилә туғулмиди. Биз һазир мушу йил июн ейида өтидиған асия мусабиқисигә һәм алий мәктәп оуқуғучилириниң дуня мусабиқисигә тәйярлиниватимиз. Арқа-арқидин өткән төт мусабиқигә қатнашқан болсақму, бизни йәнә бир нәччә чоң мусабиқиләр күтүп туриду.”

Радийомиз зияритини қобул қилған нариманниң дадиси, гимнастика бойичә қазақистанниң хизмәт көрсәткән тренери һүсәнҗан қурбаноф мундақ деди: “мән өзүмниң оғлини хәлқара дәриҗидики тәнһәрикәт маһири, дуня мусабиқилириниң төт басқучиниң ғалипи қилип тәрбийәлидим. У алтә йешидин тартип бүгүнки күнгичә гимнастика билән шуғуллинип келиватиду. Дәсләптила мәшиқни ‛ат үстидә‚ оюн көрситиштин башлап, шуни давам қиливатиду. Нариман 17 йешида тәнһәрикәт маһири болуп, 20 йешида дуня мусабиқисидә ғалип атилип, хәлқара дәриҗидики тәнһәрикәт маһири дәриҗисигә йәтти. Бир нәччә йилниң ичидә у көплигән хәлқара вә дуня мусабиқилиригә қатнишип, яхши нәтиҗиләрни көрсәтти. Қисқиси, мән оғлумниң бу утуқлири билән әлвәттә пәхирлинимән. Һазир той-төкүнләрдә болсун, нәзир-чирақларда болсун, башқиму паалийәтләрдә көпчилик, болупму уйғур хәлқи вәкиллири нариманниң исмини атап, махтиниду. Униң келәчәктә дуня чемпийони, олимпик чемпийони болушини тиләйду. Нариман пәқәт уйғур хәлиниңла әмәс, бәлки қазақистанниң наминиму дуняға тонутуватиду. Бу болупму биз үчүн чоң хушаллиқ.”

Нариман қурбанофниң исми болупму уйғур яшлири арисида чоң һөрмәткә игә болуп, уларниңму тәнһәрикәткә болған қизиқишини пәйда қилмақта. Алмута вилайитиниң байсейит йезиси яшлиридин дуня уйғур қурултийиниң вәкиллириниң бири ефрат насироф зияритимизни қобул қилип, мундақ деди: “ахириқи вақитларда уйғур қиз-йигитлириниң тәнһәрикәт бойичә утуқлири барлиқимизни хушал қилмақта. Мушундақ хушаллиқларниң бири йеқинда әзәрбәйҗан мәмликитиниң баку шәһиридә тәнһәрикәт гимнастикасидин алтун медал алған қериндишимиз нариман қурбаноф. 24 яшлиқ нариман қурбанофниң бу утуқи пүткүл уйғур хәлқиниң утуқи. 6 Йешидин тәнһәрикәткә қизиқип келиватқан йигитимизниң әң йеқин тренери өзиниң дадиси. Дадиси униңға пәқәт тренер болуп қалмастин, униңға әң йеқин мәслиһәтчиси болған.”

Нариманниң “ат үстидә” техникилиқ җәһәттин қийин елементни өзи ойлап тепип, униңға Kurbanov намини бәргән. Бу елементни америкалиқ, русийәлик тәнһәрикәтчиләр қайтилиған. Бирақ көплигән мусабиқиләрдә нариман қурбанофқа охшаш һеч ким орунлимиған. Биз нариман қурбанофтәк уйғур қиз-йигитлиримизниң мушундақ утуқлири билән пәхирлинимиз. Келәчәктә нариман қурбанофқа вә яш тәнһәрикәт талантлириға буниңдинму чоң утуқларға йетип, егиз чоққилардин көрүнүшини чин йүрәктин тиләймиз.”

Игилишимизчә, қазақистандики уйғур тиллиқ мәтбуат сәһипилиридә нариман қурбанофтәк яш уйғур тәнһәрикәтчилириниң җумһурийәт вә дуня дәриҗисидә йетиватқан утуқлири давамлиқ йорутулуп, бу яшларни сағлам һаятқа, һалал әмгәккә, тиришчанлиққа, милләтпәрвәрликкә үндимәктә. Шу мәқсәттә уйғурлар зич олтурақлашқан җайларда тәнһәрикәт кулублири ечилип, һәр хил тәнһәрикәт паалийәтлири давамлиқ өткүзүлүп турмақта.